Փաստ ինֆո

Քաղաքաշինության կոմիտեի նախագահ Վահագն Վերմիշյանի 100-օրվա ամփոփումը եթե տարրալուծենք անցյալի, ներկայի և ապագայի միջև, բնականաբար, ապագայի խոստումներն են գերակայելու: Ընդամենը 100 օր է անցել նրա պաշտոնավարումից և դժվար է մեծ ու լուրջ բան ակնկալել այդ կարճ ընթացքում:

Այնուհանդերձ, մոտիվացիաները պարզորոշ են, իսկ այս համատեքստում հիմնական մոտիվացիան այն է, ինչն իր բոլոր ելույթներում ու լայվերում ասում ու կրկնում է վարչապետը: Տնտեսական հեղափոխություն: Եվ ուրեմն, ինչի մասին էլ խոսելու լինեն կառավարության տնտեսական բլոկի ներկայացուցիչները, պիտի կարողանան ամեն կերպ իրենց ասելիքը ձևակերպել որպես հեղափոխություն, տեղավորել այդ կաղապարի մեջ:

Այս առումով, օրինակ շատ հատկանշական է՝ նորերի մոտ տարածված՝ «առաջին անգամ Հայաստանում» ձևակերպումը: Ոչինչ, որ առաջին անգամը չէ, ոչինչ, որ խոսք է գնում արդեն հաջողությամբ արված-փորձարկված հարցի մասին, կարևորը շեշտելն ու պնդելն է նշված տողը:

Անցում թռիչքային ռեժիմի

Անցնենք Վ.Վերմիշյանի ասուլիսին, որի ընթացքում, հենց սկզբից նա հայտարարեց, որ անցում պիտի կատարենք թռիչքային ռեժիմի: «Մենք ժամանակ չունենք, մեզ հարկավոր է թռիչք, թռիչքային զարգացում, որովհետև ոլորտը բավականին լուրջ մարտահրավերներ ունի և ահագին հետ ենք ընկել: Գնացքը գնացել է՝ վազքով հետևից չես հասնի, դրա համար մեզ հարկավոր է լուրջ աշխատանք»:

Իհարկե, ասուլիսի ընթացքում թռիչքայինը մոտիվացնող օրինակներ, ֆինանսական աղբյուրներ, մի խոսքով՝ կոնկրետություն գրեթե չհնչեց, դե 100 օր է ընդամենն անցել, բայց, որ հավաստիացումների, թե՝ մեզ իրականում սպասվում է շինարարական բում մոտակա տարիներին, և սա մեծ տեղ է զբաղեցնելու տնտեսական հեղափոխության գործընթացում, և այլ, պակաս չեղավ:

Կունենա՞ն ճարտարապետները հստակ դիրքորոշում

Դժվար է ասել, կունենան, թե՞ ոչ, սակայն որ Վերմիշյանն այս հարցում Լամանչեցու հանգույն լավատես է՝ «Այլևս Ճարտարապետական համայնքն ու քաղաքաշինության կոմիտեն հստակ դիրքորոշում են ունենալու բոլոր շինարարական խոշոր նախաձեռնությունների վերաբերյալ»-ասում է նա: Իհարկե, թե՛ նախագծային փուլում, թե՛ արդեն շինարարության ավարտից հետո շատ կարևոր է ճարտարապետների հստակ դիրքորոշման առկայությունը և այդ մասին բարձրաձայնելը: Այս հարցի կարևորման, ավելին ՝ այն թեժացնելու համատեքստում արդեն մի քանի ամիս Ճարտարապետների պալատն է ամենուրբաթյա քննարկումներ անցկացնում, բայց առայժմ խնդրո առարկա հարցի շուրջ մասնագիտական լրջմիտ, ոչ տենդենցիոզ վերլուծության չեմ հանդիպել: Անկախության շրջանի ծարտարապետության վերաբերյալ՝ մասնագիտական, փաստարկված, օբյեկտիվ, միտումնավորությունից զերծ վերլուծություն՝ չիք:

Տեսլականից՝ իրականություն

Մինչ Վերմիշյանը իր տեսլականն է ներկայացնում լրագրողներին՝ հասարակության և պետության շահերի կոդավորման, ճարտարապետության գնահատման տարատեսակների՝ հանրային շահի և ինտերսուբյեկտիվ մակարդակների, գնահատման կրիտերիաների, ի վերջո, ճարտարապետության և քաղաքաշինության կապի և առնչությունների մասին, լրագրողները նրան սեփական տեսլականի տիրույթներից կտրուկ իջեցնում են իրականություն և սկսում աղետի գոտուն վերաբերող հարցերի տարափ տեղալ:

2021-ը դիմավորել առանց «աղետի գոտու շահառու» հասկացության

Այս ձևակերպումն, ինչ խոսք, առավել զգուշավոր է, քան՝ «Աղետի գոտին՝ առանց տնակների» ձևակերպումը, քանի որ այդ տնակները միայն շահառուներին չի, որ պատսպարում են:

Նախորդ շրջանում այս համատեքստում հսկայական աշխատանք է արվել, արդյունքում՝  2008-2020 թթ․ նախատեսված՝ 5396 ընտանիքի բնակարաններով ապահովման խոստումը 2008-2017 թթ․ արդեն հիմնականում կատարված էր՝ 4839 ընտանիքի բնակարանային ապահովման հարցը լուծված էր:

Տեսլականից մինչև տնտեսական հեղափոխություն, թռիչքաձև զարգացում և շինարարական բում՝ այս ասուլիսից ես առանձնացրեցի Վահագն Վերմիշյանի բարձրաձայնած սոցիալական բնակարանաշինության ծրագիրը: Իհարկե, այս ծրագիրը, ինչպես նրա ներկայացրած այլ ծրագրեր, նախագծեր, ներդրումների վերաբերյալ պայմանավորվածություններ ֆինանսական հիմնավորում դեռ չունի, բայց դե, շատ ցանկալի է, որ իրականություն դառնար:

Հեղինակ՝ Ա. Եսայան

Աղբյուր` Փաստինֆո