Փաստ ինֆո

‹‹Կարծում եմ՝ դատական ակտում դատարանը կպատճառաբանի իր կողմից կայացված դատական ակտը, մենք նման դիրքորոշում չէինք հայտնել»,- ‹‹Փաստինֆո››-ի հաղորդմամբ` Վերաքննիչ քրեական դատարանում այս մասին քիչ առաջ հայտարարեց Երեւան քաղաքի դատախազ Գեւորգ Բաղդասարյանը։
Անդրադառնալով դատավոր Դանիելյանի դիրքորոշմանը, ըստ որի բողոքի քննությունն ավարտվեց, եւ դատավորը հեռացավ խորհրդակցական սենյակ՝ Գեւորգ Բաղդասարյանն ասաց, որ այն իրենց համար սպասելի չէր։

Բաղդասարյանն ընդգծեց, որ պաշտպանության կողմի տարբեր ներկայացուցիչներ որոշումից հետո տարբեր հայտարարություններ էին անում․ ‹‹Եղան պաշտպաններ, ովքեր մեզ շնորհավորեցին, եղան պաշտպաններ, ովքեր արտահայտեցին իրենց տեսածը, որ դատարանի խորհրդակցական սենյակ հեռանալը մեզ համար էլ սպասելի չէր, եղավ եւ պաշտպան, ով հայտարարեց, թե մեզ համար էլ որոշակի չէ, թե ինչ դատական ակտ է կայացվելու, այսինքն՝ պաշտանական կողմը մի կողմից հայտարարում է, որ գիտենք, թե ինչ դատական ակտ է կայացվելու, մյուս կողմից՝ թե չգիտենք»։

Լրագրողի դիտարկմանը, թե բողոքի քննություն ըստ էության տեղի չունեցավ, Երեւան քաղաքի դատախազը չհամաձայնեց․ ‹‹Մենք ներկայացրել ենք մեր բողոքները, ինչի վերաբերյալ պատասխան հայտարարություններով են հանդես եկել պաշտպանության կողմի առանձին ներկայացուցիչներ, դրանից հետո ներկայացված միջնորդության կապակցությամբ եւ պաշտպանական կողմի որոշակի վարքագծից դատարանը եկավ եզրահանգման եւ հայտարարեց այն, ինչը ես էլ ձեր պես լսեցի»։

Ի պատասխան հարցին՝ արդյո՞ք այս որոշումը ձեռնտու էր իրենց, Գեւորգ Բաղդասարյանն ասաց․ ‹‹Մեզ ձեռնտու են բոլոր օրինական ակտերը, ձեռնտու է այն, ինչը մենք մեր բողոքներում ներկայացրել ենք»։

Անդրադառնալով Սեդա Սաֆարյանի այն հայտարարությանը, թե ըստ գործում առկա տեղեկությունների՝ գաղտնի շտաբը գործել է Գլխավոր դատախազության շենքում, Գեւորգ Բաղդասարյանն ասաց, որ իրեն նման տեղեկություններ հայտնի չեն, եւ ինքը չի կարող ասել՝ գործում առկա են նման տեղեկություններ թե ոչ։
Անդրադառնալով Սաֆարյանի մյուս հայտարարությանը, թե հնարավոր է, որ Բակո Սահակյանն ու Արկադի Ղուկասյանը սույն գործով այլ կարգավիճակ ունենան, Գեւորգ Բաղդասարյանը չցանկացավ նշել՝ արդյո՞ք նրանք այս գործով հարցաքննվել են թե ոչ, սակայն ասաց, որ այդ հարցը քննարկման առարկա է դարձել Ընդհանուր իրավասության դատարանում գործի քննության ժամանակ։

Ի պատասխան հարցին, թե համաձա՞յն են դատարանի այն ձեւակերպմանը, որ պաշտպանական կողմը գործը ձգձգելու միտում ունի, Բաղդասարյանն ասաց․ ‹‹Այդպիսի վարքագիծ ակհայտ է եղել, մենք այդ մասին բազմիցս ենք խոսել»։

Որպես օրինակ Բաղդասարյանը հիշատակեց այն, որ Ռոբերտ Քոչարյանի պաշտպանը դատարանի դահլիճում անդրադաձավ տուժողի ներկայացուցչի՝ մամուլով հրապարակված բաց նամակին․ ‹‹Պաշտպանը փորձում էր քննարկման առարկա դարձնել տուժողի ներկայացուցիչներից մեկի դատական նիստին ներկա լինելու, նրա ծանուցումը ստացած լինել-չլինելու հարցը այն դեպքում, երբ նա, կարծում եմ, լիազորված էլ չէ այդ հարցը քննարկման առարկա դարձնել։ Այսինքն՝ պաշտպանական կողմը իրեն տրված բողոքի կապակցությամբ դիրքորոշում արտահայտելու հնարավորությունից օգտվելու փոխարեն սկսել է բարձրացնել հարց, թե զլմ-ներում տեսել է տուժողի ներկայացուցչի բաց նամակ, ինչի վերաբերյալ դատարանից պարզաբանում է պահանջել՝ խնդրելով քննարկման առարկա դարձնել այդ անձը ի վերջո ծանուցվել է թե ոչ»։

Պատասխանելով հարցին՝ արդարադատության շահը ավելի շատ կտուժեր, եթե դատական նիստերը ձգձգվեին թե՞ եթե մեղադրյալի պաշտպանները զրկվեին արտահայտվելու իրավունքից, Գեւորգ Բաղդասարյանն ասաց, որ դատարանի կողմից հայտարարված դիրքորոշման կապակցությամբ պարզաբանում չի ցանկանում տալ։

Գեւորգ Բաղդասարյանը հայտնեց նաեւ, որ բողոքների մերժման դեպքում դատական ակտը կբողոքարկեն։

Հեղինակ` Միլենա Խաչիկյան