Փաստ ինֆո

«Վահե Գրիգորյանի հայտարարությունը, որ հնչել է ԱԺ ամբիոնից, ես դիտարկում եմ որպես քաղաքական հայտարարություն, որին որեւէ իրավաբանական մեկնաբանություն չեմ կարող տալ»,-«Փաստինֆո»-ի հետ զրույցում այս կարծիքը հայտնեց փաստաբան Էրիկ Ալեքսանյանը՝ անդրադառնալով ՍԴ նորընտիր դատավոր Վահե Գրիգորյանի՝ օրերս արած հայտարարությանը։

Հիշեցնենք, որ Վահե Գրիգորյանը հունիսի 20-ին մինչ ՍԴ դատավորի երդման տեքստն ասելը հայտարարել էր, որ Սահմանադրական դատարան մուտք գործելիս որպես Սահմանադրական դատարանում միակ դատավոր, որովհետև մյուս դատավորը այս օրերին բացակայում է, ինքը ստանձնելու է Սահամանադրական դատարանի նախագահի լիազորությունների և պարտականությունների կատարումը. «Սահմանադրական դատարանում այս երդումը տալու պահից լինելու է երկու դատավոր։ Սահմանադրական դատարանի քվորումը պահանջում է առնվազն 5 դատավոր՝ որոշումներ կայացնելու համար, իսկ Սահմանադրության 166-րդ և 170-րդ հոդվածների պահանջով Սահմանադրական դատարանը կազմված է բացառապես դատավորներից և որոշումների կայացմանը մասնակցում են բացառապես դատավորները, մինչդեռ Սահմանադրական դատարանը անցած մեկ տարվա ընթացքում իներցիայի ուժով գործել է Սահմանադրական դատարանի անդամների կողմից որոշումների կայացման խնդրահարույց պրակտիկայով»,-ասել էր նա։

Անդրադառնալով դատավոր եւ անդամ հասկացությանը՝ Էրիկ Ալեքսանյանը նշեց, որ նախկին Սահմանադրությամբ եղել է անդամ հասկացությունը, նորով՝ դատավոր, սակայն ըստ իրեն՝ հին անդամների վրա եւս այդ նոր հասկացությունը պետք է անդրադառնա. «Եթե ուսումնասիրենք Սահմանադրության այլ նորմեր, օրինակ, կապված Կառավարության անդամների եւ նախարարների հետ, կտեսնենք, որ մի դեպքում նշվում են Կառավարության անդամներ, մյուս դեպքում՝ նախարարներ. հիմա իրենք նախարա՞ր են թե՞ Կառավարության անդամ։ Ես գտնում եմ, որ բովանդակային առումով դրանք նույնանման հասկացություններ են, հետեւաբար ՍԴ հին անդամների վրա եւս պետք է տարածվի նոր հասկացությունը»։

Անդրադառնալով այն հանգամանքին, որ երեկ ՍԴ-ն վարույթ է ընդունել Ռոբերտ Քոչարյանի դիմումներից երեքը, Էրիկ Ալեքսանյանն ասաց, որ ճիշտ կլինի՝ Վահե Գրիգորյանը դրանց քննությանը չմասնակցի. «Սահմանադրական օրենքով ՍԴ-ում ինքնաբացարկի ընթացակարգ չկա, բայց, օրինակ, եվրոպական երկրներում եթե որեւէ դիմումի քննությանը դատավորներից մեկը ունի կողմնակալ վերաբերմունք եւ այդ դիմումի քննության ժամանակ չի կարող անաչառ լինել, սովորաբար նա դիմումի քննությանը ներկա չի լինում, այսինքն՝ պրակտիկա է ձեւավորված, որ նա չի  գալիս եւ քննությանը չի մասնակցում, եւ թեեւ այդ ժամանակ ՍԴ կազմը համալրված չէ, բայց միեւնույնն է, դիմումի քննությունը իրականացվում է»։

Ըստ փաստաբանի՝ ՀՀ-ում եւս կարող է նման պրակտիկա ձեւավորվել. «Ես տեսել եմ մամուլով, որ Վահե Գրիգորյանը հայտարարել է, որ չի մասնակցելու ՍԴ-ում «Մարտի 1»-ի գործով դիմումի քննությանը, սակայն չեմ կարող մեկնաբանել, թե դրա ենթատեքստը որն է. չի մասնակցելու ֆիզիկապե՞ս թե՞ նկատի ունի, որ նոր ՍԴ կազմ է լինելու։ Ամեն դեպքում, կարծում եմ, որ ամենաողջամիտ ճանապարհը կլինի այն, որ ՍԴ ներկայիս կազմով այդ դիմումի քննությանը Վահե Գրիգորյանն ուղղակի չներկայանա»,-մեզ հետ զրույցում ասաց Էրիկ Ալեքսանյանը։

Հիշեցնենք, որ մինչ ՍԴ դատավոր ընտրվելը Վահե Գրիգորյանը եղել է «Մարտի 1»-ի գործով տուժողների իրավահաջորդների ներկայացուցիչ։

Հեղինակ` Միլենա Խաչիկյան