Փաստ ինֆո

«Ես կրկին ասում եմ, որ մեր առաջադրած մեղադրանքները՝ եւ դատարան գնացած մասով, եւ անջատված մասով, հիմնավոր են»,-այսօր այս մասին լրագրողների հետ զրույցում ասաց ՀՔԾ պետ Սասուն Խաչատրյանը. «Սրանից դուրս այն գործով, որով մենք հիմա կողմ չենք հանդիսանում, կոռեկտ չեմ համարում խոսել, թող խոսեն դատախազները, պաշտպանները, քննիչները»։

Լրագրողի դիտարկմանը, թե ըստ Սեդա Սաֆարյանի՝ բավարար ապացույցներ կան, որ Գագիկ Ծառուկյանը Մարտի 1-ին սնունդ է մատակարարել, Սասուն Խաչատրյանը պատասխանեց. «Վերջին շրջանում բազմաթիվ անձանց մասին է խոսվում, ոչ միայն Գագիկ Ծառուկյանի, այլ նաեւ ուրիշ գործերով, օրինակ՝ Գագիկ Խաչատրյանի, բայց մենք սկզբունքորեն այդ մասով տեղեկություն չենք տալիս»։

Հարցին, թե Մարտի 1-ին օլիգարխների ներգրավվածության մասով կլինե՞ն արդյոք մեղադրանքներ, ՀՔԾ պետն ասաց. «Դուք ուզում եք, որ ես այս պահին կանխակալ կարծի՞ք հայտնեմ. որ պահին որ կլինի ապացույցների բավարար համակցություն՝ այս կամ այն անձի նկատմամբ քրեական հետապնդում սկսելու համար, այդ հետապնդումը կսկսվի»։

Անդրադառնալով  սպանության դրվագով Գեղամ Պետրոսյանին առաջադրած մեղադրանքին, ՀՔԾ պետը հույս հայտնեց, որ դա շղթայական ռեակցիայով կհանգեցնի մյուս սպանությունների բացահայտմանը. «Մինչ այս էլ ոչ ոք չէր խոսում, բայց ունեցանք բացահայտում»,-ասաց նա։

Հարցին, թե մտավախություն չկա՞, որ գործը ինչ-որ պահի կհայտնվի փակուղում, Սասուն Խաչատրյանը պատասխանեց. «Մտավախություններ միշտ էլ կան, բայց մենք պետք է ամեն ինչ անենք, որ նման բան տեղի չունենա։ Օգտվելով առիթից՝ ես կցանկանամ մեր քաղաքացիներին կոչ անել, որ ներկայանան ՀՔԾ եւ հայտնեն իրենց հայտնի բոլոր տեղեկությունները»։

ՀՔԾ պետը նշեց, որ մինչ այս այդպիսի քաղաքացիներ եղել են. «Մասնակիցներ են, անձինք, որոնց այս կամ այն առիթով հայտնի են դարձել որոշակի տեղեկություններ, կան նաեւ անձինք, ովքեր համագործակցում են վարույթն իրականացնող մարմնի հետ, սակայն քննության շահերից ելնելով չեմ ցանկանում նշել»։

Մանրամասները՝ տեսանյութում

Աղբյուր` Փաստինֆո