Փաստ ինֆո

‹‹Տուժողների իրավահաջորդներից միայն ես եմ, որ 2008 թվականի մարտի մեկին եղել եմ Մյասնիկյանի արձանի մոտ․ երբ երեկոյան ռմբակոծեցին Երեւան քաղաքը, ես այն համեմատեցի 1941 թվականի Գերմանիայի՝ Սովետական միության վրա հարձակման հետ››,-‹‹Փաստինֆո››-ի հաղորդմամբ այս մասին Քոչարյանի եւ մյուսների գործով դատական նիստին քիչ առաջ հայտարեց Մարտի մեկի գործով տուժող ՝ սպանվաթ Գոռ Քլոյանի հայրը՝  Սարգիս Քլոյանը․ ‹‹Երեկոյան սադրիչները երիտասարդներին տարան կրակի բերան, մոտ հազար սադրիչ էին՝ բերված էջմիածնից, Արտաշատից, Սյունիքից››։

Սարգիս Քլոյանի խոսքով՝ ինքը բազմիցս գրավոր ներկայացրել է, թե ըստ իրեն՝ ով է անմիջապես սպանել իր տղային, եւ ով է սպանելու անմիջական հրաման տվել տվել․ ‹‹Ինձ քննիչն ասել է, որ զենքի ոչ ճիշտ օգտագործման հետեւանքով են զոհվել թե իմ որդին, թե Տիգրան Խաչատրյանը։ Ես նույնիսկ Վահագն Հարությունյանին հարցրի, թե ով է թույլ տվել զորամասից դուրս հանել փակ տարածությունների համար նախատեսված չերյոմուխա զենքը››,- ասաց Սարգիս Քլոյանը եւ հավելեց․‹‹Ոչ մի զինվոր, ոչ մի ոստիկան ընդդմիության կողմից հրազենային բեկորային վնասվածք չի ստացել, ուրեմն՝ ընդդիմության ձեռքին զենք չի եղել›, եւ ուրեմն՝ ի՞նչն էր խանգարում Ռոբերտ Քոչարյանին մի հրաման արձակել, ըստ որի՝ ինչ ուզում են, թող անեն, բայց չկրակեն ժողովրդի վրա, եւ մենք հիմա այստեղ չէինք լինի, եւ ինքն էլ երեւի չդատապարտվեր››։

Ելույթ ունեցավ նաեւ Մարտի մեկի գործով տուժող Տիգրան Աբգարյանի իրավահաջորդը՝ մայրը՝ Ռուզաննա Հարությունյանը․ ‹‹Եթե ցուցարարները ինչ-որ տեղ անկարգություններ էին անում, ընդունենք, որ հրաման են տվել, որ կրակեն ցուցարարների վրա, բա իմ որդի՞ն․ ոչ ցուցարար է եղել, ոչ անկարգություն է արել․ նա ներքին զորքերի զինվոր էր››։

Ռուզաննա Հարությունյանն ասաց, որ ինքը համոզված էր, որ կամ գեներալ Գրիգոր Գրիգորյանն է այդտեղ եղել, կամ հատուկ ջոկատային․ ‹‹Վերջում պարզվեց, որ հատուկ ջոկատային է, բայց ո՞վ է նա։ Ինձ համար հիմա միեւնույնն է՝ Ռոբերտ Քոչարյանը կդատվի թե ոչ, իմ որդին հետ չի գալու, բայց ի՞նչն էր պատճառը, որ իմ որդին զոհվեց, նա ախր զինվոր էր››,-ասաց տուժողի իրավահաջորդը եւ հավելեց․ ‹‹Ամենավիրավորականն այն է, որ տասը զոհերից որեւէ մեկի գործը չբացահայտվեց, տասնմեկ տարվա մեջ որեւէ մեկի մտքով չանցա՞վ գոնե մի սպանությունը բացահայտել››։

Ելույթ ունեցան նաեւ տուժողների մյուս իրավահաջորդները, որոնք միաձայն միացան  Սեդա Սաֆարյանի եւ դատախազների ներկայացրած միջնորդություններին։

Այսպիսով, այսօրվա դատական նիստն ավարտվեց։  Այն կշարունակվի վաղը՝ ժամը 14:00-ին։

Նշենք, որ մարտի 1-ի անկարգությունների ժամանակ կյանքի հետ անհամատեղելի մարմնական վնասվածքներ են ստացել 10 անձ, որոնցից 2-ը՝ ոստիկանության զորքերի ներկայացուցիչ. ՀՀ ՈԶ թիվ 1032 զորամասի մոտոհրաձգային գումարտակի 1-ին վաշտի հրամանատար Համլետ Թադեւոսյանը մահացել է բեկորային վնասվածքից, իսկ ՀՀ ՈԶ թիվ 1033 զորամասում ժամկետային զինծառայող, շարքային Տիգրան Ագբարյանը՝ հրազենային վնասվածքից։

Հեղինակ` Միլենա Խաչիկյան