Փաստ ինֆո

Հայ-ռուսական համալսարանի պետության և իրավունքի տեսության ու պատմության ամբիոնի վարիչ, ի. գ. թ., պրոֆեսոր Արթուր Ղամբարյանը եւ ՀՀ վաստակավոր իրավաբան, ի. գ. թ., դոցենտ, ԵԽ ազգային փորձագետ Թամարա Շաքարյանը հիմնադրել են «Հանրային իրավունքի զարգացման եւ իրավական փորձաքննությունների բյուրո» հասարակական կազմակերպությունը. «Իրավունքի գերակայությունն իրավական պետության կայացման գլխավոր չափորոշիչն է, որը պետք է լինի հասարակության յուրաքանչյուր անհատի և հանրային իշխանության իրավական վարքագծի հիմքում:

Արդի ժամանակաշրջանում իրավական հանրությունը մտահոգված է իրավունքի գերակայության սկզբունքի իրավական երաշխիքների պահպանմամբ՝ ի նպաստ Հայաստանի՝ որպես իրավական պետության կայացմանը: Այս համատեքստում առավել քան նկատելի են իրավաստեղծ գործունեության բացերն ու թերությունները, իրավական նորմերի հակասական և իրավական տրամաբանությունից զուրկ, հաճախ քաղաքական ենթատեքստ պարունակող մեկնաբանությունները, և որն ավելի մտահոգիչ է դրանց՝ նման մեկնաբանություններով կիրառումը»,-կարծում են ՀԿ-ի հիմնադիրները։

Նրանց խոսքով՝ լինելով քաղաքականապես չեզոք, շուրջ մեկուկես տասնամյակ հանրային ծառայության ոլորտում տարբեր պաշտոններ զբաղեցնելով, իրավաստեղծ ակտիվ գործունեություն իրականացնելով՝ հընթացս գիտագործնական և գիտամանկավարժական ակտիվ գործունեության ծավալմամբ՝  նշանակալի փորձ ու գիտելիք են ձեռքբերել՝ նպաստելով իրավական պետության ամրապնդմանը և իրավական դաստիարակության իրականացմանը. «Արդի մարտահրավերներին համահունչ որոշում ենք կայացրել համատեղել մեր մասնագիտական ներուժը՝ նպաստելով Հայաստանում և Արցախում հանրային իրավունքի զարգացմանը՝ օրենսդրության զարգացման վերաբերյալ համապատասխան հայեցակարգերի մշակմամբ, իրավական հարցերի վերաբերյալ «Amicus curiae» եզրակացությունների ներկայացմամբ, իրավական ակտերի նախագծերի վերաբերյալ օբյեկտիվ ու անաչառ իրավական փորձաքննությունների իրականացմամբ և եզրակացությունների տրամադրմամբ: Քաղաքական այս իրադարձությունների ֆոնին կարևորում ենք և ցանկանում ենք ընդգծել, որ մեր գործունեությունը չի բխելու քաղաքական ինչ-ինչ շահերից և նպատակաուղղված չի լինելու այս կամ այն անձի շահերի պաշտպանությանը»:

ՀԿ-ն ընդգծում է, որ գործունեության ընթացքում լինելու է անաչառ, սկզբունքային, արժեքահեն, համագործակցող և ցանկացած հանգամանքներում բարձր է պահելու մասնագիտական արժանապատվությունն ու արհեստավարժությունը: 

Աղբյուր` Փաստինֆո