Փաստ ինֆո

ՀՀ վերաքննիչ քրեական դատարանը դատավոր Վազգեն Ռշտունու նախագահությամբ, այսօր որոշեց մերժել քրեական հեղինակություն «Պոնտյո» անունը կրող Պետրոս Հարությունյանի պաշտպանի բողոքը՝ վերջինիս գրավի դիմաց ազատ չարձակելու որոշման դեմ։ Այս մասին «Փաստինֆո»-ն տեղեկացավ Հարությունյանի պաշտպան Էրիկ Ալեքսանյանից։

Նշենք, որ գրավի չափ սահմանված չէր. պաշտպանական կողմն այն թողել էր դատարանի հայեցողությանը։

Էրիկ Ալեքսանյանը մեզ հետ զրույցում ասաց, որ որոշումը դեռ չեն ստացել եւ մերժման հիմքերին ծանոթ չեն, բայց ամեն դեպքում, այլ սպասելիքներ ունեին. «Գործով թե երկու տուժողները, թե վկաները Պետրոս Հարությունյանի դեմ մեղադրական բնույթի ցուցմունք չեն տվել, հետեւաբար՝ դատավարության մասնակիցների վրա ազդեցություն գործադրելու ենթադրյալ հիմքը  վերանում է կամ՝ առնվազն էապես նվազում։ Դրանից բացի Պետրոս Հարությունյանի նկատմամբ արդեն մեկ անգամ գրավ կիրառվել էր, եւ շուրջ երկու ամիս ազատության մեջ գտնվելով՝ գրավի պայմանները նա չէր խախտել»։

Ինչ վերաբերում է նախագահող դատավորին, ապա ըստ Ալեքսանյանի՝ նա արհեստավարժ դատավոր է. «Ռշտունու արհեստավարժության մասին կարող են երազել շատ ու շատ դատավորներ, բայց ինչ արած, ինչպես ասում են՝ երկու իրավաբան, երեք կարծիք։ Ամեն դեպքում, դատարանի այս որոշումը տարակուսելի է»։

Ալեքսանյանի խոսքով՝ պատրաստվում են կրկին գրավի միջնորդություն ներկայացնել Ընդհանուր իրավասության դատարան. «Պետք է փորձենք մեր դատական համակարգին հասցնել այն, որ ազատության իրավունքը սպիտակ թերթի վրա սեւ տառերով տպագրված երեւույթ չէ, այլ բարձր արժեք ունեցող  իրավունք, որի սահմանափակումը պիտի լինի առավել քան արդարացված»։

Հիշեցնենք, որ Վերաքննիչ քրեական դատարանը բավարարել էր Դատախազության բողոքը՝ Պետրոս Հարությունյանին գրավի դիմաց ազատ արձակելու դատարանի որոշման դեմ, եւ վերջինս մայիսի 16-ին դարձյալ կալանավորվել էր։ Սրա վերաբերյալ պաշտպանական կողմը բողոք էր ներկայացրել Վճռաբեկ դատարան՝ միաժամանակ գրավի միջնորդություն ներկայացնելով Ընդհանուր իրավասության դատարան։ Պաշտպանի այդ միջնորդությունը մերժվել էր, եւ վերջինիս կողմից դատարանի այդ որոշումը բողոքարկվել էր Վերաքննիչ դատարան։

Ավելի վաղ հայտնել ենք, որ Պետրոս Հարությունյանը մեղադրվում է ՀՀ քրեական օրենսգքրի 112-րդ հոդվածի 1-ին մասով, այն է՝ դիտավորությամբ առողջությանը ծանր վնաս պատճառելը եւ 235-րդ հոդվածով, այն է՝ ապօրինի կերպով զենք-զինամթերք ձեռք բերելը, կրելը կամ փոխադրելը: Միջադեպը տեղի էր ունեցել 2018թ. դեկտեմբերի 4-ին Երևան քաղաքի Ռոստովյան 69/6 հասցեում գործող բաղնիքում:

Նախաքննության վարկածով՝ դեպքի օրը՝ ժամը 21։30-ի սահմաններում, սպիտակ գույնի սեդան տեսակի ավտոմեքենայով բաղնիք են այցելել եղբայրներ` Երևանի բնակիչներ,  1988թ. ծնված, նախկինում դատված Հակոբ Հարությունյանը, 1983թ. ծնված Գևորգ  Հարությունյանը և  1984թ. ծնված, նախկինում դատված «Պոնտյո» մականվամբ Պետրոս Հարությունյանը։ Մտել են աշխատասենյակ, որտեղ էլ հնչել են կրակոցները։ Նախաքննության վարկածով՝  «Պոնտյո»-ն ատրճանակով կրակել է տնօրենի աշխատասենյակում գտնվող Գասպարյանի և  տնօրեն Ապիյանի ստորին վերջույթների ուղղությամբ՝ պատճառել հրազենային վնասվածքներ։ Վիճաբանության ժամանակ դանահարվել է նաեւ Հարությունյան եղբայրներից մեկը՝ Գեւորգը։     

Հեղինակ` Միլենա Խաչիկյան