Փաստ ինֆո

ԲՀԿ առաջնորդ, ԱԺ պատգամավոր Գագիկ Ծառուկյան-ՀՀ Քննչական կոմիտե փոխհրաձգությունը մի տեսակ վտանգավոր փակուղի է մտնում : Հարցն այն է, թե՝ որքանո՞վ է այս՝ առերևույթ իրավական տիրույթի՝ դեռևս արարողակարգային բնույթի գործողությունը իրավական ենթատեքստ պարունակում:

Բնականաբար, մեկշաբաթյա պատմություն ունեցող ՔԿ-Ծառուկյան՝ վիրտուալ կամ չկայացած երկխոսությունը որոշակի հանգուցալուծում պիտի ստանա՝ հստակեցնելով հարցը՝ քաղաքական, թե՞ իրավական հարթության մեջ է Ծառուկյանի հանդեպ կիրառվող գործընթացը: Հարցի պատասխանն, իհարկե, Ծառուկյանն արդեն իսկ հստակ ունի, ավելին, իրերի և գործընթացների վերլուծությունը որոշակի եզրակացությունների կարող է հանգեցնել նաև տրամաբանությունից ոչ զուրկ յուրաքանչյուր մարդու:

Հենց սկզբից փաստենք, որ Ծառուկյանը իրավապահ համակարգի, այսինքն, հարցաքննվելու հետ կապված խնդիր չունի, պիտի որ չունենա, քանի որ արդեն իսկ ՀՔԾ կանչով Մարտի 1-ի քրեական գործի շրջանակում հարցաքննվել է և այդ առումով մամուլի արձագանքները հայտնի են: Միաժամանակ, այսօր մենք ունենք փաստ /Մանախի գործի քննությունը՝ Շենգավիթի ընդհանուր իրավասության դատարանում/, որ ընդհուպ ներկայիս վարչապետն է վկայի կարգավիճակում գնում դատարանի ծանուցագրով և հարցաքննվում: Այսինքն, մարդը դատակոչված է և գնում է դատարանում ցուցմունք է տալիս:

Ասել է, թե՝ ՔԿ հրավեր-ծանուցագրի հետ կապված թվում է՝ ոչ մի վիրավորական բան չպիտի լիներ՝ բոլորն են հավասար օրենքի առաջ՝ անկախ զբաղեցրած դիրքից ու պաշտոնից, ֆինասնական հնարավորություններից, բայց լրագրողների հարցերին ի պատասխան Գագիկ Ծառուկյանի արտահայտությունները, դրանց տողատակերը արդեն իսկ ինչ-որ բան է նշանակում: Իսկ գուցե ավելի խորքայի՞ն պատճառներ ունի նա: Չէ, դատեք ինքներդ, Ծառուկյանն ի՞նչ գիտի՝ քննիչի հարցերի շրջանակն ինչի վերաբերյալ է, որ փաստաբանի միջոցով, գրավոր ինչ-որ նամակ է ուղարկում եւ ասում, թե բացի հարցազրույցում իր կողմից հնչեցված մտքերից, այլ տեղեկություններ չունի հայտնելու: Եվ հրաժարվելով ՔԿ ներկայանալուց, ինքն, ըստ էության, հենց ՔԿ-ին է լուրջ հարվածի տակ դնում:

Ծառուկյանի «հրաժարիմք»-ը չի՞ նշանակում արդյոք, որ ինքը հստակ գիտի հետհեղափոխական իրավական կառույցների, այս պարագայում՝ ՔԿ ծանուցագրերի ենթատեքստը՝ ընտրական Աբովյանի հետ առերևույթ կապով ձնագնդու էֆեկտ կարող է ստանալ՝ մեծանալով-մեծանալով և վերածվելով քաղաքական առճակատման կոնկրետ ուժերի և կոնկրետ անձանց միջև:

Ընդ որում, նախորդ ողջ շրջանում զգուշավորությամբ աչքի ընկած, առճակատումներից խուսանաված Գագիկ Ծառուկյանը այսօր մի տեսակ շատ ուղղակի «վա-բանկ» է գնում:

Ի վերջո, որքան էլ այսօրվա «տերմինաբանությամբ» ասվի սեփականատեր, իրականում՝ հանձինս Ծառուկյանի մենք գործ ունենք տնտեսական լուրջ գործչի, ԱԺ պատգամավորի և կուսակցապետի, այլ խոսքով՝ հզոր օլիգարխի հետ, որը եթե ասում է՝ չեմ գալիս, հարց է առաջացնում՝ պետությունը կկարողանա՞ բերման ենթարկել նրան քննության համար:

Եվ հետաքրքիր է՝ սա ի սկզբանե, մինչ նրան քննության կանչելը չե՞ն հաշվարկել: Եթե հաշվարկված է ամեն ինչ, ուրեմն, սա չի՞ նշանակում, որ ակնհայտ նրան փորձում են նվաստացնել-ճնշել: Մանավանդ, խնդրո առարկա քրգործի դեպքի վայրում չի եղել նա և իր «հրաժարիմքը» տրամաբանության մեջ է:

Իսկ այս ամենը եթե դիտարկենք երիտքպականների՝ Ծառուկյանին խեղճացած տեսնելու ցանկությունների ֆոնին, եթե համադրենք Երևանի քաղաքապետի՝ որպես կառուցապատող նրա խոշոր ծրագրերը վտանգելու և ընթացք չտալու փաստերին, ապա բնավ էլ անտրամաբանական չէ, որ Ծառուկյանի պատասխանները ՔԿ ծանուցագիր-դատակոչին ավելի շուտ քաղաքական ենթատեքստ ունի: Քանի որ իրավական ասպեկտով դիտարկելու համատեքստում նախադեպը կա, ինքն ավելի վաղ գնացել է հարցաքննության և դա վիրավորական չի համարել:

Հարցը, թե ո՞րն է լինելու Քննչական կոմիտեի հաջորդ քայլը, դեռևս մնում է առկախ:

Հեղինակ` Արթուր Գահնապետյան