Փաստ ինֆո

Փաստաբան Հրանտ Անանյանի՝ Գլխավոր դատախազ Արթուր Դավթյանին ուղղված բողոքը՝ դատարանների արգելափակման դեպքով, մասնավորապես՝ դատավոր Դավիթ Բալայանի միջադեպով քրեական գործ չհարուցելու մասին ՀՔԾ որոշման դեմ, մերժվել է։ Այս մասին «Փաստինֆո»-ն տեղեկացավ Դատախազության հանրային կապերի բաժնի պետ Արեւիկ Խաչատրյանից։

Հիշեցնենք, որ դատարանների արգելափակման օրը՝ մայիսի 20-ին, փաստաբանը հանցագործության մասին հաղորդում էր ներկայացրել դատավոր Դավիթ Բալայանի հետ կատարված միջադեպի վերաբերյալ. դատավորը փորձել էր մուտք գործել դատարանի շենք, սակայն դատարանի դիմաց հավաքված անձինք դա թույլ չէին տվել, եւ ստեղծված քաշքշուկի արդյունքում դատավորը վայր էր ընկել։  Հունիսի 3-ին Հատուկ քննչական ծառայությունը հայտնել էր, որ հիշյալ դեպքերով ներկայացված հաղորդումները քննության առարկա են դարձել մեկ վարույթի շրջանակում, եւ քրեական գործի հարուցումը մերժվել էր  հանցադեպի բացակայության պատճառով։

Հրանտ Անանյանը «Փաստինֆո»-ի հետ զրույցում նշեց, որ մերժման որոշումը նոր է ստացել, եւ կարող է ասել, որ մերժման պատճառաբանությունն անհիմն է. «Դատավոր Դավիթ Բալայանի միջադեպի վերաբերյալ որեւէ անդրադարձ չկա։ Դատախազությունը խուսափել է որեւէ ռեալ պատճառաբանություն շարադրել բողոքը մերժելու որոշման մեջ, քանի որ կաշկանդված է այս գործով իշխանության ճաշակին հակառակ որոշում կայացնել»։

Անանյանը հայտնեց նաեւ, որ պատրաստվում է բողոք ներկայացնել դատարան՝ քննիչի որոշումը վերացնելու պահանջով։

Հունիսի 14-ին հայտնել էինք, որ փաստաբանը բողոքարկել էր դատարանների արգելափակման դեպքով քրեական գործ չհարուցելու մասին ՀՔԾ որոշումը՝ նշելով, որ քննիչի՝ քրեական գործ չհարուցելու որոշումն անհիմն և ապօրինի է, քանի որ, ըստ իրեն, նյութերի նախապատրաստման ընթացքում չեն իրականացվել իրավական գնահատական տալու համար անհրաժեշտ դեպքի հանգամանքները լրիվ, ամբողջական և բազմակողմանի վերհանելուն ուղղված նվազագույն ստուգողական գործողությունները։ 

Հեղինակ` Միլենա Խաչիկյան