Փաստ ինֆո

«Միայն այն հանգամանքը, որ իմ պաշտպանյալ Յուրի Խաչատուրովը հանդիսացել է Երեւանի կայազորի պետ, հիմք է տվել նրան մեղադրանք առաջադրել»,- ‹‹Փաստինֆո››-ի հաղորդմամբ` Վերաքննիչ քրեական դատարանում այս մասին քիչ առաջ հայտարարեց «Մարտի 1»-ի գործով մեղադրյալ Յուրի Խաչատուրովի պաշտպան Միհրան Պողոսյանը․ «Եթե վերջինիս մեղքը միայն այն է, որ նա հանդիսացել է կայազորի պետ, ապա ինչո՞վ է պայմանավորված ՀՔԾ բարյացակամ վերաբերմունքը, ո՞ւր են այս գործով պայմանականորեն ասած 5 կամ 15 հազար  զինվորները, ինչու՞ դատավարական կարգավիճակ չունեն, չէ՞ որ նրանք եւս կատարել են որոշակի գործողություններ»,-ասաց պաշտպանը։

Վերջինս հիշատակեց մեղադրանքի այն հատվածը, ըստ որի՝ զինվորականների ներգրավումը այդ իրադարձություններին եղել է անօրինական․«Այսինքն՝ նրանք ներգրավվել են, ուրեմն՝ ինչո՞ւ պատասխանատվության չեն ենթարկվում»։

Միհրան Պողոսյանի խոսքով՝  2018 թվականի հուլիսին տեղի ունեցած իրադարձություններից կարճ ժամանակ անց ՀՔԾ-ն հաղորդագրություն տարածեց՝ նշելով, որ հարուցվել է քրեական գործ, որը միացվել է ՀՔԾ-ում արդեն տասնմեկ տարի քննվող քրեական գործին․«Այս ընթացքում իմ պաշտպանյալը որպես վկա հարցաքննության է հրավիրվել եւ նույն պահին նրան որպես մեղադրյալ ներգրավվելու մասին որոշում է ներկայացվել՝ որպես խափանման միջոց ընտրելով կալանավորումը, միաժամանակ թույլ տալով կիրառել այլընտրանքային խափանման միջոցը։ Ես բողոքարկել եմ թե Վերաքննիչ, թե Վճռական դատարանների որոշումները իրավական այն հիմնավորումներով, որ այս պայմաններում Յուրի Խաչատուրովի նկատմամբ չի կարող կիրառվել կալանավորումը որպես խափանման միջոց։ Ընդ որում, Գլխավոր դատախազությունը այս որոշումը երբեւէ չի բողոքարկել»։

Պաշտպանը նշեց, որ սույն գործով քննության ժամանակ բազմիցս բարձրացրել է մի շարք իրավական հարցեր, այդ թվում այն, որ ոչ ոք չի կարող դատապարտվել այնպիսի գործողության կամ անգործության համար, որը կատարման պահին հանցագործություն լինել չի կարող․«Խաչատուրովին մեղսագրվում է 2008 թվականի ընթացքում ենթադրաբար արված գործողություններ, սակայն նրան մեղադրանք է առաջադրվել 2009 թվականի մարտին ուժի մեջ մտած նոր օրենքով, եւ Ընդհանուր իրավասության դատարանը իր 2018 թվականի հունիսի որոշման մեջ այս հանգամանքին ուշադրություն չի դարձրել, բայց եւ արձանագրել է, որ վարույթն իրականացնող մարմնի ներկայացված նյութերը ոչ թե հաստատում են նրան ներկայացված մեղադրանքի հիմնավոր կասկածի առկայությունը, այլ փաստում, որ ներկայացվել են բավարար տեղեկություններ եւ փաստեր, որոնք հիմք են տալիս եզրակացնելու, որ առկա Է մեղադրյալ Խաչատուրովի առնչությունը քրեական օրենսգրքով սահմանված հանցագործության արարքի կատարմանը»։

Միհրան Պողոսյանը պնդեց՝ առկա են փաստական տվյալներ հենց այս պահին քրեական հետապնդումը դադարեցնելու համար․ «Պնդում եմ, որ սույն գործով որոշում կայացնելիս դուք չեք հանդիսանալու օրենքի հիման վրա ստեղծված դատարան, քանի որ այս բողոքները անօրինական կարգով են միացվել եւ քննվում։ Ավելին, պնդում եմ, որ կասեցնելու դեմ բողոքները ենթակա չեն նույնիսկ վարույթ ընդունելու, քանի որ դրանց վերաբերյալ իրավական կարգավորումները թույլ են տալիս բողոքարկել միայն  մեղադրողների կողմից, իսկ սույն գործով այս փուլի համար նախատեսված մեղադրող դատախազ գոյություն չունի»։

Միհրան Պողոսյանը հայտարարեց նաեւ, որ ինքն անհատական դիմում է ներկայացրել Սահմանադրական դատարան․ «Հաշվի առնելով, որ վերջիվերջո պատասխան չի տրվում, թե խափանման միջոցի կիրառման ժամանակ իմ պաշտպանյալի նկատմամբ կիրառվել է սահմանադրական օրենք թե ոչ՝ ես դիմել եմ Սահմանադրական դատարան՝ մատնանշելով օրենքի որոշակիության,  օրենքին հետադարձ ուժ տալու հարցրերը, որոնք պարզաբանման ենթակա են միայն ՍԴ-ի կողմից»։

Ըստ Միհրան Պողոսյանի՝ այն նվազագույն շրջանակը, որոնց վերաբերյալ դատավորը կարող է որոշում կայացնել, քրեական հետապնդումը դադարեցնելն է կամ գործը մեղադրողին վերադարձնելը։

Հեղինակ` Միլենա Խաչիկյան