Փաստ ինֆո

«Վարույթն իրականացնող մարմինը, հաշվի առնելով այն հանգամանքը, որ «Մարտի 1»-ի գործի շրջանակում  պետք է ցուցմունք վերցնի իմ պաշտպանյալից, իրականացրել է իր այդ գործառույթը, սակայն իմ պաշտպանյալը հրաժարվել է»,-«Փաստինֆո»-ի հաղորդմամբ՝ այս մասին այսօր հայտարարեց Մանվել Գրիգորյանի պաշտպաններից Լեւոն Բաղդասարյանը. «Այսինքն՝ նա այդ գործով բացատրություն կամ ցուցմունք չի տվել, բայց դրանից զատ այս գործի շրջանակում սկսում են բացահայտվել որոշակի ապացույցներ, մասնավորապես՝ Քոչարյանի պաշտպանական թիմը ամիսներ առաջ փաստել էր, որ Քոչարյանը, հաշվի առնելով այն հանգամանքը, որ այդ ժամանակ Մանվել Գրիգորյանը ՊՆ փոխնախարարն էր, եւ իբր նա ցանկացել է կանգնել է ժողովրդի կողմից, որոշակի գործառույթներ է իրականացրել»։

Պաշտպանի խոսքով՝ Գրիգորյանը չի ներկայացել խորհրդակցությանը՝ պարզ հասկանալով, թե ինչ ցուցումներ պետք է լինեն դրա ընթացքում. «Լինելով ըմբոստ տեսակ՝ Գրիգորյանը առերեւույթ որոշակի անօրինական գործառույթներից զերծ մնալու պատճառաբանությամբ չի գնացել, եւ երկրի այդ ժամանակվա Գերագույն գլխավոր հրամանատարի հրամանը չի կատարել»։

Լեւոն Բաղդասարյանը հիշեցրեց՝ օրեր առաջ տուժողի իրավահաջորդի կողմից արվեց հայտարարությունը, թե գործի նյութերում առկա է ապացույց, որով երեւում է, որ Քոչարյանն այդ օրերին խորհրդակցություն է հրավիրում, սակայն Մանվել Գրիգորյանը չի մասնակցում այդ խորհրդակցությանը, եւ նա էլ ասում է՝ տեսեք՝ Գրիգորյանի «մայրիկը ինչպես եմ լացացնելու». «Նախ, եթե դա իրոք այդպես է, փաստեմ, որ դա իրավական կատեգորիա չէ, եւ երբ նման արտահայտություն անում է երկրի առաջին դեմքը, այլ գնահատման հարց է, բայց ասեմ, որ թուրքն անգամ դա չի կարողացել դա անել։ Եվ առաջին, եւ երկրորդ, եւ երրորդ նախագահների օրոք եղել են դեպքեր, երբ այդ շրջանակում հաշվի առնելով Գրիգորյանի անհատականությունը՝ ցանկացել են նրա «մայրիկը լացացնել», բայց ինչպես տեսնում եք, չի ստացվել»։

Ինչ վերաբերում է Մանվել Գրիգորյանի վերաբերյալ քրեական գործին, պաշտպանների դիրքորոշումը նույնն է. «Մեր կարծիքով՝ նրան մեղադրում են հնարածին գործով, եւ ես ավելի քան լիահույս եմ, որ օբյեկտիվ գնահատական է տրվելու»։

Պաշտպանի խոսքով՝ մոտ վեց ամիս առաջ, երբ իրենք բարձրաձայնում էին այն, որ կալանքի կրման շրջանում նրա հիվանդությունները կրում են բացասական դինամիկա, ոչ մի արդյուքնի չհասան, եւ դիմեցին ՄԻԵԴ. «Իմ պրակտիկայում սա իմ առաջին գործն է, երբ ՄԻԵԴ-ը երկու անգամ անհապաղ միջոցներ կիրառեց։ Հունիսի 21-ին կայացրած երկրորդ որոշմամբ՝ ՄԻԵԴ-ը պարտավորեցրեց ՀՀ-ի կառավարությանը, որպեսզի վեջրինս Նաիրի եւ Գրիգոր Լուսավորիչ բկ-ների տված էպիկրիզի հիման վրա վերջինս շարունակի բուժումը քաղաքացիական հիվանդանոցում»։

Լեւոն Բաղդասարյանի կարծիքով՝ նորանկախ Հայաստանում ՄԻԵԴ-ի նման կոշտ դիրքորոշումը որոշակի հետեւություններ պետք է առաջացնի. «Այս ընթացքում նրա առողջությունը ոչ միայն բացասական դինամիկայի է հասել, այլ կալանքը կրելու ընթացքում նրա վիճակը հասել է այն աստիճանի, որ վերջինս քայլել չի կարողանում, այսինքն՝ անդամալույծի կարգավիճակ է ստացել, ուստի՝ սա տիպիկ խոշտանգման օրինակ է»։

Բաղդասարյանը նշեց, որ նրան միտումնավոր փորձում են պահել կալանքի տակ. «Մենք բարձրաձայնում ենք, ասում ենք, որ հիվանդությունները անհամատեղելի են կալանքի հետ, թույլ տվեք, որ նա արժանապատիվ ձեւով ներկայանա արդարադատությանը, եւ այո, եթե ապացուցվի նրան մեղսագրված արարքը, թող ստանա համապատասխան պատիժը եւ գնա համապատասխան վայր՝ իր պատիժը գրելու»։

Պաշտպանը տեղեկացրեց, որ եթե մեր պետական ատյաններում իր պաշտպանյալի կալանքը չփոխարինվի այլընտրանքային խափանման միջոցով, հաջորդ օրը դիմելու են ՄԻԵԴ՝ կիրառելու հաջորդ անհապաղ միջոցը։

Աղբյուր` Փաստինֆո