Փաստ ինֆո

«Սահմանադրական դատարանն իրավունքի դատարան է, եւ եռաստիճան դատական համակարգից կախվածության մեջ չի գտնվում, այսինքն՝ ՍԴ որոշման կայացումը չի կարող կախվածության մեջ գտնվել Վերաքննիչից»,- «Փաստինֆո»-ի հետ զրույցում այս կարծիքը հայտնեց «Մարտի 1»-ի գործով մեղադրյալ Արմեն Գեւորգյանի պաշտպան Էրիկ Ալեքսանյանը. «Եթե ՍԴ-ն տեսնում է որեւէ նորմի հետ կապված սահմանադրականության խնդիր, ապա ինքը իր որոշումը կկայացնի՝ անկախ այն հանգամանքից, թե Առաջին ատյանում, Վերաքննիչում կամ Վճռաբեկում գործի վերաբերյալ ինչպիսի ընթացք է գնում»,-ասաց նա։

Մեր այն հարցին, թե Վերաքննիչի կողմից բողոքների բավարարումը որքանո՞վ ողջամիտ կլինի այն համատեքստում, որ ՍԴ-ն, օրերս վարույթ ընդունելով Ռոբերտ Քոչարյանի դիմումներից երեքը, գտել է, որ այդտեղ կա օրենքի մեկնաբանման խնդիր, Էրիկ Ալեքսանյանը մատնանշեց Վճռաբեկ դատարանի մի նախադեպային որոշում. «Ըստ այդ նախադեպային որոշման՝ եթե քրեական գործն արդեն գտնվում է դատարանում, եւ քննարկվում է հարկադրանքի միջոցի կիրառման, փոփոխման կամ վերացման հարցը, Առաջին ատյանի յուրաքանչյուր որոշում հետագայում դատական վերահսկողության առարկա դարձնելիս կանգնում ենք իրավական փակուղու մեջ: Ստացվում է, որ Վերաքննիչ դատարանը, մայր քրեական գործը քննող դատարանի կայացրած որոշման ստուգման արդյունքում յուրաքանչյուր նոր որոշում կայացնելով, փաստացի միջամտում է մայր քրեական գործին։ Այս դեպքում ես կարծում եմ, որ եթե պրն Դանիելյանի որոշումը լինի բացասական պաշտպանական կողմի համար, այսինքն՝ եթե նա վերացնի անձնական երաշխավորությամբ խափանման միջոցի փոփոխման որոշումը, ապա միջամտություն կանի մայր քրեական գործին։ Ուստի գտնում եմ, որ վերադառնալով խորհրդակցական սենյակից՝ պրն Դանիելյանը պետք է ուղղակի մերժի այս բողոքը»։

Ինչ վերաբերում է կասեցման որոշման բեկանմանը, պաշտպանը գտնում է, որ դրա համար հիմքեր չկան. «Ճիշտ է, ես ի սկզբանե հայտարարել եմ, որ այս որոշումը բողոքարկման ենթակա եւ մնում եմ այդ նույն կարծիքին, բայց ինչ վերաբերում է դատարանի որոշմանը, ապա այն խորապես ուսումնասիրելով ՝մենք կտեսնենք, որ դատարանը շատ հանգամանալից հիմնավորել է,  թե ինչու է ինքն ասում, որ կա հիմնավոր կասկած՝ կապված 300.1 հոդվածի սահմանադրականության հետ։ Մենք ի սկզբանե ասել ենք, որ այդ հոդվածը անորոշ է, իսկ եթե մի օրենք ունի որոշակիության խնդիր, դրանով անձը չի կարող ենթարկվել քրեական պատասխանատվության, որովհետեւ այդ նորմի դեմ պաշտպանական կողմը պետք է կարողանա պաշաճ պայքարել եւ ներկայացնել իր դիրքորոշումը, բայց եթե մեզ համար այդ նորմը անորոշ է, մենք ինչպե՞ս պաշտպանվենք»։

Էրիկ Ալեքսանյանը հիշեցրեց՝ առաջին հարցը, որ իրենց համար անորոշ է եղել, 300.1 հոդվածի դիսպոզիցիայում առկա նորմի վերացում-դադարեցում հասկացությունն է. «Դա ի՞նչ է նշանակում. արդյո՞ք դադարեցում-վերացումը կարող ենք նույնացնել խախտման հետ։ Դատախազությունը, ի դեպ, նույնացնում է այդ հասկացությունները, բայց դա իրենց մեկնաբանությունն է, մենք այլ կերպ ենք մեկնաբանում, եւ գտնում նք, որ դրանք նույնական չեն, եւ խնդիրն այստեղ է. եթե կա երկու մեկնաբանություն, այդ անորոշությունը պետք է վերացնի ՍԴ-ն»:

Անդրադառնալով Վերաքննիչ քրեական դատարանում պաշտպանական կողմի առարկությունները ամբողջությամբ ներկայացնելու հնարավորությունից զրկված լինելուն՝ Էրիկ Ալեքսանյանն ասաց, որ դա աննախադեպ որոշում էր դատավոր Արմեն Դանիելյանի կողմից. «Առարկություն չներկայացնելը, չթույլատրելը միջնորդություն ներկայացնել ուղղակի օրենքի կոպտագույն խախտում Է, որովհետեւ պաշտպանական կողմը զրկված է եղել լսվելու իրավունքից, ինչը արդար դատաքննության իրավունքի ապահովման տարր է, եւ ես գտնում եմ, որ այստեղ կա լուրջ խնդիր»։

Ինչ վերաբերում է այս դատավարությանը իրենց ներկա չգտնվելուն, Էրիկ Ալեքսանյանն ընդգծեց, որ  իրենց մասնակցությունը հայեցողական իրավունք է, եւ իրենք օգտվել են բացառապես հայեցողական իրավունքից. «Ես հետեւել եմ ամբողջ  դատավարությանը, եւ կարող եմ ասել, որ իմ փաստաբան գործընկերները կատարել են առավելագույնը, իմ բացակայությունն այդքան էլ չի զգացվել, որովհետեւ նրանք շատ հանգամանալից ներկայացրել են իրենց փաստարկները՝ կապված թե բողոքաբերների փաստարկների հետ, թե ինքնաբացարկի, ուստի ես միանում եմ նրանց բոլոր փաստարկներին»,- մեզ հետ զրույցում ասաց պաշտպան Էրիկ Ալեքսանյանը:

Հիշեցնենք՝ Արմեն Գեւորգյանը մեղադրվում է ՀՀ քրեական օրենսգրքի 38-300.1-րդ հոդվածի 1-ին մասով, 311-րդ հոդվածի 4-րդ մասի 2-րդ կետով եւ 190-րդ հոդվածի 3-րդ մասի 1-ին կետով` ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու եւ հանցավոր ճանապարհով ստացված գույքն օրինականացնելու մեջ:

Հեղինակ` Միլենա Խաչիկյան