Փաստ ինֆո

Այսօր տեղի է ունեցել ՀՀ կառավարության հերթական նիստը, որը վարել է ՀՀ վարչապետ Նիկոլ Փաշինյանը: Նախքան օրակարգային հարցերի քննարկումը վարչապետն անդրադարձել է Վիճակագրական կոմիտեի հրապարակած՝ մայիս ամսվա հիմնական տնտեսական ցուցանիշներին: Այս մասին հայտնում են  ՀՀ վարչապետի աշխատակազմի տեղեկատվության և հասարակայնության հետ կապերի վարչությունից:

Պետության կողմից երաշխավորված անվճար և արտոնյալ պայմաններով մատուցվող ծառայությունների շրջանակի, շահառուների խմբերի ընդլայնման, մատուցվող ծառայությունների առկա պահանջարկի բավարարման, գրպանից դուրս կատարվող ծախսերի ցուցանիշի նվազման, ինչպես նաև առողջապահական կազմակերպությունների արդիականացման, վերազինման, անհրաժեշտ սարքավորումներով հագեցման անհրաժեշտությամբ պայմանավորված՝ կառավարությունն ընդունել է համապատասխան որոշումներ: Ըստ այդմ՝ նախատեսվում է պետբյուջեի եկամուտների ավելացման հաշվին իրականացնել առողջապահության ոլորտի առավել հրատապություն և կարևորություն ունեցող մի շարք ծրագրերի ընդլայնում, պետության կողմից երաշխավորված անվճար և արտոնյալ պայմաններով մատուցվող ծառայություններից օգտվող շահառուների խմբի ավելացում, ինչպես նաև մատուցվող ծառայությունների գների համահարթեցում: Մասնավորապես,  «Սոցիալապես անապահով և հատուկ խմբերում ընդգրկվածների բժշկական օգնության իրականացում» ծրագրին առաջարկվում է հատկացնել լրացուցիչ 5.1 մլրդ դրամ, որը կուղղվի`հիվանդանոցային բժշկական օգնության և սպասարկման ծառայությունների գների համահարթեցմանը, ինչի արդյունքում կբարձրանա նաև բժշկական կազմակերպությունների աշխատողների աշխատավարձը, որն էլ իր հերթին կնպաստի ծրագրի արդյունավետության բարելավմանը և ոլորտում ստվերային գործունեության նվազմանը, սրտի վիրահատական ծառայությունների գծով պետպատվերի շրջանակում անվճար բժշկական օգնություն ստանալու իրավունք ունեցող շահառուների խմբերի ընդլայնմանը, մասնավորապես 1-ին և 2-րդ խմբի հաշմանդամների, ժամկետային զինծառայողների ընտանիքի անդամների, մարտական գործողությունների մասնակիցների ընտանիքի անդամների, զոհված զինծառայողներին ընտանիքի անդամների: «Երեխաների բժշկական օգնության ծառայություններ» ծրագրում նախատեսվում է 0-18 տարեկան քաղաքացիների բժշկական օգնությունն ու սպասարկումն ամբողջությամբ իրականացնել պետպատվերի շրջանակում, ինչպես նաև փոխհատուցել մինչև տարեվերջ կանխատեսվող դեֆիցիտը` ընդհանուր առմամբ ծրագրին ուղղելով 1,750.0 մլն դրամ: Մինչ այժմ այդ իրավունքից օգտվում էին 0-7 տարեկան, հաշմանդամություն ունեցող,  առանց ծնողական խնամքի մնացած, հաշմանդամություն ունեցող անձանցից բաղկացած ընտանիքների, մինչև 18 տարեկան դիսպանսեր հսկողության տակ գտնվող, միածնող, 14-15 տարեկան արական սեռի, նախազորակոչային տարիքի և բազմազավակ (մինչև 18 տարեկան 4 և ավելի անչափահաս երեխաներ ունեցող) ընտանիքների երեխաները: Փոփոխության արդյունքում մինչև 18 տարեկան շահառուների քանակն ավելանում է մոտ 200,000 անձով:

Ինչպես նշել է առողջապահության փոխնախարար Անահիտ Ավանեսյանը, այս փոփոխությունները հնարավոր են դարձել պետբյուջե 62 մլրդ դրամ հավելյալ մուտքերի շնորհիվ: «Դրա մասին, Դուք՝ պարոն վարչապետ, բազմիցս հայտարարել եք, և որի մի զգալի մասը փաստացի ուղղվելու է սոցիալապես կարևոր ոլորտներից մեկին՝ առողջապահությանը»,-նշել է փոխնախարարը և հավելել, որ այդ նպատակի համար մինչև տարեվերջ նախատեսվում է ծախսել 12 մլրդ դրամ:

