Փաստ ինֆո

«Այն, որ բողոքարկելու իրավունք չունեին, մենք ասել ենք, հիմնավորել ենք եւ հիմա էլ ասում ենք »,-այս մասին այսօրվա ասուլիսում հայտարարեց Ռոբերտ Քոչարյանի պաշտպան Հայկ Ալումյանը՝ անդրադառնալով Դատախազության բողոքներին՝ ընդդեմ Երեւանի ընդհանուր իրավասության դատարանի որոշման դեմ. «Մեզ համար այս դատավարությունը սկսել է օրենքի խախտմամբ, եւ ինչ որոշում էլ որ կայացվի, կասկածելի է լինելու այն  փաստի ուժով, որ ընդհանրապես այս քննությունը չպիտի լինի»։

Ալումյանի խոսքով՝ անգամ Վերաքննիչ դատարանի դատավորը հասկանում է, թե ինչքան մեծ է իր նկատմամբ ճնշումը. «Մենք ի սկզբանե ասել էինք, որ պատահական չէ, որ երկու տարբեր դատական ակտերի վերաբերյալ բողոքները մակագրվել են նույն դատավորին, թե ինչ ծավալի են այդ ճնշումները, կերեւա վաղը, եւ եթե պարզվի, որ միջամտություն է եղել, դա կնշանակի, որ տեղի է ունեցել Քրեական օրենսգրքով նախատեսված հանցագործություն, եւ դրանով արդեն բոլոր դատական ակտերը, որ ինքը կայացրած կլինի, կդրվեն կասկածի տակ»։

Ալումյանը կարծիքով՝ հանգամանքը, որ դատավորը նշանակված է եղել Ռոբերտ Քոչարյանի կողմից, այսօր նրան որեւէ լծակ չի տալիս այդ դատավորի նկատմամբ. «Մի կողմ թողնենք մի քանի դատավորի, ում նկատմամբ ոչ մի իշխանություն չի կարողացել լծակներ գործադրել, մնացած, այսպես ասած, լսող դատավորները ցանկացած պահի լսում են տվյալ պահի իշխանություններին, որովհետեւ իշխանություններն են, որ ունեն լծակներ, եւ այն, որ ճնշումներ կան, անձամբ ես չեմ կասկածում. դրանց մեծ մասը ձեզ համար տեսանելի է եղել, մի մասն էլ՝ քողարկված, բայց այդ ճնշումները աննախադեպ մասշտաբների են հասել»։

Անդրադառնալով Ռոբերտ Քոչարյանի՝ դատավորին ուղղված խոսքին առ այն, որ «Ձեր յախան թափ տվեք, լավ հոտ չի գալիս», պաշտպանն ասաց, որ դա չի կարող դատավորի նկատմամբ ճնշում լինել. «Ցանկացած մարդ կարող է ասել՝ եթե դու սխալ վարվեցիր, ես կդիմեմ օրենքին կամ դու կպատժվես, այսինքն՝ եթե անձը իրական լծակ չունի ճնշում գործադրելու, ապա դա իրավական բանավեճի մի ձեւ է, եւ եթե դա համեմատեք պրն Փաշինյանի՝ վերջերս արած արտահայտությունների հետ, կտեսնեք, թե ով լծակներ ունի եւ ով է քայլեչ ձեռնարկում դատավորներին ահաբեկելու »։

Աղբյուր` Փաստինֆո