Փաստ ինֆո

Հայաստանում պետական գործիչների թիվը շատ չէ և Սերժ Սարգսյանի խոսքն ավելի սպասված է դառնում հասկանալու համար՝ ի՞նչ է լինելու, ինչպե՞ս դուրս գալ այս իրավիճակից, արդյո՞ք կա հնարավորություն, որպեսզի իշխանափոխությունից հետո Հայաստանին և Արցախին սպառնացող բազմաթիվ մարտահրավերները չեզոքացվեն, -‹‹Փաստինֆո››-ի հետ զրույցում ասաց ՀՀԿ-ի փոխնախագահ Արմեն Աշոտյանը:

Նրա կարծիքով, ՀՀ երկրորդ նախագահ Սերժ Սարգսյանի լռությունը շատ ավելի բարձրաձայն ու խոսուն է, քան այսօրվա որոշ քաղաքական առաջնորդների անվերջ, այսպես ասած, «խոսակցական թուլությունը», որը հանդես են բերում ժամերով արտաբերելով ոչինչ չասող տեքստեր:

Նա բնական համարեց, որ Սարգսյանի խոսքը պահանջված է, սակայն նախկինում այն պահանջված էր միայն որպես անցյալի մութ էջերը լուսաբանելու խոսք, իսկ հիմա՝ աստիճանաբար ընդգծվում է ապագայի դիսկուրսը: ‹‹Սերժ Սարգսյանը ոչ այնքան քաղաքական գործիչ է, որքան պետական գործիչ, մարդ, ով իր կյանքի կեսը նվիրել է Հայաստանի և Արցախի պետականության կայացմանը, անվտանգության ամրապնդմանը, անկախության վերահաստատմանը, չի կարող ունենալ պարզապես քաղաքական տեսակետներ››,-ասաց ՀՀԿ փոխնախագահը:

Ըստ նրա՝ Սերժ Սարգսյանը կխոսի պատեհ պահին և ընդգծեց, որ նա երբեք չի հեռացել քաղաքականությունից:

‹‹Սարգսյանը պարզապես հեռացել է հանրային, հրապարակային քաղաքականությունից, բայց ամեն աշխատանքային օր գրասենյակում է, տասնյակ մարդկանց է ընդունում, խորհրդակցություններ է անցկացնում, աշխատանքային հանդիպումներ է ունենում այդ թվում արտասահմանյան դեսպանների ու պատվիրակությունների հետ››,-ասաց ՀՀԿ փոխնախագահը:

Նրա փոխանցմամբ՝ ՀՀ երրորդ նախագահը կխոսի ոչ այնքան անցյալի, որքան ապագայի մասին:

Հարցին՝ հնարավո՞ր է նախկին նախագահը քաղաքական գործունեություն ծավալի Արցախում, թե՞ կարծում է, որ Հայաստանում դեռ անելիք ունի, Աշոտյանը պատասխանեց. ‹‹Հայաստանն ու Արցախը միասնական ռազմաքաղաքական տարածք են: Հայաստանը մի երկիր է երկու պետությամբ: Այն էլ ստացվել է այդպես, որովհետև միջազգային դիվանագիտական դիրքավորման լուծումների մեջ սա Արցախյան հիմնախնդրի արդար լուծման համար լավագույն տարբերակն է››:

Աշոտյանի խոսքով, Սերժ Սարգսյանը չի տարբերակում Հայաստանն ու Արցախը և շարունակում է այն դիտել որպես միասնական ռազմաքաղաքական դաշինք եւ միաժամանակ բացառեց Սերժ Սարգսյանի քաղաքական կարիերայի շարունակությունը Արցախում:

Աղբյուր` Փաստինֆո