Փաստ ինֆո

ՀՀ ԱԱԾ տնօրենի ներկայացմամբ՝ ՀՀ վարչապետը ցուցում չի տվել հակաիշխանական ելույթներ ունեցող անձանց նկատմամբ ներազդելու վերաբերյալ։

«Չեմ կարծում, որ վարչապետը սկանդալային հայտարարություն է արել, չեմ կիսում այդ միտքը»,- այսօր լրագրողների հարցերին ի պատասխան հայտարարել է ԱԱԾ տնօրեն Արթուր Վանեցյանը՝ անդրադառնալով կառավարության նիստում վարչապետի սևազգեստ մարդկանց մասին հնչեցրած հայտնի հայտարարությանը։

«Եթե ուշադիր լսեիք հայտարարությունը, վարչապետը որևէ ցուցում չի տվել՝ հակաիշխանական ելույթներ ունեցող անձնաց նկատմամբ որևէ ներազդեցուն ունենալու։ Հստակ ցուցումը տրվել է, և ոստիկանությունն այս երկու օրը, ինչպես նաև ԱԱԾ-ն՝ իր մասով, կատարում են համապատասխան աշխատանքներ։ Այլ մեկնաբանություն տալ ուղղակի չեմ կարող», - նշեց ԱԱԾ տնօրենը։

Պատասխանելով սևազգեստ մարդկանց շրջանակի վերաբերյալ հարցին՝ Արթուր Վանեցյանը նշեց, որ շրջանակն իրենց պարզ է։ «Մարդիկ կան, որ քարոզում են ատելություն, քարոզում են ուժի կիրառում։ Եթե կլինեն հստակ դեպքեր, այդ անձանց նկատմամբ կիրականացվեն օրենքով մեզ տրված բոլոր լիազորությունները, որպեսզի նման անձինք մեկուսացվեն հասարակությունից», - ասաց ԱԱԾ տնօրենը։

Լրագրողներից մեկի կեսկատակ հարցադրմանը, թե բոլոր սևազգեստ մարդկանց պետք է մեկուսացնե՞ն՝ Արթուր Վանեցյանը հումորը անտեղի համարեց։

«Փորձում են կոնտեքստից դուրս բաներ ասել։ Նման բան չկա։ Այն, ինչ կա, բոլորը շատ լավ հասկանում են։ Պետք չէ բառախաղի միջոցով սենսացիաներ փնտրել։ Շրջանակը կբացվի, երբ կլինեն մարդիկ, որոնք կանեն ինչ-ինչ արարքներ և բերման կենթարկվեն։ Եթե կլինի հանցակազմ, կհարուցվի քրեական գործ, և բոլորն այդ մասին բոլորը կտեղեկանան», - նշեց ԱԱԾ տնօրենը։

Աղբյուր` Փաստինֆո