Փաստ ինֆո

‹‹Ակնհայտ է, որ պաշտպանական կողմը գործը ձգձգելու միտում ունի››,- ‹‹Փաստինֆո››-ի հաղորդմամբ՝ Վերաքննիչ քրեական դատարանում լրագրողների հետ զրույցում այս կարծիքը հայտնեց ՀՀ գլխավոր դատախազ Արթուր Դավթյանը․ ‹‹Դուք նկատում եք պաշտպանական տակտիկայի այդ կազմակերպվածությունը՝ գործի քննության ընթացքում ասուլիսներ հրավիրելու, ամենատարբեր տեղեկատվական հոսքերով բարոյական-հոգեբանական ճնշումներ գործադրելու››,- ասաց նա։

Հարցին, թե որը կարող է լինել ձգձգելու նպատակը, Դավթյանն ասաց, որ ինքը կարող է դրա վերաբերյալ ենթադրություններ անել, որոնք միայն ենթադրություններ կլինեն, ուստի դրանցով լրագրողների հետ չի կիսվի․ ‹‹Բայց միտումն ակնհայտ է․ եթե դուք նկատեցիք, նախորդ նիստը, որ տեւեց շուրջ երկուսուկես ժամ, հարց ու պատասխանի էր վերածվել այն դեպքում, երբ առնվազն պրոֆեսիոնալ իրավաբաններիս համար ակնհայտ է գործի քննության ընթացակարգը։ Յուրաքանչյուրս, դառնալով դատախազ կամ փաստաբան, պետք է իմանանք, թե որ պահին ասելու եւ որ պահին լսելու իրավունք կամ պարտականություն ունենք››,-ասաց Դավթյանը։

Նա հույս հայտնեց, որ նախագահող դատավորը բարոյական եւ հոգեբանական ճնշումներին չի ենթարկվի՝ վստահ լինելով, որ ՀՀ-ում դատավորը պաշտպանված է։

Անդրադառնալով նախորդ դատական նիստի ընթացքում Ռոբերտ Քոչարյանի՝ դատավորին ուղղված այն հորդորին, որ յուրաքանչյուրը պատասխան է տալու իր արարքի համար, Արթուր Դավթյանն ասաց․ ‹‹Ես շատ խորհրդանշական եմ համարում, որ այդպիսի հայտարարություն է անում այսօր մեղադրյալ, իսկ մեղսագրվող հանցանքների պահին ՀՀ նախագահ հանդիսացած անձը։ Ես կարծում եմ, որ սա արդեն իսկ վկայում է բավական լուրջ արդյունքների մասին, եւ կարեւոր է ժողովրդական այն անվիճելի խոսքը, որ այո, ամեն մարդ իր արածի համար պատասխան է տալու, եւ որեւէ պաշտոնյա, ով բարեխղճորեն իր պարտքն է կատարել, անհանգստանալու կարիք չունի››։

Հարցին՝ արդյո՞ք դատավորը հիմա բարեխղճորեն է կատարում իր պարտականությունները, Արթուր Դավթյանը պատասխանեց՝ ասելով, որ եթե դատարանը որեւէ խախտում թույլ տված լիներ, Դատախազությունն իր դիրքորոշումն արտահայտած կլիներ։

Գլխավոր դատախազը նկատեց, որ երեկվա ծավալված քննարկման վերաբերյալ պաշտպանական կողմն այսօր է որոշել ինքնաբացարկ հայտնել․ ‹‹Գուցե հիմա հետ գանք, եւ պարզվի, որ հիմա էլ դատարանի կողմից այդ որոշումը հրապարակելու ձեւն է հիմք հանդիսանում ինքնաբացարկի համար››,- ասաց Դավթյանը։

Հարցին՝ արդյո՞ք Դավթյանը վստահ է, որ Դատախազությունում Երկրորդ նախագահի հետ կապեր չկան, քանի որ շատերի պնդմամբ՝ տեւական ժամանակ Մարտի մեկի գործով Դատախազությունն անգործություն է դրսեւորել, Արթուր Դավթյանը պատասխանեց, որ Դատախազությունն ապացույցներն ըստ էության գնահատող գործառույթ ունեցող մարմին է, այլ ոչ թե ապացույց ձեռք բերող․ ‹‹Մարտի մեկի գործով որ պահին ինչ ապացույց ձեռք է բերվել, դա գնահատվել է››։

Դիրտակմանը, որ ըստ մեղադրանքի՝ Մարտի մեկի գործով քննչական խմբի նախկին ղեկավար Վահագն Հարությունյանը ապացույցները կեղծել է, Դավթյանը պատասխեց․ ‹‹Իսկ դրա մասին Դատախազությունն իմացե՞լ է, այդ փաստը պարզվեց այն ժամանակ, երբ հարուցվեց քրեական գործ››,-ասաց Գլխավոր դատախազը։

Հեղինակ` Միլենա Խաչիկյան