Փաստ ինֆո

Կոտայքի մարզի Մայակովսկի՝ նախկին Շահաբ գյուղը մոգական պատմություն է ամփոփում իր մեջ: Բանն այն է, որ կյանքի մի կարճ շրջան՝ 1915 թվականին, Հայոց Մեծ Եղեռնից հետո, Վանից Երևան գաղթելով, շուրջ կես տարի, մոր հետ այս գյուղում կանգ է առել, ապրել և ստեղծագործել աշխարհահռչակ նկարիչ Արշիլ Գորկին՝ Ոստանիկ Մանուկ Ադոյանը: Գյուղացիների մեջ այսօր էլ կան մարդիկ, որ այդ տան տեղը ցույց են տալիս:

Այս թեմայի շուրջ տարիներ առաջ Ալվարդ Պետրոսյանի հետ հարցազրույցում ենք անդրադարձել այն համատեքստում, որ Շահաբի և Մայակովսկու փոխարեն կարելի է ունենալ Ոստանիկ չքնաղ ու հայկական անունով գյուղ, որն ինքնին իր անվամբ և պատմությամբ կարող է հետաքրքիր զբոսաշրջային վայր դառնալ: Հայաստան եկած քանի՜ արվեստասեր զբոսաշրջիկ կարող է այցելել անվանափոխված Ոստանիկ գյուղ՝ իր աչքով տեսնելու, թե Հայաստանում որտեղ է ապրել Արշիլ Գորկին:

Ազգեր կան, որ չեղած պատմություններ են հորինում, իսկ մենք ուղղակի մեր ունեցածը, որ լեգենդի հանգույն է, պիտի կարողանանք իր բոլոր խորհուրդներով ներկայացնել՝ գյուղը դարձնելով զբոսաշրջային կենտրոն:

Արշիլ Գորկու հզոր արվեստն ու Ոստանիկ անունն ինքնին առինքնող են և կարող ենք այդ տարածության մեջ մշակութային հսկայական էներգիա կուտակել։

Այս համատեքստում առաջարկում եմ ՀՀ տարածքային կառավարման և զարգացման նախարարությանը՝ Մայակովսկի գյուղն անվանակոչել Ոստանիկ, իսկ ՀՀ կրթության, գիտության, մշակույթի և սպորտի նախարարությանը՝ գործընթաց սկսել Արշիլ Գորկու ապրած հայաստանյան տունը աշխարհին ներկայացնելու, այն ճանաչելի և գրավիչ դարձնելու առումով:

Ի վերջո, այս առաջարկը, կարծում եմ՝ մտքերի գագաթնաժողովի համապատկերում ևս դիտարկելի կարող է լինել՝ հրավիրելով ինչպես ճարտարապետական շրջանակների, այնպես էլ՝ բիզնես ոլորտի ուշադրությունը` ստեղծելու մի յուրօրինակ Art Village:

Ի դեպ, հրավիրում եմ նաև Երևանի քաղաքապետարանի ուշադրությունը. հանճարեղ նկարիչը Երևանում մի քանի տներում, որոնք մասնագիտական շրջանակներին հայտնի են, ապրել է՝ իր դրոշմը թողնելով դրանց վրա: Ցավոք, դրանցից ոչ-մեկը հանրությանը ներկայացված չէ, հայտնի չէ, նույնիսկ հուշատախտակ չի տեղադրվել, չի երևութականացվել, որ մարդիկ՝ մեր հայրենակիցներն ու զբոսաշրջիկները իմանան:

Վստահ եմ՝ ֆինանսական լուրջ կարողություններ ունեցող արվեստասեր հայեր կլինեն, որ կցանկանան նման ծրագրի մաս կազմել: Ընդ որում, այն, որ Արշիլ Գորկու գեղարվեստական ձևամտածողությունը արևմտյան ժամանակակից արվեստից սերված լինելով՝ իր ստեղծագործությունն ամբողջովին ներթափանցված է հայկական ոգով, շատ ուժգին նոտա է՝ զիլ ու հզոր՝ ոճային առումով՝ չկաշկանդող ծրագիր իրականացնելու համատեքստում:

Հեղինակ՝ Անահիտ Եսայան

Աղբյուր` Փաստինֆո