Փաստ ինֆո

«Մեզ համար անհասկանալի էր, թե ինչպես իրար հետ կապ չունեցող կամ աննշան կապ ունեցող բողոքները սկսեցին քննվել մի վարույթում»,- այսօր հրավիրված ասուլիսին այս կարծիքը հայտնեց Ռոբերտ Քոչարյանի պաշտպան Հովհաննես Խուդոյանը։

Անդրադառնալով Վերաքննիչ դատարանի երեկվա որոշմանը, որով ավարտվեց բողոքների քննությունը, Խուդոյանն ասաց, որ բողոքներից մեկի՝ խափանման միջոցի հարցի քննարկում առհասարակ տեղի չի ունեցել. «Դատախազությունը ներկայացրել է իր դիրքորոշումը, սակայն դատարանը զրկել է մեղադրյալին իր ազատության վերաբերյալ հարցի քննարկմանը մասնակցություն ունենալուց, ինչով խախտել է թե մեղադրյալի կոնվենցիոն իրավունքը,  թե քրեական դատավարությունում մրցակցության սկզբունքը»։

Ըստ Խուդոյանի՝ ոչ ինքը, ոչ իր գործընկերները նման դեպք հայկական քրեական դատավարությունում չեն կարողացել մտաբերել. «Սա ծայրահեղ խայտառակ քայլ էր, որը լուրջ հետեւանքներ է ունենալու մեր դատական համակարգի համար»։

Հովհաննես Խուդոյանն ընգծեց, որ ՍԴ դիմելու որոշման բողոքարկման ենթակա չլինելը միայն պաշտպանական կողմի դիրքորոշումը չէ. «Դատավոր Իշխան Բարսեղյանի գործով պաշտպանները դիմել էին Վերաքննիչ քրեական դատարան՝ բողոքարկելով Առաջին ատյանի կողմից ՍԴ չդիմելու խնդիրը։ Վերաքննիչ դատարանը արձանագրել էր, որ այո, թեւ գործի կասեցումը կարող է բողոքարկվել, սակայն ՍԴ դիմել-չդիմելու հարցը դատավորի հայեցողության հարցն է, եւ որեւէ դատական ատյան չի կարող ասել՝ դատարանը կարող է կասկած ունենալ թե ոչ»։

Պաշտպանի կարծիքով՝ Ընդհանուր իրավասության դատարանը ճիշտ է կողմնորոշվել, եւ հիմնավորված կասկածներ ունենալով՝ դիմել է ՍԴ. «Նախկինում գործող հոդվածը իրավական որոշակիության հետ խնդիր է ունեցել։ Դրա հիմնավորումն այն է, որ ԱԺ-ն փոփոխել է այդ օրենքը՝ դրա հիմքում դնելով այն, որ փոփոխում է իրավական որոշակիության խնդիրը լուծելու համար, այսինքնն՝ ՀՀ խորհրդարանն ինքը պաշտոնապես արձանագրել է, որ օրենքը որոշակիության հետ խնդիր ունի, եւ միայն սա բավարար է այդ հոդվածի որոշակիությունը կասկածի տակ դնելու համար»։

Պաշտպանը հիշեցրեց, որ սրան ի պատասխան Դատախազությունը ներկայացրել է ԱԺ իրավական վերլուծության ինչ-որ բաժնի խորհրդատվության մակարդակով վերլուծություն, որը պնդում է, թե նման խնդիր չկա. «Բայց երբ դատարանը իր ձեռքի տակ ունենում է երկու իրարամերժ կարծիք, դրան գումարած՝ այն ժամանակ եվրոպական խորհրդարանի զեկուղոց Թովմաս Համերբերգի կարծիքը, որը մեր դիրքորոշումն է արտահայտում, առնվազն կասկած առաջանում է, եւ պարզ է, որ որեւէ դատարան չի կարող դա անտեսել»։

Աղբյուր` Փաստինֆո