Փաստ ինֆո

«Այն, որ ամբողջական դատական համակարգը այլեւս ի վիճակի չէր ծառայելու իր բուն նպատակին, ակնհայտ էր, խոսքը միայն ԲԴԽ-ի մասին չէ»,- «Մեդիա կենտրոն»-ում այսօր անցկացված ասուլիսի ժամանակ այս կարծիքն է հայտնել «Հելսինկյան ասոցիացիա» ՀԿ նախագահ Նինա Կարապետյանցը. «Սա նաեւ տարբեր տեսակի վեթինգներից խուսափելու հնարավորություն է. նման բան եղավ Ուկրաինայում, երբ շատ դատավորներ խուսափելու համար պատասխանատվությունից ուղղակի դիմումներ գրեցին, դուրս եկան, շրջանցեցին դա, հետո վերադարձան նույն համակարգ եւ շարունակեցին աշխատել»։

Նինա Կարապետյանցի կարծիքով՝ չի կարող հին ԲԴԽ-ն ծառայել իր գործառույթին. «ԲԴԽ երբեք էլ չի եղել, որեւէ դատավոր պաշտպանված չի եղել, երբ դատավորին զանգել ու հրահանգել են, ԲԴԽ-ն ոչինչ չի արել, ԲԴԽ-ն էլ այդ հրահանգողներից մեկն է եղել, ես հասկանում եմ, որ կա անմեղության կանխավարկած, որ սա կարող է համարվել հաղորդում հանցագործության մասին, բայց նույն ԲԴԽ-ի նախկին ղեկավարը՝ Գագիկ Հարությունյանը, եղել է ՍԴ նախագահ, եւ տարիներ շարունակ հանցավոր ռեժիմի կեղծված ընտրությունները ընդունելի է համարել՝ որեւէ խախտում չարձանագրելով, ուստի չի կարելի թույլ տալ, որ նա դիմում գրի ու ուղղակի հեռանա»։

Կարապետյանցի խոսքով՝ Գագիկ Հարությունյանը եղել է այն մարդկանցից մեկը, ով պետք է կրի պատասխանատվություն. «Նա պետք է կրի պատասխանատվություն մեր երկրում օրինականության բացակայության համար, իսկ եթե կան օրենքներ, որ ժամանակին գրվել են հենց նրանց անվտանգությունը երաշխավորելու համար, եւ այսօր խանգարում են իրավունքի կիրառմանը, ապա դրանք պետք է որոշակի փոփոխության ենթարկվեն»։

Կարապետյանցը կարծում է, որ բոլորը պետք է ենթարկվեն պատասխանատվության. «Բոլորը պետք է ենթարկվեն պատասխանատվության, այլապես մենք չենք ունենա երաշխիք, որ այդ այլանդակությունները այլեւս չեն կրկնվի. իշխանությունը հատկություն ունի փչացնել մարդկանց, եւ ամենապարկեշտ մարդիկ հատկություն ունեն փչանալու, այնպես որ պետք է պատասխանատվության ենթարկվեն ՍԴ-ից եւ ԲԴԽ-ից սկսած բոլորը, այլապես մենք չենք ունենա հնարավորություն այս երկիրը վերականգնելու»։

Իրավապաշտպան Վարդան Հարությունյանի խոսքով էլ՝ թյուրիմացություն կլիներ հույս ունենալ, թե դատաիրավական համակարգը կարող է առողջանալ կամ տարիների ընթացքում վերափոխվել. «Խոսքը չի վերաբերում դատավորների հարյուր տոկոսին, բայց նրանք էլ են հասկանում, որ մեր իրականությունից դուրս են՝ ամենավերին ատյաններից մինչ ստորին ատյաններ, այդ մարդիկ տարիներ շարունակ ներգրավված են եղել արդարադատության դեմ գործողություններում, նրանց շատ վճիռներ արդարադատության հետ եզրեր չունեն, խոսքս չի վերաբերում միայն քաղաքական վճիռնրին, այլեւ՝ տնտեսական, քրեական...»։

Հարությունյանի խոսքով՝ շատ դատավորներ մշտապես պատվեր կատարողներ են եղել. «Մեր նոր իրականության մեջ նրանք չպիտի կարողանային տեղավորվել, եւ չեն էլ տեղավորվում, ես այդ հրաժարականը դրանով եմ բացատրում. նրանք դուրս են մղվում, եւ շատ արագ պետք է գա այն պահը, երբ մենք կհայտարարենք, որ ունենք նոր դատարաններ, արդարադատության նոր համակարգ՝ նոր դեմքերով»,-կարծում է իրավապաշտպանը։

Լուսանկարը՝ «Մեդիա կենտրոն»-ի

Աղբյուր` Փաստինֆո