Փաստ ինֆո

Այս աղմուկը կարող է հանգեցնել հայկական արտադրանքի նկատմամբ ուշադրության փոփոխմանը,- «Փաստինֆո»-ի հետ զրույցում ասել է՝ «Իրազեկ և պաշտպանված սպառող» հ/կ-ի նախագահ Բաբկեն Պիպոյանը՝ անդրադառնալով ծիրանի՝ սնկային հիվանդությունով վարակվելու մասին տեղեկությանը։

Նշենք, որ, ըստ մասնագետների, գյուղացին չի իրազեկվել հակասնկային պրեպարատների մասին, որի հետեւանքով գրանցվել է սնկային հիվանդությունների վարակ։

«Սա հերթական անգամ առիթ է հասկանալու, որ ագրարային քաղաքականության եւ ընդհանրապես գյուղատնտեսության զարգացման ուղղությամբ քայլերը մեղմ ասած բավարար չեն ցանկալի արդյունքն ունենալու համար»,- ասաց Բ.Պիպոսյան։ Ըստ նրա՝ դեռեւս այն ժամանակ, երբ քննարկվում էր գյուղատնտեսության եւ էկոնոմիկայի նախարարությունների միավորման հարցը, ահազանգել են, որ ֆունկցիոնալ եւ ճյուղային նախարարությունների միավորումը կարող է տալ բացասական արդյունքներ։ Սակայն նախագծի հեղինակները պնդել են, թե արտահանմամբ էկոնոմիկայի նախարարությունն է զբաղվում, հետեւապես գյուղատնտեսությունը պետք է միացնել էկոնոմիկայի նախարարությանը։ «Առաջին հերթին պետք է հասկանանք, որ պետությունը պետք է քայլեր ձեռնարկի այդ ապրանքն ունենալու համար եւ հետո միայն մտածի այդ ապրանքը արտահանելու մասին»,- նկատեց մեր զրուցակիցը։ Վերջինիս ներկայացմամբ՝ պետությունը քայլեր պետք է ձեռնարկեր որպեսզի գյուղացին կարողանա պաշտպանել բերքը, հակասնկային միջոցներ օգտագործեր։ «Հիմա ունենք այն ինչ ունենք, տարին մի փոքր հետ է ընկել, ունենք նաեւ հիվանդությունը։ Այս աղմուկը կարող է հանգեցնել հայկական արտադրանքի նկատմամբ ուշադրության փոփոխմանը,- ասաց «Իրազեկ և պաշտպանված սպառող» հ/կ-ի նախագահ Բաբկեն Պիպոյանը։

«Ագրարագյուղացիական միավորում» ՀԿ նախագահ Հրաչ Բերբերյանը՝ Aysor.am-ի զրույցում ասել է, որ նախորդ տարվա համեմատ՝ այս տարի ծիրանի բերքը մոտ 50 տոկոսով քիչ կլինի։ Պատճառներից մեկը՝ անձրևների հետևանքով առաջացած սնկային հիվանդություններն են։

Նրա խոսքով, կան ցանքատարածություններ, որտեղ վնասվել է բերքի 10 տոկոսը, իսկ որոշ դեպքերում՝ ընդհուպ մինչև 50 տոկոսը։

«Սնկային հիվանդությունները, ինչպես հայտնի է, առաջանում են անձրևներից հետո՝ շոգի և գերխոնավության պայմաններում։ Օրինակ՝ հենց այսօր անձրև եկավ, իսկ հետո արև եղավ, բավականին շոգեց, և օդի հարաբերական խոնավությունը բարձրացավ», - նշել է Հ.Բերբերյանը։

Ըստ նրա՝ գյուղացիներին պետք է նախապես կոչ արվեր՝ յուրաքանչյուր անձրևից հետո ծառերն ախտահանել, սրսկումներ կատարել, սակայն գյուղատնտեսության նախարարության կողմից նախազգուշացումներ չեն եղել։

Աղբյուր` Փաստինֆո