Փաստ ինֆո

«Արմեն Դանիելյանի՝ որպես դատավոր գործունեությանը գնահատական տալը մի տեսակ անշնորհակալ գործ է, որովհետեւ տարիների ընթացքում այդ գնահատականը տված-ավարտված է, եւ կարծում եմ, որ փաստաբաններն այս հարցում ունեն լիակատար միասնական դիրքորոշում, որը համապատասխանաբար արտահայտված է նաեւ հրապարակային հարթակում»,- «Փաստինֆո»-ի հետ զրույցում այս կարծիքը հայտնեց փաստաբան Երվանդ Վարոսյանը՝ անդրադառնալով Քոչարյանի եւ մյուսների գործով երեկ կայացած դատական նիստին։

Երվանդ Վարոսյանի խոսքով՝ նախագահող դատավորի պարագայում ամեն ինչ սպասելի էր, եւ ամեն ինչ կարող է տեղի ունենալ. «Կոնկրետ երեկվա իր գործողությունները իրավական տեսակետից մեկնաբանման ենթակա էլ չեն, միայն ինքը կիմանա, թե ինչ նկատի ուներ, ինչ էր ուզում դրանով ասել կամ էլ եթե այն տեքստը, որ դրված էր իր սեղանին, հեղինակել էր ուրիշը, ապա այդ հեղինակը կարող է դրան բացատրություն տալ»։

Վարոսյանը էական համարեց դատավորի կողմից որոշումը կարդալը. «Եթե դա ինքնաբուխ կերպով լիներ, գուցե հնարավոր լիներ այլ գնահատան տալ դրան, բայց դատավորի գործողությունները որեւէ տրամաբանության մեջ չեն տեղավորվում։ Թե որն է դրանց շարժառիթը, դժվար է ասել, համենայն դեպս, նրա գործունեությունը միշտ եղել է պատկերավոր ասած դատախազական գործուենություն դատական համակարգում»։

Երվանդ Վարոսյանն ընդգծեց, որ առարկություններն ունկնդրելու գործընթացը այդպես էլ չսկսվեց. «Քոչարյանի պաշտպանները Առաջին ատյանի դատարանում գրեթե երկու օր ներկայացնում էին իրենց փաստարկները, ակնհայտ է, որ նրանք ստիպված էին լինելու առնվազն նույն չափով փաստարկներ ներկայացնել Վերաքննիչ դատարանում, բայց այդ պրոցեսն անգամ չսկսվեց»։

Հարցին՝ հնարավոր համարո՞ւմ է, որ դատավորը կբավարարի գործով ներկայացված բողոքները, փաստաբանն ասաց. «Ես գրեթե համոզված եմ, որ այդպես կլինի»։

Ըստ նրա՝ խնդիրը Քոչարյանի կամ ուրիշ մեկի գործի մեջ չէ. «Այս դատավորի գործունեությունը իմ փաստաբանական տասը տարվա գործունեության ընթացքում մշտապես կայացել է Դատախազության բողոքները բավարարելու մեջ, հիմա ինչու՞ պետք է փոխվի»,-մեզ հետ զրույցում ասաց Երվանդ Վարոսյանը։

Հեղինակ` Միլենա Խաչիկյան