Փաստ ինֆո

«Իր նկատմամբ բռնություն գործադրելու կապակցությամբ Գագիկ Հեբոյանը հանցագործության մասին հաղորդում է ներկայացրել Հատուկ քննչական ծառայություն, որտեղ ՀՀ ՔՕ 309–րդ հոդվածի 2–րդ մասի հատկանիշներով հարուցվել է քրեական գործ»,-այս մասին դատարանի դահլիճում հայտարարեց կաշառքի մեջ մեղադրվող դատավոր Գագիկ Հեբոյանի պաշտպան Արմեն Նադիրյանը` նախագահող դատավոր Տաթևիկ Գրիգորյանին ինքնաբացարկի միջնորդություն հայտնելու ժամանակ։

Նրա խոսքով` Հեբոյանը գործով ճանաչվել է տուժող։

«Փաստինֆո»-ն արդեն հայտնել է, որ պաշտպանների պնդմամբ` Տաթևիկ Գրիգորյանը խախտումներ է թույլ տվել մայիսի 27–ին իր պաշտպանյալի խափանման միջոց կալանավորման հիմնավոր լինել կամ չլինելու հարցի քննությանը. «Ոստիկանները բռնություն գործադրելու միջոցով են իմ պաշտպանյալին տեղափոխել դատարան, որտեղ նա հայտնել է, որ մարմնական վնասվածքներ ունի, դրանք ցույց է տվել նախագահող դատավոր Տաթևիկ Գրիգորյանին և հայտարարել, որ առանց իր պաշտպանների չի կարող մասնակցել դատական նիստի։ Դատավորը թույլ չի տվել Հեբոյանին չմասնակցել նիստին և առանց փաստաբանի որոշում է կայացրել Հեբոյանի խափանման միջոց կալանավորումն ուժի մեջ թողնելու վերաբերյալ»։

Պաշտպան Նադիրյանն ընդգծեց, որ այդ գործով դատավոր Տաթևիկ Գրիգորյանը հնարավոր է մասնակցող անձ լինի։

Դատավոր Գագիկ Հեբոյանն էլ իր հերթին հայտարարեց, որ Տաթևիկ Գրիգորյանը չի կարող այս գործով լինել պատշաճ դատավոր. «Մայիսի 27-ի դատական նիստին ինձ բռնի ուժով են բերել դատարան, ես այդ մասին Ձեզ հայտնել եմ, և ցույց տվել վնասվածքներս, իսկ Դուք թույլ չեք տվել վերադառնալ խուց, ինչի իրավունքը ես ունեի։ Ակնհայտ է ձեր շահագրգռվածությունն ու հանձնարարությունը այս գործով»,- հայտարարեց Հեբոյանը։

Վերջինս նշեց նաև, որ դատավորը չի կարող ցույց տալ իր պրակտիկայում մեկ այլ գործ, որը վարույթ ընդունելուց 3 ժամ հետո նիստ է նշանակել և միանգամից ցրիչներ ուղարկել պաշտպանների գրասենյակներ` նրանց տեղեկացնելու. «Եթե դուք ծանոթացած լինեիք գոնե առաջին հատորի մի քանի էջին, կտեսնեիք, որ օրինակ, Կրոմվել Գրիգորյան փաստաբանից ես դեռեւս նախաքննության սկզբում հրաժարվել եմ, իսկ թե ինչի համար էիք նրան ծանուցում, անհասկանալի է»։

Հեբոյանը հավելեց, որ իր պաշտպաններից Արմեն Անտոնյանին ծանուցել են գործընկերոջ հասցեով, իսկ մյուս պաշտպանը գտնվել է ՀՀ-ից դուրս. «Այս ամենը հիմնավոր կասկած է առաջացնում դատավորի անկողմնակալության հետ կապված, ուստի խնդրում եմ Ձեզ ինքնաբացարկ ընդունել եւ հնարավորություն տալ մեկ այլ դատավորի այս գործը քննելու։ Չեմ կարծում, որ սա ձեր կյանքի ամենացանկալի գործն է, ինքնաբացարկ հայտնեք, թող ուրիշ դատավոր գա, քննի»:

Դատախազը նշեց, որ Կրոմվել Գրիգորյանից հրաժարվելու տեղեկություն, ամեն դեպքում չկա, իսկ առկա պաշտպաններից, ըստ էության, չի ծանուցվել միայն մեկը։ Նրա խոսքով ներկայացված միջնորդությունը ենթակա է մերժման։

Խորհրդակցական սենյակ հեռանալուց և վերադառնալուց հետո դատավոր Տաթևիկ Գրիգորյանը հայտնեց, որ միջնորդությունը մերժվում է` անհիմն լինելու պատճառաբանությամբ։

Հեղինակ` Միլենա Խաչիկյան