Փաստ ինֆո

«Իրավաբանորեն այս որոշման մեջ որեւէ զարմանալի բան չկա, որովհետեւ Վահե Գրիգորյանը, լինելով տուժողների իրավահաջորդների ներկայացուցիչ,  բնականաբար շահագրգիռ անձ է եւ ունի շահերի բախում, վստահ եմ՝ ինքն էլ դա գիտակցում է»,- «Փաստինֆո»-ի հետ զրույցում այս կարծիքը հայտնեց փաստաբան Արա Ղազարյանը՝ անդրադառնալով Սահմանադրական դատարանի երեկվա որոշմանը։

Հիշեցնենք, որ ըստ այդ որոշման՝ ՍԴ նորընտիր դատավոր Վահե Գրիգորյնանը չի կարող մասնակցել Ռոբերտ Քոչարյանի եւ Յուրի Խաչատուրովի դիմումների քննությանը Սահմանադրական դատարանում, քանի որ նա կանխակալ վերաբերմունք ունի որպես դիմող հանդես եկող սահմանադրական դատավարության մասնակիցների նկատմամբ, ինչպես նաև մասնակցել է հիշյալ գործերի քննությանն այլ դատարաններում:

Ըստ Արա Ղազարյանի՝ սա բխում է նաեւ փաստաբանների վարքագծի կանոնակարգից. «Եթե նայենք Փաստաբանների վարքագծի կանոնակարգին, ապա նման նորմեր կան. եթե անձը ունի շահերի բախում, ապա վարույթին չպետք է մասնակցի»։

Ըստ Ղազարյանի, նույն սկզբունքով նա չպետք է մասնակցի նաեւ Երեւանի ընդհանուր իրավասության դատարանի դատավոր Դավիթ Գրիգորյանի դիմումի քննարկմանը ՍԴ-ում, եթե պարզ դառնա, որ այդ դիմումը ՍԴ-ն վարույթ է ընդունել. «Եթե շահարգիռ անձ է, եւ կանխակալ կարծիք ունի կամ արդեն հայտնել է իր կարծքը, ապա այո, դրան եւս չպետք է մասնակցի»։

Ինչ վերաբերում է ՍԴ-ի շուրջ ծավալված քննարկումներին, փաստաբանն այդտեղ խնդիր չի տեսնում. «Ես երբեք չեմ համարել, որ ՍԴ-ի շուրջ խնդիր է գոյացել, այսինքն՝ խնդիր չկա, որ ես ելքը տեսնեմ, նոր Սահմանադրությամբ այդ խնդիրը հստակորեն կանոնակարգված է, եւ 213-րդ հոդվածով նշված է, որ դատավորները, ովքեր ընտրվել են դեռ նախկին Սահմանադրությամբ, շարունակելու են պաշտոնավարել մինչ օրենքով սահմանված ժամկետի ավարտը»։

Ղազարյանի խոսքով՝ դա բխում է հանրային շահից եւ դատավորի անփոփոխելիության հիմնարար սկզբունքից, որը սահմանված է թե մեր, թե եվրոպական նորմերով. «Օրենքը հստակորեն կարգավորել է, անորոշություն, անկանխատելիություն չի եղել, հետեւաբարի ինչո՞ւ այդ մարդիկ պետք է դադարեն պաշտոնավարել։ Այլ բան է, որ Վահե Գրիգորյանը համաձայն չէ այդ հոդվածի բովանդակության հետ, բայց դա նրա կարծիքի ազատության իրավունքն է, հակառակ դեպքում միայն ՍԴ-ն կարող է այդ օրենքը համարել ոչ իրավաչափ»։

Արա Ղազարյանի խոսքով՝ քանի դեռ սահմանադրական նորմը ուժի մեջ է, մենք բոլորս պարտավոր ենք ուղղակի հարգել այդ նորմը. «Դա բխում է օրենքի գերակայության սկզբունքից, ինչից, սակայն, չի բխում սահմանադրական նորմն անտեսելն ու արհամարհելը»,-մեզ հետ զրույցում ասաց նա։

Հեղինակ՝ Միլենա Խաչիկյան

Աղբյուր` Փաստինֆո