Նիկոլ Փաշինյանը կարևորել է ընդունված որոշումները և անդրադարձել դրանց  գաղափարաբանությանն ու առնչությանը՝ կառավարության կողմից իրականացվող տնտեսական քաղաքականության և տնտեսական հեղափոխության փիլիսոփայության հետ: «Ընդհանրապես կա երկու ճանապարհ, և այդ երկու ճանապարհներից մենք ընտրել ենք հետևյալը. մենք ասել ենք, որ տնտեսական հեղափոխության հիմնական գործող անձը պետք է լինի Հայաստանի Հանրապետության քաղաքացին: Հիմա այս շատ լուրջ որոշումներով իրականացնում և որդեգրում ենք հետևյալ ուղղությունը՝ մենք մեր կողմից ամեն ինչ պետք է անենք, որ քաղաքացին լինի առողջ: Իհարկե, առաջին հերթին սոցիալապես անապահով քաղաքացին լինի առողջ, որպեսզի ինքն աշխատելու, ստեղծագործելու և իր հուսահատ սոցիալական վիճակը հաղթահարելու հնարավորություն ունենա: Եկեք ուղիղ ասենք, մենք այս գումարն ինչ-որ չափով կարող էինք ինչ-որ համամասնություններով այդ ընտանիքներին վճարել, ասել՝ սա մենք ձեզ ուղղակի ավելացնում ենք, և այդ մարդիկ, յուրաքանչյուրն իր ճաշակով, յուրաքանչյուրն իր մտածածով կօգտագործեր այդ գումարը, և մենք ընդհանուր առմամբ երկարաժամկետ և կապիտալ էֆեկտներ չէինք ունենա: Կառավարությունը, ընդհակառակը, իր քաղաքական տրամաբանության և գաղափարաբանության շրջանակներում որոշում է այդ գումարները ծախսել ՀՀ քաղաքացիների առողջության պահպանման և հիվանդությունների կանխարգելման, նրանց բնականոն կյանքն ու առողջությունը ապահովելու համար: Այս առումով թվերն իսկապես տպավորիչ են, մի քանի 100 հազար մարդ առնչվում է այս որոշումների հետ: Մենք այս տարի ընդհանրապես կլուծենք այն խնդիրը, որը նախկինում ունեցել ենք. կառավարությունը մի կողմից հայտարարում էր, որ, օրինակ՝ սրտի ստենտավորման ծրագիրն իրականացվում է անվճար, բայց քանի որ կար գումարային որոշակի լիմիտ և լինում էր այնպես, որ ասենք տարվա երրորդ կեսին կամ երկրորդ կեսին այդ կարիքն ունեցող քաղաքացիները կանգնում էին փաստի առաջ, երբ նրանց ասվում էր, որ պետբյուջեով հատկացված միջոցները սպառվել են, ուստի անվճար ստենտավորման ծրագրից դուք այլևս չեք կարող օգտվել: Հիմա մենք սրանով լուծում ենք այդ հարցը, որ կառավարության քաղաքական հայտարարությունը գործնականում մինչև տարվա վերջ իսկապես մեր քաղաքացիներին կարողանանք ապահովել, ընդ որում՝ ի տարբերություն նախկինի, մենք հիմա դա անում ենք դեղապատ ստենտներով»,-ասել է գործադիրի ղեկավարը:

Նիկոլ Փաշինյանը մեկ անգամ ևս ընդգծել է նման որոշումներ ընդունելու կարևորությունը և,  անդրադառնալով հետագա տնտեսական ակտիվությունը խթանելու համար բյուջեի հավելյալ եկամուտները կապիտալ ծախսերին ուղղելու հարցին, նշել է.   «Սրա շուրջ կար բանավեճ՝ արդյոք սա կապիտա՞լ ծախս է, թե՞ ոչ: Այո՛, սա կապիտալ ծախս է: Իհարկե, մի քիչ կոպիտ է հնչում ժամանակակից աշխարհում, երբեմն կոպիտ տերմիններ կան, որոնք ինձ էլ դուր չեն գալիս, բայց սա մարդկային կապիտալի զարգացմանն ուղղված շատ կոնկրետ ծախս է»: Կառավարության ղեկավարը միաժամանակ նշել է, որ պետք է շատ լուրջ աշխատել կապիտալ ծախսերի արդյունավետությունը բարձրացնելու և կապիտալ ծախսեր իրականացնելու ուղղությամբ. «Բայց, այնուամենայնիվ, այս կարգի որոշումները, կարծում եմ, շատ կարևոր են նաև ընդհանուր տնտեսական տրամադրությունների բարձր ֆոն ապահովելու համար և քաջալերելու ՀՀ քաղաքացիներին իրականացնել տնտեսական գործունեություն»:   

Վարչապետը հորդորել է նախատեսվող փոփոխությունների վերաբերյալ պատշաճ իրազեկել քաղաքացիներին:

