Փաստ ինֆո

Քոչարյանն ընդդեմ Նիկոլ Փաշինյանի նիստից հետո ՀՀ վարչապետի փաստաբան Գևորգ Գյոզալյանը լրագրողների հետ զրույցում հայտնեց, որ իր վստահորդը որոշել է 650 հազար ՀՀ դրամ դատական ծախսերի փոխհատուցում պահանջել հայցվորից:

‹‹Մեզ համար այս հայցն առհասարակ անհասկանելի էր , ուստի այս առումով իմ վստահորդը ծախսեր էր կատարել և նրա միակ եկամտի աղբյուրն իր աշխատավարձն է և որպեսզի նմանատիպ անհիմն հայցերը կանխվեն իմ վստահորդի դեմ, ապա մենք հետամուտ ենք լինելու, որպեսզի այդ հարցը լուծվի››,-ասաց Գյոզալյանը:

Լրագրողի հարցին, թե ինչ ծախսերից է գոյացել 650.000 դրամը, պաշտպանը պատասխանեց, որ գումարը գոյացել է փաստաբանական ծախսերից:
Նշենք նաև, որ ՀՀ երկրորդ նախագահ Ռ. Քոչարյանի պաշտպան Հայկ Ալումյանն ասել էր, որ 650.000 դրամ փոխհատուցումը ողջամիտ չի համարում՝ հաշվի առնելով գործի բարդության աստիճանը:

Հիշեցնենք, որ Ռոբերտ Քոչարյանի ներկայացուցիչ Հայկ Ալումյանը 2018 թվականի սեպտեմբերի 17-ին քաղաքացիական հայց էր ներկայացրել ընդդեմ Նիկոլ Փաշինյանի՝ հրապարակայնորեն արտահայտված զրպարտությունից պատիվը և արժանապատվությունը պաշտպանելու եւ հրապարակայնորեն ներողություն խնդրելուն պարտավորեցնելու պահանջով։

Քոչարյանը վիճարկում է Նիկոլ Փաշինյանի հետևյալ արտահայտությունը. «Ասում է` անձեռնմխելի է։ Ինչ է նշանակում անձեռնմխելի։ Այսինքն` կարելի է մարդկանց սպանությունը կազմակերպել ու ասել` ես անձեռնմխելի՞ եմ։ Այդ որտե՞ղ է այդպես գրված»։

Փաշինյանի ներկայացուցիչ Գյոզալյանը հայտարարել է, որ վարչապետը նկատի է ունեցել Սահմանադրական նորմը և ոչ թե կոնկրետ անձի: ՄԻնչ այդ ՝հունիսի 12-ին, Ալումյանը դատարանում ասել էր, որ եթե Նիկոլ Փաշինյանի ներկայացուցիչ Գյոզալյանը հայտարարի, որ Փաշինյանը նկատի չի ունեցել Քոչարյանին, իրենք պատրաստ են հրաժարվել հայցից:

Երևանի ընդհանուր իրավասության դատարանի Քանաքեռի նստավայրում այսօր ավարտվեց Ռոբերտ Քոչարյանն ընդդեմ Նիկոլ Փաշինյանի գործի քննությունը. դատական ակտը հրապարակվելու է հունիսի 24-ին։
Մանրամասները՝ տեսանյութում:

Աղբյուր` Փաստինֆո