Փաստ ինֆո

«Երկու միլիոն մարդ դրական է գնահատում ԱԱԾ աշխատանքը, բայց կա մարդկանց շատ փոքր խումբ, որ այսօր որոշել է թիրախավորել ԱԱԾ-ն, որովհետեւ իրենց ձեռք չի տալիս, որ ԱԱԾ-ն ունենա նման վստահություն, նման հեղիակություն եւ ժողովուրդն ու հասարակությունը հավատան ԱԱԾ-ին»,- այս կարծիքն է հայտնել ԱԱԾ տնօրեն Արթուր Վանեցյանը «Շանթ» հեռուստաընկերությանը տված հարցազրույցի ժամանակ. «Իմ՝ ԱԱԾ տնօրենի պաշտոնը ստանձնելու առաջին օրվանից ես ամեն ինչ արել եմ, որ այդ վստահությունը մենք ձեռք բերենք, եւ մենք դա կարողացել ենք անել»,-ասել է նա։

Արթուր Վանեցյանի խոսքով՝ առողջ քննադատությունը, որ հնչում է ԱԱԾ-ի հասցեին, իրենք լսում են, ընդունում, քայլեր են ձեռնարկում. «Իսկ եթե սխալվել ենք, պատրաստ ենք ներողություն հայցել, բայց այն ստահոդ տեղեկությունները, որ տարածվում են մեր մասին ինչ-ինչ պատճառներով, անընդունելի են, եւ այն անձինք, որոնք փորձում են ԱԱԾ-ն թուլացնել, խարխլում են ՀՀ անվտանգությունը»։

Վանեցյանի խոսքով՝ ԱԱԾ-ն փակ կառույց է, եւ երբեւիցե այնքան թափանցիկ չի եղել, որքան վերջին շրջանում է. «Բոլորը ԱԱԾ-ի մասին ենթադրություններով են խոսել, բայց ես հավաստիացնում եմ, որ ԱԱԾ-ն հիմնականում զբաղվում է հետախուզությամբ եւ հակահետախուզությամբ, ինչպես նաեւ՝ պայքարում է հնարավոր ահաբեկչական գործողութոյւնների դեմ»։

Վանեցյանի պնդմամբ՝ հետախուզղական եւ հակահետախուզական գործունեության մասին առհասարակ լռում են, դրանց գնահատականը տալիս է քաղաքական ղեկավարությոնը, որը ի պաշտոնե տեղեկացված է կատարած աշխատանքներից. «Հետախուզական եւ հակահետախուզական գործառույթների մասին խոսել ուղղակի հնարավոր չէ. եթե մենք այսօր բացահայտում ենք օտարերկրյա պետության գործակալական ցանց, եւ կատարում ենք համապատասխան աշխատանքներ կամ ունենք հետախույզներ այլ երկրներում, որոնցից ստանում ենք հետախուզական լուրջ տեղեկություններ, ինչ-որ մեկին թվում է, թե դրա մասին պետք է հայտարարե՞նք, տնտեսական հանցագործությունների, կոռուպցիայի դեմ եւ այլ հանցագործությունների դեմ պայքարի մասին իհարկե պետք է խոսենք, հաշվետու լինենք»,-ասել է նա եւ հավելել. «Եթե ՀՀ-ում չկան ահաբեկչական ակտեր, դա չի նշանակում, որ չկան նման խմբեր, ովքեր ցանկանում են կատարել ահաբեկչական գործողություններ»։

Վանեցյանի կարծիքով՝ տպավորությունը, թե ամեն ինչով ԱԱԾ-ն է զբաղվում, գալիս է նրանից, որ իրենց կողմից կատարված աշխատանքները միշտ ուշադրության կենտրոնում են լինում. «Սակայն Ոստիկանությունն էլ, ՀՔԾ-ն էլ, ՔԿ-ն էլ, ՊԵԿ-ն էլ աշխատում են շատ արդյունավետ, ես գնահատական չեմ տալիս, բայց ուզում եմ ասել, որ յուրաքանչյուրը զբաղվում է իր գործով, պարզապես մեր անունը հենց մի տեղ լինում է, տպավորություն է առաջանում, թե ամեն ինչով զբաղվում է ԱԱԾ-ն։

Անդրադառնալով իր եւ ՀՔԾ պետի հեռախոսազրույցի գաղտալսմանը, Արթուր Վանեցյանն ասել է. «Չեմ ամաչում գաղտնալսման բովանդակությունից, ես շատ ծանր եմ տանում, եւ ամաչում եմ գաղտնալսման փաստից, բայց եթե օբյեկտիվ նայենք այս ամենին, ապա տեխնիկական ներկայիս զարգացման պարագայում նման դեպքերը բացառելը ուղղակի անհնար է, եւ աշխարհի հզորագույն պետությունների ղեկավարներն էլ նմանատիպ պատմությունների մեջ հայտնվել են»։

Վանեցյանի պնդմամբ՝ իրենք փորձում են անել ամեն ինչ, որ նման դեպքերը բացառեն։

Աղբյուր` Փաստինֆո