Փաստ ինֆո

«Շատ կարեւորում եմ ասել, որ Քոչարյանի ազատ արձակվելուց հետո դատարանների նկատմամբ տեղի ունեցան աննախադեպ ճնշումներ, որ նպատակ ունեին ոչ միայն պատժել պրն Քոչարյանին ազատ արձակած դատավորին, ով, ըստ էության, ուղղակի կիրառեց օրենքը, ինչը եւ պետք է աներ, այլ նաեւ ահաբեկել մնացած դատավորներին, ովքեր ապագայում պետք է քննեն պրն Քոչարյանի գործը»,-այսօր այս մասին հայտարարեց Ռոբերտ Քոչարյանի պաշտպան Հայկ Ալումյանը. «Այսինքն՝ ցանկացած դատավոր, ով ապագայում գործ կունենա այս գործի հետ, արդեն հասկանում է, թե ինչ տեղի կունենա, եթե իր կողմից կայացվելիք ակտը դուր չկա այսօրվա իշխանությանը»։

Անդրադառնալով հունիսի 5-ին Սահմանադրական դատարանի բակում տեղի ունեցած բողոքի ակցիային՝ Հայկ Ալումյանն ասաց, որ դա պայմանավորված էր նրանով, որ ՍԴ-ն պետք է գործի հետ կապված որոշում կայացներ. «Մի խումբ անձինք՝ իշխանության կողմից հովանավարվող, հանրահավաք անցկացրին ՍԴ-ի դիմաց, ինչը արգելված էր, իսկ երբ ՍԴ դատավոր տիկին Գյուլումյանն ուզեց դուրս գալ շենքից, տեսաք, թե ինչպես նրան վիրավորեցին, ինչ քաշքշուկ տեղի ունեցավ»։

Ալումյանն ընդգծեց, որ դրանից հետո էր, որ ՍԴ-ն աննախադեպ որոշում կայացրեց. «Վարույթ ընդունելը մեկ ամսով երկարաձգելով՝ ՍԴ-ն աննախադեպ որոշում կայացրեց, երբեւէ չէր եղել, որ վարույթ ընդունելու հարցը այսքան ձգձգվեր»։

Ինչ վերաբերում է իրավապահ մարմիններին, ապա Ալումյանի խոսքով՝ նրանք այդ օրը անգործության էին մատնված. «Եթե անգամ հաշվի առնենք, որ դա ժողովրդի ինքնաբուխ հավաք էր, բոլոր դեպքերում, օրենքով արգելված էր ՍԴ-ի դիմաց հավաք իրականացրել, եւ այն, որ այս իրավիճակում իրավապահ մարմինները անգործության են մատնված, հենց վկայում է այն մասին, որ դա ամբողջությամբ պլանավորված էր՝ այս դեպքում ՍԴ-ի նկատմամբ ճնշում գործադրելու համար»։

Հիշատակելով Գագիկ  Ջհանգիրյանի՝ օրերս տված հարցազրույցը, որի ընթացքում վերջինս որոշ հանգամանքներ էր նշել՝ Հայկ Ալումյանը  հայտարարեց, որ դրանց հետ կապված իր անունից հաղորդում է ներկայացրել Գլխավոր դատախազին. «Ջհանգիրյանը հարց հնչեցրեց ՍԴ դիմելու հետ կապված՝ նշելով 3 շատ կարեւոր հանգամանք, որոնք, ըստ իս, գործ հարուցելու առիթ են եւ վկայում են դատարանների նկատմամբ ճնշումների մասին»։

Ըստ Ալումյանի՝ Ջհանգիրյանի այն հայտարարությունը, թե ՍԴ-ն դատարաններին հնարավորություն է տալիս, որ իրենք իրենց սխալը ուղղեն, վկայում է, որ երբ 1 ամսով հետաձգվեց դիմումի քննությունը, դրանով շանս տրվեց, որ Վերաքննիչ դատարանը բեկանի առաջին ատյանի որոշումը. «Եթե դա իրոք այդպես է, ապա խոսքը նախապես պլանավորված դատական ակտերի մասին է, որ ՍԴ-ն պետք է ձգձգի, եւ այդ ընթացքում Վերաքննիչը բեկանի Առաջին ատյանի որոշումը»։

Ջհանգիրյանի երկրորդ հայտարարությունը, որ ըստ Ալումյանի, կարող է գործ հարուցելու առիթ հանդիսանալ, այն է, որ ՍԴ-ն այդ դիմումը չի քննելու. «Ի՞նչ է սա նշանակում. որ Ջհանգիրյանին նախապես հայտնի է, թե ինչ է անելու ՍԴ-ն, նա նաեւ ասաց՝ չակերտները չեմ բացում, մինչդեռ ոչ ոք այդպիսի ինֆորմացիայի հիմա չպիտի տիրապետեր, նույնիսկ՝ ՍԴ դատավորները»։

Երրորդ հայտարարությունը, որ արել է Ջհանգիրյանը, այն է, որ ՍԴ-ն համենայն դեպս ներկայիս կազմով այդ գործը չի քննելու. «Այսինքն՝ պետք է հասկանալ, որ ՍԴ-ում փոփոխություններ են տեղի ունենալու, ուրեմն՝ տեղեկություն կա, որ որոշ մարդիկ պետք է դուրս գան, եւ նրանց փոխարեն գան ուրիշները»։

Ալումյանի խոսքով՝ առնվազն երկու դատական ակտերի անելիքները հայտնի են Ջհանգիրյանին, ինչը այդպիես չպիտի լիներ։

Աղբյուր` Փաստինֆո