Փաստ ինֆո

Ինձ համար տարօրինակ է, երբ ՀՀ վարչապետն այդպես քամահրանքով է արտահայտվում քաղաքական ուժերի նկատմամբ: ‹‹Փաստինֆո››-ի թղթակցի հետ զրույցում ասաց ՀՀ արդարադատության ակադեմիայի նախկին ռեկտոր  Ռուբեն Մելիքյանը՝ անդրադառնալով ՀՀ վարչապետ Նիկոլ Փաշինյանի հունիսի 6-ի հայտարարությանը, որ լուսանցքում հայտնված որոշ քաղաքական ուժեր բռնության կոչեր են անում  և փորձում ատելությամբ քաղաքական որոշ հարցեր լուծել:

Մելիքյանը նշեց, որ 2018թ.-ի դեկտեմբերին տեղի ունեցած Ազգային ժողովի  արտահերթ ընտրություններն անկախ դրանց ընթացքին տրված դրական գնահատականներից, կարևոր առանձնահատկություն ունեին, և  դա քաղաքական ուժերի անբավարար պատրաստությունն ու հապշտապ կազմակերպելն էր՝ ավագանու ընտրության բարձր արդյունքների ֆոնի ներքո:

‹‹Այս տեսանկյունից ես չեմ կարծում, որ ճիշտ է իշխող քաղաքական ուժի կողմից քամահրանքով արտահայտվել քաղաքական այլ ուժերի նկատմամբ, առավել ևս, որ քաղաքական համակարգը այդպես էլ չկարողացավ հարմարվել նոր իրավիճակին››,-ասաց Մելիքյանը:

Նրա խոսքով, այս շրջանում նոր քաղաքական ուժեր են ձևավորվում և ցանկացած քաղաքական ուժին քամահրանքով վերաբերվելը չի համապատասխանում ժողովրդավարության ոգուն:

Մելիքյանն ընդգծեց՝ բռնության քարոզի հարցը դեռ 2018թ-ի ապրիլ-մայիս ամիսներին էր շատ արդիական, և այդ ժամանակ իշխող քաղաքական ուժի ներկայացուցիչները օգտվում էին բռնության քարոզի պտուղներից:

‹‹Ես արդարացի և սկզբունքային չեմ համարում, որ վարչապետը բռնության քարոզի և ատելության խոսքի մասին խոսում է այն պայմաններում, երբ կարճ ժամանակ առաջ փաստացի օգտվում էր սկզբունքորեն անթույլատրելի երևույթի պտուղներից: Բացված դուռը ոչ միայն քեզ ցանկալիներին է ներս թողնում, այլև անցանկալիներին, և մենք հիմա դրա ականատեսն ենք››,-նշեց ԱՀ նախկին ՄԻՊ-ը:

Նա սկզբունքորեն բռնության քարոզն ու ատելության խոսքն անթույլատրելի համարեց, սակայն նշեց, որ դրան պետք է ճիշտ համատեքստ տալ ու այդ հորդորը պետք է վերաբերի բոլորին:

‹‹Իմ պատկերացմամբ այսօր ատելության խոսք տարածողներն առավելապես հենց Փաշինյանի կողմնակից ներկայացողներն են: Դրա մասին են վկայում սոցիալական ցանցերի ամենապարզ մոնիթորինգը››,-ասաց Ռուբեն Մելիքյանը:

Նախկին ՄԻՊ-ը նշեց, որ իրավիճակը փոխվում է, և հանրությունը՝ չտեսնելով իրեն տրված խոստումների իրականացումն, արդեն իսկ սովորական դարձած գործիքակազմը աստիճանաբար ուղղում է իշխող քաղաքական ուժի ներկայացուցիչների դեմ:

‹‹Վարչապետի, եթե կարելի է այդպես արտահայտվել, պոռթկումը ես պայմանավորում եմ այս միտումը տեսնելու հետ: Բայց նորից ասեմ, դա արդարացի միտում չէր››,-ասաց Մելիքյանը:

Անդրադառնալով Փաշինյանի կողմից դավադիր ուժերի մասին հնչող հայտարարություններին՝ Ռ.Մելիքյանը կարծիք հայտնեց, որ ինչ-որ թյուրիմացության և ընկալումների խնդիր կա:

‹‹Կարող են լինել որոշակի տարաձայնություններ եւ դա նորմալ է, բայց Փաշինյանը լրիվ այլ բանի մասին էր խոսում, և կարծում եմ ավելի շատ գործ ունենք թյուրիմացության հետ, քան ինչ-որ դիտավորյալ գործունեության: Այստեղ խնդիրն ավելի շատ ընկալումներին է վերաբերում››,-ասաց Մելիքյանը:

Նրա խոսքով, ցավալի է, որ վարչապետը նման խնդիրները լրատվամիջոցների միջոցով է բարձրաձայնում և ոչ թե անմիջականորեն, որի բոլոր հնարավորություններն ունի:

Մելիքյանն ողջյունեց ԱՀ նախագահի զուսպ և հավասարակշիռ արձագանքը վարչապետի հայտարարություններին ու ասաց, որ նմանատիպ հայտարությունները հանրության մոտ սխալ պատկերացում են ստեղծում Արցախում գոյություն ունեցող տրամադրությունների վերաբերյալ:

‹‹2017-18թթ. մեծ ջանքեր էին գործադրվել, որպեսզի բուժվեր այդ ներազգային խայտառակ պառակտման վերքը, և հիմա մենք տեսնում ենք, որ այդ վերքը նորից բաց է և նորից վտանգ է ստեղծում մեր համազգային խնդիրների համար››,- Նկատեց Ռ.Մելիքյանը, որը 2016 թվականի ապրիլյան պատերազմից հետո  հրաժարական տվեց ՀՀ արդարադատության ակադեմիայի ռեկտորի պաշտոնից եւ նշանակվեց Արցախի ՍԻՊ։

«Փաստինֆո»-ի հարցին ի պատասխան Ռուբեն Մելիքյանն անդրադարձավ նաև ԱՀ նախագահի հասցեին Երեւանի Ազատության հրապարակում սպառնալիքներ հնչեցնելու դեպքին, որի առթիվ ոստիկանությունը քրգործի հարուցումը մերժեց՝ հանցակազմի բացակայության հիմքով։

‹‹Չեմ սիրում քաղաքական հարթությամբ խոսել իրավական երևույթների վերաբերյալ: Իմ անձնական կարծիքով՝ այդ երիտասարդի գործողությունները 1000 անգամ անթույլատրելի են բարոյական տեսակետից, բայց մեր իրավական համակարգի տեսանկյունից և քրեական իրավունքի տեսանկյունից ես այն կարծիքին չեմ, որ դրանք հանցակազմ են պարունակում››,-ասաց Մելիքյանը՝ ավելացնելով. «Ես ուսումնասիրել  և եկել եմ այն հետևությանը, որ այդ ատելության, թշնամանքի, խայտառակ խոսքը, այնուհանդերձ հանցակազմ չի պարունակում: Եվ այս առումով ես իրավապահների հետ համաձայն եմ»:

Հեղինակ՝ Սոնա Գեւորգյան

Աղբյուր` Փաստինֆո