Փաստ ինֆո

«Փաստինֆո»-ի հաղորդմամբ՝ Երեւանի ընդհանուր իրավասության դատարանի Կենտրոն եւ Նորք Մարաշ նստավայրում Մանվել Գրիգորյանի եւ նրա կնոջ՝ Նազիկ Ամիրյանի գործով այսօրվա դատական նիստի ընթացքում դատավոր Մնացական Մարտիրոսյանը հայտնեց, որ «Սեւան» ՔԿՀ-ի դատապարտյալ Աշոտ Իսախանյանը դատարան է ներկայացել դիմում՝ պահանջելով Մանվել Գրիգորյանից բռնագանձել 5 միլիոն դոլար՝ իր ողջ կյանքը կործանելու համար։

Դիմումի մեջ մասնավորապես ասված է. «Գրիգորյանը ինձ 22 օր պահել է նկուղում, խոշտանգել է ու սպառնացել: Հայտնում եմ, որ ես չեմ ստացել իմ մասով մեղադրական եզրակացությունը եւ չգիտեմ, թե ինչու դատակոչի ցուցակում չկամ: Խնդրում եմ՝ ինձ ներգրավել դատակոչի ենթակա անձ՝ տուժող, եւ հատկացնել մեղադրական եզրակացությունը: Խնդրում եմ, որ որպես քաղհայց հօգուտ ինձ Մանվել Գրիգորյանից բռնագանձեք 5 միլիոն դոլարին համարժեք ՀՀ դրամ՝ ամբողջ կյանքս կործանելու համար»,- նշել է Իսախանյանը եւ կից ներկայացրել լուսանկարներ:

Դատավոր Մնացական Մարտիրոսյանը նշեց, որ դատարանը պատրաստվում է գրավոր պատասխան ուղարկել դիմումատուին այն մասին, որ իրեն առնչվող մասով գործում մեղադրանք չկա: 

Դատախազ Վահե Դովմազյանն էլ հայտնեց, որ  նմանատիպ բովանդակությամբ դիմում Դատախազությունը ստացել է ավելի վաղ, եւ դրա առթիվ հարուցվել է քրեական գործ. «Այդ մասով նախաքննությունը չի ավարտվել, եւ դրանով պայմանավորված՝ մեղադրական եզրակացությունը իրեն չի տրամադրվել»։

Դատախազը նշեց նաեւ, որ Իսախանյանի դիմումին ժամանակին պատասխան տրվել է. «Գուցե նրան այդ պատասխանը չի հասել, կամ գուցե նա ստացել է, եւ պատասխանը նրան չի բավարարել»։

Մանրամասները՝ «Փաստինֆո»-ի տեսանյութում

Հեղինակ` Միլենա Խաչիկյան