Փաստ ինֆո

Ամուլսարի ծրագրի դարձել է լուրջ փորձաքար Նիկոլ Փաշինյանի կառավարության համար։ Մի քանի հարյուր միլիոն դոլարանոց խոշոր ներդրումային նախագիծը, որի մեծ մասն արդեն իրականացվել էր, իշխանափոխությունից անմիջապես հետո հայտնվեց հարկադիր պարապուրդում` նաև ոչ առանց կառավարության մեղավորության։

Շուրջ մեկ տարի է, այն արգելափակված է։ Այսօր էլ Ամուլսարի ծրագիրը շարունակում է մնալ անորոշ։ Դրա հետագա ճակատագիրը կառավարությունը կապել է էկոլոգիական փորձաքննության եզրակացության հետ։

Այդ նպատակով լիբանանյան ELARD ընկերության իրականացրած ուսումնասիրության արդյունքներն արդեն ուղարկվել են Քննչական կոմիտե։ Ներկայացված եզրակացության հիման վրա էլ կորոշվի Ամուլսարի ճակատագիրը։

-Եթե եզրակացությունը կլինի բացասական և կնշվի, որ առկա վտանգները կազմակերպության գործունեության հետ անհամատեղելի են` ջրային ռեսուրսների հետ կապված, ապա կառավարությունը իրավական գործընթաց կսկսի, որպեսզի աշխատանքները դադարեցվեն»,-ասում է շրջակա միջավայրի նախարարը։
Այդպես կլինի՞, թե՞ ոչ, այս պահին հստակ չէ։ Բայց որ դրա հետևանքները կարող են ծանր լինել Հայաստանի համար, միանշանակ է։
Խնդիրը ամենևին էլ այն չէ, որ անգամ էկոլոգիական վտանգների առկայության դեպքում, ծրագիրն անպայման պետք է շարունակվի։ Խնդիրը այն հետևանքների մասին է, որոնք կարող են առաջանալ դրա դադարեցման դեպքում։

Նույնիսկ միայն ծրագրի կասեցումը մեծ վնասներ է հասցրել երկրի ներդրումային միջավայրին, էլ ուր մնաց թե դրա դադարեցումը։ Զարմանալի չէ, որ օտարերկրյա ներդրողները խուսափում են գալ Հայաստան։ Ու դրա պատճառներից մեկն էլ Ամուլսարի ծրագրի շուրջ ստեղծված թնջուկն է։ Եթե նման խոշոր ծրագրի հետ կարող են այսպիսի խնդիրներ առաջանալ, ապա դժվար չէ պատկերացնել, թե որքանով իրենց կարող են պաշտպանված զգալ փոքր ներդրողները։

Եվ որ պակաս կարևոր չէ, խնդիրը միայն ներդրումները չեն։ Իսկ ինչքա՞ն գումար պիտի վճարի պետությունը` ծրագիրը կասեցնելու հետևանքով ներդրողին պատճառած վնասների դիմաց։ Խոսքը ընդհուպ մինչև 2 մլրդ դոլար փոխհատուցման մասին է, որի վտանգը դատական պրոցեսներ սկսվելու պարագայում` կախված է լինելու պետության գլխին։

Որպեսզի հնարավոր լինի պատկերացնել, թե դա ինչ գումար է Հայաստանի համար, ասենք, որ այն համարժեք է պետական բյուջեի ծախսերի գրեթե 70 տոկոսին։

Աղբյուր` Փաստինֆո