Կառավարությունն առաջարկում է նվազագույն աշխատավարձը 55 հազար դրամի փոխարեն՝ սահմանել 68 հազար դրամ

Գործադիրը հավանություն է տվել ԱԺ պատգամավորներ Բաբկեն Թունյանի և Վարազդատ Կարապետյանի օրենսդրական նախաձեռնության կարգով ներկայացրած «Նվազագույն ամսական աշխատավարձի մասին» ՀՀ օրենքում փոփոխություններ կատարելու մասին» ՀՀ օրենքի նախագծի վերաբերյալ կառավարության առաջարկությանը:

Ինչպես նշել է ՀՀ աշխատանքի և սոցիալական հարցերի նախարարի տեղակալ Գեմոֆին Գասպարյանը, օրինագծի հեղինակներն առաջարկում են նվազագույն աշխատավարձը 55 հազարից բարձրացնել և դարձնել 63 հազար դրամ: Հիմնավորումը Վիճակագրական կոմիտեի կողմից հրապարակված 2018 թ. առաջին եռամսյակից հրապարակված միջին ընթացիկ գներով նվազագույն սպառողական արժեքի հիմքով է, որը 63 հազար 550 դրամ է: Փոխնախարարը տեղեկացրել է, որ նախարարությունը  երեք ամիս առաջ Աշխատանքի և սոցիալական հետազոտությունների ազգային ինստիտուտին պատվիրակել է հետազոտություն, որի արդյունքներով հնարավոր է դարձել գնահատել նվազագույն աշխատավարձի սոցիալ-տնտեսական օրինաչափ մեծությունը: 4 մեթոդով իրականացրած հետազոտության արդյունքների համաձայն՝ կառավարությունն առաջարկում է օրինագծում 63 հազար դրամի փոխարեն՝ սահմանել 68 հազար դրամ։

Ի պատասխան վարչապետի հարցին, թե ի՞նչ գործնական խնդիր է լուծվում նվազագույն աշխատավարձը բարձրացնելով, Գեմոֆին Գասպարյանը նշել է, որ 45 հազար մարդ  մասնավոր ոլորտում  և 35 հազար մարդ պետական ոլորտում ստանում է նվազագույն աշխատավարձ՝ 55 հազար դրամ: «Կառավարությունն առաջարկում է, որ նվազագույն աշխատավարձը դառնա 68 հազար դրամ՝ այն բարձրանալով 23.6 տոկոսով»,-նշել է փոխնախախարը:

Անդրադառնալով աշխատողների իրավունքների պաշտպանության խնդրին՝ կառավարության ղեկավարն ընդգծել է այդ հարցը ուշադրության կենտրոնում պահելու կարևորությունը: «Մենք պետք է նաև աշխատողների իրավունքների պաշտպանությանը շատ լուրջ ուշադրություն դարձնենք: Հատկապես սոցիալական անապահովության այս ֆոնին մենք պետք է ամեն ինչ անենք, որպեսզի այդ ոլորտում չարաշահումներ չլինեն և այդ հարաբերությունները արժանապատիվ կարգավորվեն,  հաշվի առնվեն ոչ միայն գործատուի, այլ նաև աշխատողի շահերը»,-ասել է Նիկոլ Փաշինյանը:

Գործադիրը հավանություն է տվել  «ՀՀ ջրային օրենսգրքում լրացումներ կատարելու մասին» և «Վարչական իրավախախտումների վերաբերյալ ՀՀ օրենսգրքում լրացում կատարելու մասին» ՀՀ օրենքների նախագծերի փաթեթի վերաբերյալ կառավարության օրենսդրական նախաձեռնությանը: Նախագծերի ընդունմամբ հիմքեր կստեղծվեն  ռեկրեացիոն գոտիներում ջրային ռեսուրսների պահպանության պահանջների  սահմանման համար:  Առաջարկվում է  նաև լրացում Վարչական իրավախախտումների վերաբերյալ ՀՀ օրենսգրքի համապատասխան հոդվածում՝ նախատեսելով վարչական պատասխանատվություն ռեկրեացիայի նպատակով ջրային ռեսուրսներից օգտվելու կանոնները (պայմանները) խախտելու դեպքում:

Կառավարությունն առաջարկություններ է ներկայացրել նաև  «ՀՀ քաղաքացիական դատավարության օրենսգրքում փոփոխություն և լրացումներ կատարելու մասին», «Սևանա լճի մասին» ՀՀ օրենքում լրացումներ և փոփոխություն կատարելու մասին», «ՀՀ պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին»,  «ՀՀ հարկային օրենսգրքում փոփոխություն կատարելու մասին» և այլ  ՀՀ օրենքների նախագծերի վերաբերյալ:

Աղբյուր` Փաստինֆո