Փաստ ինֆո

«Չի բացառվում, որ «Բարգավաճ Հայաստան» խմբակցությունը Բարձրագույն դատական խորհրդի անդամի թեկնածու առաջադրի, սակայն այս պահին նման քննարկումներ չկան»,-«Փաստինֆո»-ին հայտնեց ԲՀԿ պատգամավոր Գևորգ Պետրոսյանը:

Նա նշեց, որ մինչ այս խմբակցությունում քննարկում եղել է, սակայն կոնկրետ թեկնածուի ընտրության վրա կանգ չեն առել և չեն պատրաստվում պարզապես դերի համար ԲԴԽ անդամի թեկնածու առաջադրել:«Ես ցանկություն ունեմ, որ մեր խմբակցությունը նույնպես ներգրավված լինի այդ գործընթացում, բայց մենք ոչինչ ինքնանպատակ չենք անում, առավել ևս նման պատասխանատու կարգավիճակում թեկնածու գործուղելը»,-ասաց ԲՀԿ խմբակցության պատգամավորը:

Անդրադառնալով «Իմ քայլը» խմբակցության կողմից ԲԴԽ անդամի թեկնածու առաջադրված, սակայն չընտրված Աննա Մարգարյանին՝ Պետրոսյանն ասաց, որ ցավում է Մարգարյանի՝ ԲԴԽ անդամ չդառնալու համար, քանի որ նա շատ սկզբունքային, գիտակ, պատրաստված անձնավորություն է և լավ կլիներ, որ համալրեր ԲԴԽ-ի կազմը:

«Ակնհայտ է, որ մեղքի առյուծի բաժինը պատկանում է այն խմբակցությանը, որը նրան ներկայացրել էր, որովհետև եթե առաջադրում են թեկնածու, ապա դա ենթադրում է, որ պետք է բարի լինեին գոնե իրենց կազմով ապահովեին այդ թեկնածուին անհրաժեշտ ձայները: Մանավանդ այս դեպքում, երբ իրենց կազմը բավարարում էր միայն իրենց ուժերով կյանքի կոչել թեկնածուին՝ անդամի կարգավիճակում տեսնելու իրենց ցանկությունը, բայց եղավ այնպես, ինչպես եղավ»,-ասաց ԲՀԿ պատգամավոր Գևորգ Պետրոսյանը:

Հեղինակ` Սոնա Գեւորգյան