Փաստ ինֆո

Վրաստանի գլխավոր դատախազությունը Թբիլիսիի խորհրդարանի շենքի դիմաց անկարգությունների կազմակերպման փաստով քննություն է սկսել նախկին իշխանության «միասնական ազգային շարժում» կուսակցության առաջնորդ, պատգամավոր Նիկանոր Մելիայի դեմ:

«Սկսված նախաքննության շրջանակներում Նիկանոր Մելիան կհարցաքննվի խմբային բռնության կազմակերպման և կառավարման հատկանիշների փաստերով, որոնք նախատեսված են քրեական օրենսգրքով», - ասվել է դատախազության հաղորդագրության մեջ:

Չորեքշաբթի օրը պատգամավոր Մելիան կանչված է դատախազություն՝ նրան մեղադրանք ներկայացնելու համար:

Հունիսի 20-ին Թբիլիսիում տեղի են ունեցել անկարգություններ: Խափանվել էր ուղղափառության միջխորհրդարանական վեհաժողովի նիստը այն պատճառով, որ այնտեղ մասնակցել է ռուսական պատվիրակությունը: Հատկապես վրացի քաղաքական գործիչները վրդովված էին, որ ասամբլեայի նախագահ Սերգեյ Գավրիլովը նստել է խորհրդարանի նախագահի աթոռին: Ռուսները ստիպված են եղել լքել շենքը:

Հակառուսական կարգախոսներով բողոքողները փորձել են գրոհել խորհրդարանի շենքը, սակայն հետ են մղվել իրավապահ ուժերի կողմից: Ոստիկանությունը ցուցարարների դեմ օգտագործել է ջրցան մեքենաներ, ակուստիկ թնդանոթ, ռետինե փամփուշտներ և արցունքաբեր գազ: Վրաստանի առողջապահության նախարարության տվյալներով, բախումների արդյունքում 240 մարդ վիրավորվել է, այդ թվում` 80 ոստիկան, իսկ հանրապետության ներքին գործերի նախարարությունը հայտարարել է, որ բողոքի ցույցի ժամանակ ձերբակալվել է 305 հոգի:

Աղբյուր` Փաստինֆո