Փաստ ինֆո

Չնայած քաղաքապետի խոստումներին՝ մայրաքաղաքում աղբահանության խնդիրը ոչ միայն չի լուծվել, այլեւ վիճակը շատ ավելի վտանգավոր է դառնալու։ Այս մասին այսօր տեղի ունեցած ասուլիսում հայտարարել է «Լույս» խմբակցության անդամ Թեհմինա Վարդանյանը։

«Երբ քաղաքապետ Հայկ Մարությանը ստանձնեց իր լիազորությունները, ժողովրդին խոստացավ, որ աղբահանության հարցն առավելագույնը երկու ամսում կլուծվի, սակայն անցել է ինը ամիս, բայց որևէ դրական տեղաշարժ չկա։ Մի բան էլ հետ քայլ կա։ Եթե այսպես շարունակվի, հուլիս և օգոստոս ամիսներին շատ ավելի վատ է լինելու, ինչը սանիտարահիգիենիկ պայմանների տեսանկյունից շատ վտանգավոր է դառնալու», - հայտարարեց Թեհմինա Վարդանյանը։

Բանախոսի փոխանցմամբ՝ դրական տեղաշարժեր տեսանելի չեն նաեւ տրանսպորտի կանոնակարգման ոլորտում։ Նա հիշեցրեց, որ քաղաքապետն իր լիազորություններն ստանձնելու օրը խոստացել էր, որ երկու տարվա ընթացքում կլուծի նաև մայրաքաղաքի տրանսպորտի հարցը։

«Անցել է շուրջ ինը ամիս, մենք դեռ սպասում ենք այդ երկու տարվա մեկնարկին», - ասաց «Լույս» խմբակցության անդամը։

Ավագանու «Բարգավաճ Հայաստան» խմբակցության անդամ Հռիփսիմե Առաքելյանն էլ հիշեցրեց, որ այս ընթացքում տրանսպորտի հարցի վերաբերյալ ընդամենը մեկ քննարկում է եղել, որի ժամանակ քննարկվել են դեռեւս նախկին քաղաքային իշխանության կողմից ձեռք բերված պայմանավորվածությունների փաթեթթ։ «Այդ ամիսների ընթացքում քննարկում էին, տեսնեն, թե ինչ ծրագիր են բերել նախկին իշխանությունները։ Վստահ եմ, որ այդ ծրագրի վերաբերյալ վստահություն չեն ունեցել, սակայն ամիսների ընթացքում քննարկել-քննարկել են, տեսել են, որ երևի այդքան էլ վատը չէ, սա էլ պետք է իրականացնել», - ասաց Հռիփսիմե Առաքելյանը։

Աղբյուր` Փաստինֆո