Փաստ ինֆո

«Փաստինֆո»-ի հաղորդմամբ՝ քաղաքացի Արթուր Մկրտչյանը բողոքում է քաղաքապետարանի գործողությունների դեմ, որը ցանկանում է նրան վտարել Կենտրոն վարչական շրջանի Տիգրան Մեծի 53/4 հասցեում գտնվող տարածքից, որտեղ տարիներ շարունակ կրպակ է շահագործել։ Քաղաքացին դատական հայց է ներկայացրել ընդդեմ քաղաքապետարանի, իսկ փաստաբան Գեւորգ Մկրտչյանը դիմում է ներկայացրել ՀՀ ոստիկանապետ Վալերի Օսիպյանին։

Բանն այն է, որ նշված հասցեում գտնվող կրպակաշարերը, որ պատկանել են «Կենտրոն» թաղային համայնքին, ավագանու 2008 թվականի մայիսի 23-ի որոշմամբ՝ պետք է վաճառքի ձևով օտարվեին դրանց հասցեատերերին։ 2008 թվականի դեկտեմբերի 26-ին ընդունված «Երևան քաղաքում տեղական ինքնակառավարման մասին» ՀՀ օրենքի 110-րդ հոդվածի 1-ին մասի համաձայն՝ Երևան քաղաքի ավագանու ընտրությունից հետո այդ պահին Երևանի թաղային համայնքների սեփականություն համարվող գույքը սեփականության իրավունքով փոխանցվել է Երևանին։

Ստացվում է, որ Երեւանի քաղաքապետարանը, դառնալով Կենտրոն համայնքի իրավահաջորդը, ստացել է համայնքի սեփականությունը հանդիսացող կրպակաշարերը եւ պարտավորվել է կատարել «Կենտրոն» համայնքի որոշումների պահանջները, այս դեպքում՝ այդ կրպակաշարերի վաճառքը դրանց հասցեատերերին։

Սակայն ըստ փաստաբանի՝ քաղաքապետարանը խուսափել է այդ որոշման կատարումից եւ դիմել է ՀՀ ոստիկանությանը նշված կրպակաշարերն օրինական հիմքերով տիրապետողներին վտարելու պահանջով։

Փաստաբան Գեւորգ Մկրտչյանը պնդում է, որ նշված հասցեում գտնվող կրպակաշարերը հասցետերերի կողմից օգտագործվում են օրինական հիմքերով կամ առնվազն ադ հիմքերը քաղաքացիաիրավական հարաբերություններից ծագող վեճ է։ Նա նշում է, որ Կառավարության թիվ 797-Ն որոշման 7-րդ կետի համաձայն՝ եթե ոստիկանը պարզում է, որ գույքի տարածք մուտք գործող կամ գործած անձը հանդիսանում է բնակելի տարածքի օրինական տիրապետող կամ դրա հիմքերը քաղաքացիաիրավական հարաբերություններից ծագող վեճ է, ապա դրա մասին կազմում է արձանագրություն. «Ավելին, այդպիսի պայմաններում, նույն կարգի 9-րդ կետի համաձայն՝ ոստիկանն իրավասու չէ անձին դուրս բերելու անշարժ գույքի տարածքից և, միաժամանակ պարզաբանում է դիմողին, որ տվյալ պարագայում ինքն իրավասու չէ անձին դուրս բերելու անշարժ գույքի տարածքից կամ արգելելու մտնել անշարժ գույքի տարածք և կողմերի միջև տվյալ վեճը կարող է լուծվել միայն դատական կարգով»-նշում է փաստաբանը։

Այդպիսով, վերջինս խնդրում է Վալերի Օսիպյանից Ոստիկանության համապատասխան ծառայողներին հանձնարարել դադարեցնել Երևան քաղաքի Տիգրան Մեծի պող․ թիվ 53/4 հասցեում գտնվող կրպակաշարերից ՀՀ Երևան քաղաքի «Կենտրոն» թաղային համայնքի ավագանու 23․05․2008թ․ թիվ 4/21-Ա որոշման հասցեատերերին, մասնավորապես Արթուր Էդուարդի Մկրտչյանին, նույն հասցեից դուրս բերելուն ուղղված գործողությունները, իսկ Երևանի քաղաքապետարանին պարզաբանել, որ վեճը կարող է լուծվել միայն դատական կարգով:

 Հեղինակ՝ Միլենա Խաչիկյան

Աղբյուր` Փաստինֆո