Փաստ ինֆո

Վերջին շրջանում մեր լեզվամշակույթ շատ սահուն կերպով մտավ «վեթինգ» բառը և տևական ժամանակ բոլորս խոսում ենք վեթինգից, բայց պարզ չէ, թե ինչ գործիքներով եւ ինչպես է այն իրականացվելու։ Այսօր Ազգային ժողովում հայտարարեց ‹‹Բարգավաճ Հայաստան›› խմբակցության պատգամավոր Նաիրա Զոհրաբյանը։

‹‹Մենք բոլորս խոսում ենք մի գործընթացի մասին, որից մեծ առումով, ըստ էության տեղեկություն չունենք, տպավորություն է, որ այս վեթինգը գոդոյի նման մի բան է, որի մասին բոլորը լսել են, որին բոլորը սպասում են, բայց որին որևէ մեկը չի տեսել››,-ասաց ԲՀԿ պատգամավորը:

Զոհրաբյանի խոսքով, որևէ կերպ չի հաջողվում ԱԺ մեծամասնությունից ստանալ օրենքի գոնե նախնական նախագիծը:

‹‹Կարող ենք անել եզրակացություն, որ կամ այդ նախագիծն այստեղ չի գրվում, կամ գրվում է այնտեղ, որտեղից մենք ակնկալում ենք ստանալ այն գումարները, որոնք պիտի տրվեն դատավորներին, որպեսզի նրանք այլևս չլինեն կաշառակեր››,-ասաց ԲՀԿ պատգամավորը:

Զոհրաբյանն ընդգծեց, որ իր ողջախոհ կասկածները, որ վեթինգի նախագիծն ԱԺ-ում չի գրվում կարծես թե հաստատվում է:

‹‹Այն, որ մեր դատաիրավական համակարգն այլասերված է, դա փաստ է. մեզ օդի պես անհրաժեշտ է փոխել այլասերված դատաիրավական համակարգը: Որքան կարևոր է այն փոխելը, նույնքան կարևոր է, թե ինչ գործիքներով, մեխանիզմներով այդ գործընթացն իրականացվելու։ Եթե այդ գործընթացում լինելու են քաղաքական նրբերանգներ, ենթատեքստեր, ապա ունենալու ենք շատ վատ արդունք, ինչպիսին եղավ Ռուանդայում, որտեղ իրականացվել է վեթինգ, որտեղ ներքին ցեղասպանություն է տեղի ունեցել եւ որտեղ քաղաքական վենդետաներ են իրականացվել իրավական գործընթացների փոխարեն››,-ասաց ԲՀԿ պատգամավոր Նաիրա Զոհրաբյանը:

Մանրամասները՝ տեսանյութում:

Աղբյուր` Փաստինֆո