Փաստ ինֆո

ՀՀ վերաքննիչ քրեական դատարանում ավարտվեց ԱԺ նախկին պատգամավոր, ԵԿՄ նախկին նախագահ Մանվել Գրիգորյանի խափանման միջոց կալանավորումը հիմնավոր լինելու` Երևանի ընդհանուր իրավասության դատարանի որոշման դեմ պաշտպանական կողմի ներկայացրած բողոքի քննությունը։

Նիստից հետո` լրագրողների հետ զրույցում, Մանվել Գրիգորյանի պաշտպան Լևոն Բաղդասարյանը, պատասխանելով «Փաստինֆո»-ի դիտարկմանը, թե վերջին հետազոտության տվյալներով, ըստ Նաիրի ԲԿ-ի տնօրեն Անատոլի Գնունու, Մանվել Գրիգորյանի մոտ որևէ նոր հիվանդություն չի հայտնաբերվել, ասաց. «Իմ ձեռքի տակ կա համապատասխան էպիկրիզ, ըստ որի` կա բարդացում, միգուցե այդ հիվանդությունը նախկինում եղել է, չեմ կարող ասել։ Բայց այդ հիվանդությունների առկայության պայմաններում մարդուն պահելը կալանքի տակ դիտում ենք ոչ իրավաչափ»։

Մեր հարցին, թե ինչի վրա են հիմնվում պաշտպանները նոր` վերջույթների անդամահատությանը սպառնացող հիվանդությունների մասին հայտարարելիս այն պարագայում, երբ Անատոլի Գնունին նշում է, որ առաջացած բարդությունները կապված են միայն շաքարային դիաբետի հետ, այլ ոչ թե որևէ նոր հիվանդության, Բաղդասարյանը պատասխանեց. «Մեր ձեռքին կա էպիկրիզ` ստացված Գրիգոր Լուսավորիչ բկ-ի, որտեղ թվարկվում են երեք նոր հիվանդություններ, որոնք նախկինում նշված չեն եղել, միգուցե եղել են, թույլ են զարգացած եղել, էպիկրիզում չեն արձանագրվել, ես բժիշկ չեմ, չեմ կարող ասել»։

Հիշեցնենք, որ Նաիրի ԲԿ-ի տնօրեն Անատոլի Գնունի այսօր «Փաստինֆո»-ին հայտնել էր, որ ստացված հետազոտության արդյունքների համաձայն` Մանվել Գրիգորյանի մոտ անդամահատությանը սպառնացող հիվանդություններ չեն հայտնաբերվել.

«Մանվել Գրիգորյանն ունի բազմաթիվ հիվանդություններ, բայց բոլոր բարդությունները կապված են շաքարային դիաբետի հետ, նամանավանդ, որ նա հայտարարել էր դեղադուլ, դեղեր չէր ընդունել, մենք ունենք շեղումներ, բայց բոլորը վերաբերում են շաքարային դիաբետին»,- նշել էր Անատոլի Գնունին։

Հավելենք, որ դատարանը հեռացավ խորհրդակցական սենյակ, և որոշումը կհրապարակվի վաղը` հունիսի 18-ին` ժ. 09.55։

Աղբյուր` Փաստինֆո