Փաստ ինֆո

Հուլիսի 2-ին ՀՀ արտակարգ իրավիճակների նախարարության փրկարար ծառայության տնօրենի տեղակալ, փ/ծ գնդապետ Արտավազդ Դավթյանն ընդունեց ՄԱԿ-ի փախստականների հարցերով գերագույն հանձնակատարի հայաստանյան գրասենյակի ներկայացուցիչ Աննա-Կարին Օստին:

Հանդիպման նպատակն էր քննարկել այս տարվա սեպտեմբերին Շիրակի մարզի Բավրա անցակետում նախատեսված միգրացիոն հոսքերի կառավարմանը նվիրված համատեղ ուսումնավարժության հետ կապված հարցերը:

Ողջունելով ՄԱԿ ներկայացուցչին՝ Արտավազդ Դավթյանը նշեց, որ թե՛ մարզային իշխանությունները, և թե՛ ՏԻՄ մարմինները արդեն իսկ պատրաստակամություն են հայտնել աջակցել և իրենց մասնակցությունը բերել ուսումնավարժության անցմանը:

Ըստ Արտավազդ Դավթյանի՝ նախատեսվում է վարժանքին ներգրավվել նաև ՏԿԶՆ միգրացիոն ծառայությանը, Կարմիր խաչի հայաստանյան գրասենյակին և Միջազգային փրկարարական կոմիտեին (IRC), մի շարք նախարարությունների, ոստիկանության մարզային ստորաբաժանումներին և Ռուս-հայկական հումանիտար արձագանքման կենտրոնը:

Արտավազդ Դավթյանը հատուկ ընդգծեց, որ հումանիտար կենտրոնը ունի մարդասիրական օգնության ցուցաբերման բավական լուրջ փորձ: Մասնավորապես՝ կենտրոնի ռեսուրսների ներգրավմամբ նախատեսվում է խաղարկել վրանային ավանի ծավալում և կառավարում: 

Նախատեսվում է վարժանքի մեջ ընդգրկել ՓԾ այն մարզային փրկարարական վարչությունների ներկայացուցիչներին, ովքեր, ըստ պլանի, իրենց մարզերում կարող են հանդիպել միգրացիոն հոսքերի հետ կապված խնդիրների: 

Ըստ ՓԾ տնօրենի տեղակալի՝ ուսումնավարժանքի նախապատրաստական փուլում չափազանց կարևոր է հասնել մասնակցող կառույցների գործողությունների առավելագույն ներդաշնակության:

«Կառույցների գործողությունների համակարգումը, գործողությունների առավելագույն ներդաշնակության ապահովումը հանդիսանում է ԱԻՆ գլխավոր գործառույթներից մեկը՝ լինի դա՝ միգրացրոն հոսքերի, կամ այլ բնույթի խնդիրների լուծման պարագայում»,- նշեց Արտավազդ Դավթյանը:

Նրա խոսքով, ցանկություն կա վարժանքի մեջ ներգրավվել նաև Կարմիր խաչի Վրաստանի գրասենյակի աշխատակիցներին, որոնք կարող են իրենց վրա վերցնել հայ-վրացական սահմանը հատող փախստականների դերը: 

Իր հերթին Աննա-Կարին Օստը, շնորհակալություն հայնելով հանդիպման հնարավորության համար, իր գոհունակությունը հայտնեց ԱԻ նախարարության հետ համագործակցության բարձր մակարդակով՝ շեշտելով, որ չափազանց տպավորված է մայիսի 31-ին Գյումրիում անցկացված «Ուժեղ երկրաշարժի դեպքում բնակչության պաշտպանության և հետևանքների վերացման միջոցառումների կազմակերպում ու իրականացում» թեմայով վարժանքի կազմակերպմամբ: 

Ամփոփելով հանդիպումը, Արտավազդ Դավթյանը կարևորեց համատեղ տարվող աշխատանքը՝ նշելով, որ նմանատիպ միջոցառումները հանգեցնում են Հայաստանի, ՀՀ քաղաքացիների անվտանգության մակարդակի բարձրացմանը, որոշակիորեն նպաստում տարածշրջանի առջև ծառացած անվտանգության խնդիրների լուծմանը՝ վստահություն հայտնելով, որ համագործակցությունը կամրապնդվի նաև ապագայում:

Աղբյուր` Փաստինֆո