Փաստ ինֆո

‹‹Փաստինֆո››-ի հաղորդմամբ՝ Վերաքննիչ քրեական դատարանում դատավոր Արմեն Դանիելյանի նախագահությամբ մեկնարկեց Ռոբերտ Քոչարյանի եւ մյուսների գործը կասեցնելու եւ ՍԴ ուղարկելու,  ինչպես նաեւ՝ Քոչարյանի խափանման միջոցի փոփոխության դեմ բերված բողոքների քննությունը։

Նշենք, որ առաջին հերթին քննվում են խափանման միջոցի փոփոխման դեմ բերված բողոքները։

Դատախազ Պետրոս Պետրոսյանը հայտարարեց, որ Երեւանի ընդհանուր իրավասության դատարանի՝ դատավոր Դավիթ Գրիգորյանի նախագահությամբ կայացված որոշումը օրինակ, պատճառաբանված եւ հիմնավոր չէ․ ‹‹Քննարկելով սույն գործով մեղադրյալ Ռոբերտ Քոչարյանի խափանման միջոցի հարցը եւ փոփոխելով այն՝ Ընդհանուր իրավասության դատարանը թույլ է տվել դատական սխալ եւ այնպիսի խախտումներ, որոնք ազդել են գործի ելքի վրա։ Դատարանը, քննարկելով Քոչարյանի նկատմամբ որպես խափանման միջոց ընտրված կալանավորման պահպանման, վերացման կամ փոփոխման հարցը, փաստել է, որ ենթադրաբար առկա են 300.1 հոդվածի 1-ին կետով նախատեսված արարքին Քոչարյանի առնչությունը հիմնավորող փաստական տվյալներ, թեեւ դատարանը գտել է, որ առկա են որոշակի կասկածներ այդ արարքը սահմանող հոդվածի սահմանադրականության որոշակիությանը հարցը ստուգելու համար››։

Ըստ Պետրոս Պետրոսյանի՝ դատարանն առանց պատճառաբանության եւ հիմնավոր փաստարկի է եզրահանգել, թե առկա են կասկածներ հիշյալ հոդվածի սահմանադրականության հարցը ստուգելու համար․ ‹‹Հիմնավոր կասկածի առկայության մասին հետեւությունների գալով՝ դատարանն այլեւս չէր կարող բարձրացնել 300.1 հոդվածի սահմանադրականության հարցը, որովհետեւ նա արդեն իսկ կիրառել է այդ հոդվածը՝ փաստելով, որ հիմնավոր կասկածը հիմնավորող բավարար ապացույցներ առկա են››։

Ըստ դատախազի՝ անտեսելով այն հանգամանքը, որ հիմնավոր կասկածի գնահատման տիրույթում արդեն իսկ կիրառվել է այդ հոդվածը, դատարանը բարձրացրել է այդ հոդվածի սահմանադրականության հարցը՝ միաժամանակ բարձրացնելով անձեռնմխելիության հարցը․ ‹‹Այլ կերպ ասած՝ նշված հոդվածով հիմնավոր կասկածն առկա գնահատելու դեպքում այլեւս չէր կարող բարձրացվել սահմանադրականության հարցը››։

Պետրոս Պետրոսյանը նշեց, որ Ռոբերտ Քոչարյանի կողմից իր կարգավիճակից բխող կամ չբխող եւ անձեռնմխելիոթունից օգտվելու կամ չօգտվելու, ինչպես նաեւ հիմնավոր կասկածից վեր ապացուցողական չափանիշին համապատասխան նրա նկատմամբ հոդվածի կիրառման  ենթակա լինելու վերջնական գնահատականը դատարանի կողմից կարող  էր տրվել դատական քննության փուլում՝ ապացույցների հետազոտման ժամանակ։

Անդրադառնալով հիմնավոր կասկածի հարցին՝ դատախազը նշեց, որ մեղսագրված արարքի պայմաններում այն բավարար գնահատելու համար դատարանն ունեցել է բավարար փաստեր, տեղեկություններ, ապացույցներ․ ‹‹Մասնավորապես՝ դատարանի ձեռքի տակ են եղել որպես վկա հարցաքննված անձանց ցուցմունքները, Սիլվա Համբարձումյանի, Սամվել Մայրապետյանի եւ Վարդան Օսկանյանի առերեսում ցուցմունքները, բանկային գաղտնիք համարվող տեղեկություններ, Ոստիկանությունից ստացված գրություններ, Կենտրոնական բանկից առգրավված փաստաթղթեր եւ ոչ միայն››։

Ինչ վերաբերում է նախաքննությունն ավարտված լինելուն, ապա ըստ դատախազի՝ դատարանը հաշվի չի առել այն հանգամանքը, որ ներկա փուլում գործի բոլոր նյութերին, գործով անցնող անձանց ամբողջական շրջանակին ծանոթ լիենելու պայմաններում առավել բարձր է նրանց վրա ազդեցություն գործադրելու միջոցով արդարադատությանը խոչընդոտելու ռիսկը․ ‹‹Վարույթն իրականացնող մարմնից թաքնվելու եւ անօրինական ազդեցություն գործադրելու պայմաններում Ռոբերտ Քոչարյանի նկատմամբ ազատության հետ չկապված որեւէ խափանման միջոց, այդ թվում եւ անձնական երաշխավորությունը, երաշխիք չի կարող համարվել ››,- ամփոփեց մեղադրանքը պաշտպանող դատախազ Պետրոս Պետրոսյանը։

Հեղինակ` Միլենա Խաչիկյան