Փաստ ինֆո

Միջազգային իրավունքի մասնագետ Արա Ղազարյանը, ԳԱԼԱ-ի հետ զրույցում անդրադառնալով Սահմանադրական դատարանի շուրջ ստեղծված իրավիճակին, նշեց, որ Սահմանադրական դատարանի նախագահը շարունակում է մնալ Հրայր Թովմասյանը, Վահե Գրիգորյանը չի կարող նախագահ լինել, որովհետև օրենքն արգելում է.

«Չկա օրենք, որը Վահե Գրիգորյանին այս պահին դարձնի Սահմանադրական դատարանի նախագահ, իրավիճակը կարգավորվում է Սահմանադրության անցումային դրույթով՝ 213-րդ հոդվածով, որը հստակորեն սահմանել է, որ ՍԴ բոլոր այն դատավորները, ովքեր ընտրվել են որպես ՍԴ անդամ մինչև 2018 թվականի ապրիլը, շարունակելու են պաշտոնավարել այնպես, ինչպես սահմանված է նախկին սահմանադրությամբ, այսինքն՝ մինչև 70 տարեկան դառնալը»:

Արա Ղազարյանի մեկնաբանությամբ՝ անդամ, թե դատավոր՝ կապ չունի, պետք է նայել դրա բովանդակությանը, իսկ բովանդակությունն այն է, որ այդ մարդիկ գործել են որպես դատավորներ և վեճերը քննել են որպես դատավորներ, հետևաբար՝ ի՞նչ տարբերություն՝ մենք նրանց կոչում ենք անդամներ, թե դատավորներ.

«Օրինակ՝ Մարդու իրավունքների կոմիտեն ՄԱԿ-ի համակարգում գտնվող դատական մարմիններից մեկն է, ֆորմալ առումով կոչվում է կոմիտե, բայց վեճերը քննում է դատավարական եղանակով և վաղուց դարձել է դատարան, հիմա արդեն էական չէ, որ կոմիտե է կոչվում: Ես գանգատ գրելուց գիտեմ, որ դիմում եմ դատարան, և Եվրոպական դատարանը կմերժի իմ գանգատը, եթե իմանա, որ ես Մարդու իրավունքների կոմիտե դիմել եմ, որովհետև Եվրոպական դատարանի համար դա ատյան է»:

Սահմանադրագետի խոսքերով՝ մինչև հիմա կանխատեսելի է եղել, որ Սահմանադրական դատարանի դատավորները շարունակելու են պաշտոնավարել մինչև 70 տարեկան դառնալը, մեկ իրավաբանի մեկնաբանությունը որևէ բան չի փոխում, որովհետև մենք ունենք օրենք, իսկ մենք օրենքի գերակայության երկիր ենք մեզ հռչակել:

«Վահե Գրիգորյանի հայտարարությունը չի բխում Սահմանադրությունից, չի բխում օրենքներից, հետևաբար դա պետք է ընդունել որպես արտահայտվելու ազատության իրավունքի դրսևորում ԱԺ ամբիոնից»,- նշեց Արա Ղազարյանը:

Աղբյուր` Փաստինֆո