Փաստ ինֆո

ՀՀ գլխավոր դատախազ Արթուր Դավթյանի գնահատմամբ՝ Դատախազությունը, որպես միասնական համակարգ, պահպանել է իր կայունությունը։ Նման հայտարարությամբ նա հանդես եկավ Դատախազության աշխատողի օրվան նվիրված հանդիսավոր նիստում։

Գլխավոր դատախազը նախ շնորհավորեց աշխատակիցներին մասնագիտական տոնի կապակցությամբ՝ առաջնահերթ նշելով վետերաններին եւ ընդգծելով, որ նրանք համակարգի կենսունակության, երկրում իրավակարգի ամրապնդման գործում ունեցած վաստակին համահունչ շարունակում են ապրել իրենց հարազատ համակարգի առօրյայով, ուրախանալ ձեռքբերումներով, հոգեպես ու բարոյապես նեցուկ են կանգնում՝ իրենց փորձն առաջարկելով նպաստելու դժվարությունների հաղթահարմանը:

«Մասնագիտական տոներին ընդունված է խոսել ձեռքբերումների մասին, գնահատել կատարած աշխատանքը, խոսել անելիքներից։ Այդ համատեքստում կցանկանամ առավելապես շեշտադրումներն անել այն արժեքների, եւ առաջնահերթությունների վրա, որոնց հենքի վրա կառուցում ենք այսօրվա ու վաղվա Դատախազությունը»,- ասաց գլխավոր դատախազը եւ որպես կարեւոր ձեռքբերում՝ առանձնացրեց միասնական դատախազական համակարգի կայունությունը՝ իր սահմանադրական կարգավիճակին հարիր դիրքերում ամուր կանգնած լինելու իրողությունը. «Նախորդ տարվա պատմական շրջադարձային իրադարձություններից հետո ծավալված հատկապես ծանր, առանձնապես ծանր հանցագործությունների բացահայտման, հիմնավորման, քրեական հետապնդման, մեղադրանքի, պետական շահերի պաշտպանության դատախազական գործառույթներն իրացնելիս էապես նպաստեցին մեր երկրում իրավական կայունության, անվտանգության պահպանմանն ու ամրապնդմանը, քրեաիրավական մթնոլորոտում գործընթացների բնականոն շարունակությանը»,- հայտարարեց Ա.Դավթյանը։

Ըստ նրա՝ ամենակարևոր արդյունքներից մեկը հանցագործությունների և հատկապես կոռուպցիայի, անարդարությունների նկատմամբ հանրային անհանդուրժողականության մակարդակի կտրուկ բարձրացումն է, ու հանցավոր երևույթների վերաբերյալ իրավապահ մարմիններին իրազեկելու հարցում քաղաքացիների աննախադեպ նախաձեռնողականություննը. «Կարող եմ փաստել, որ հանցավորության դեմ պայքարում ունենք մի այնպիսի գործընկեր, ինչպիսիք ակտիվ եւ երկրի ապագայով շահագրգիռ քաղաքացին է»,- հայտարարեց Գլխավոր դատախազը՝ փաստելով, որ նա նաեւ պահանջատեր է։

Գլխավոր դատախազը փաստեց, որ աննախադեպ ակտիվությունը հանգեցրել է իրավապահ բոլոր մարմինների գերծանրաբեռնվածության. «Բայց դա մեզ համար ոչ թե տրտնջալու, այլ առավել մոտիվացվելու խթան է»,-նշեց ՀՀ գլխավոր դատախազը:

Մանրամասները՝ տեսանյութում

Աղբյուր` Փաստինֆո