Փաստ ինֆո

«Հանցագործության գործիք հանդիսացող զենքը գործում առկա չէ»,-այս մասին «Փաստինֆո»-ի հետ զրույցում ասաց «Մարտի 1»-ի գործով մեղադրյալ Գեղամ Պետրոսյանի պաշտպան Վաղարշակ Գեւորգյանը. «ՀՔԾ-ին այդպես է ձեռնտու եղել, մեղադրանք է առաջադրել»,-ասաց նա։

Հարցին, թե կա՞ արդյոք անձ, ով ցուցմունք է տվել Գեղամ Պետրոսյանի դեմ, պաշտպանը պատասխանեց. «Մի հոգի կա, սակայն նրա հայտնած տեղեկություններով, անկախ նրանից, թե ում է վերագրվում, սպանության մասին խոսք լինել չի կարող»։

Վաղարշակ Գեւորգյանի խոսքով՝ քննիչը գտել է, որ նա կատարել է առանձնապես ծանր հանցագործություն, եւ ազատության մեջ մնալու դեպքում կարող է խոչընդոտել գործի քննությանը. «Խափանման միջոցի հիմնավոր լինել-չլինելու հետ կապված հրապարակային որեւէ բան չեմ ուզում ասել, քանի դեռ Վերաքննիչ բողոքը չեմ գրել, բայց որոշումը ստանալուց հետո բողոքարկելու եմ։»

Անդրադառնալով փաստին, որ դատարանը իրավաչափ է համարել ձերբակալման որոշումը, պաշտպանն ասաց, որ ինքն այլ բան չէր սպասում. «Ուրիշ ի՞նչ պետք է աներ դատարանը, պետք է ասեր, թե հիմնավոր կասկածը բացակայո՞ւմ է, եւ ինքը խափանման միջոց կալանավորումը չի՞ ընտրում, ո՞ր դատավորը նման բան կաներ։ Ասեմ Ձեզ՝ ձերբակալման արձանագրությունը դեռ չէր ստորագրվել, ՀՔԾ-ն արդեն հրապարակեց, որ այդ հոդվածով սահմանված արարք կատարելու համար այսինչ մարդն է ձերբակալվել, մենք դեռ չէինք հասցրել ստորագրել»։

Հիշեցնենք, որ Գեղամ Պետրոսյանին մեղադրանք է առաջադրվել ՀՀ քրեական օրենսգրքի 104-րդ հոդվածի 1-ին մասի հատկանիշներով 2008 թվականի մարտի 1-2 ընկած ժամանակահատվածում Զաքար Հովհաննիսյանին սպանելու համար: Հունիսի 4-ին նա ձերբակալվել էր այդ արարքի կասկածանքով, իսկ երեկ՝ հունիսի 6-ին՝ կալանավորվել։

Ինչ վերաբերում է Զաքար Հովհաննիսյանին, նա հրազենային վնասվածք էր ստացել որովայնի շրջանում՝ 2008 թվականի մարտի 1-ի ուշ երեկոյան՝ Մաշտոցի պողոտայի մոտակայքում Մակարով տեսակի ատրճանակից արձակված կրակոցի հետեւանքով։

Հեղինակ` Միլենա Խաչիկյան