Փաստ ինֆո

«Ինձ համար, անկեղծ ասած, անսպասելի էր Արդարադատության նախարարի հրաժարականը, եւ միայն այն հանգամանքը, որ այս հրաժարականը ներկայացվել է այն ժամանակ, երբ երկրի վարչապետը երկրում չէ, իսկ դատաիրավական համակարգի  փոփոխությունների վերաբերյալ հասարակական քննարկումները գտնվում են առաջնային շարքերում, խոսում  է այն մասին, որ այդ հրաժարականի հիմքում կան խորքային պատճառներ»,- «Փաստինֆո»-ի հետ զրույցում այս կարծիքը հայտնեց փաստաբան Նորայր Նորիկյանը։

Այդ խորքային պատճառներից, ըստ նրա, կարող են լինել այնպիսի անհամատեղելի տեսակետներ, որոնք առկա են վարչապետի կամ գործող քաղաքական ուժի եւ Արդարադատության նախարարի պատկերացումների միջեւ կամ Արդարադատության նախարարության որեւէ ոլորտում իրականացվող որեւէ գործընթացի տապալումը. «Իհարկե, սրանք սոսկ ենթադրություններ են, որոնց մասին ընդամենը կարող եմ իմ սեփական պատկերացումներն ունենալ, բայց շատ լավ կլիներ, որ Արդարադատության արդեն հրաժարական ներկայացրած նախարարը ներկայացներ իր հրաժարականի դրդապատճառները եւ հիմնավորումները, որովհետեւ հանրությունը իրավունք ունի իմանալու, թե ընդամենը մի քանի ամիս առաջ նշանակված նախարարը ինչու է հրաժարական տվել»։

Նորայր Նորիկյանն ընդգծեց՝ դատաիրավական համակարգում առկա են մի շարք խնդիրներ, եւ այդ մասին երկրորդ կարծիք չի կարող լինել. «Ես կարծում եմ, որ Արդարադատության նախարարը այն անկյունաքարային նախարարությունն է, որ առաջիկա տարիների ընթացքում պետք է դառնա դատաիրավական համակարգի բարեփոխումների լոկոմոտիվը, ստանձնի հանրային կյանքում դատաիրավական համակարգին վերաբերող բոլոր ոլորտների քաղաքականության մշակողի ու իրականացնողի այդ պատասխանատվության բեռը»։

Դիտարկմանը, թե հրաժարականից հետո շրջանառվում է երկու թեկնածուի՝ «Իմ քայը» խմբակցության պատգամավոր Նիկոլայ Բաղդասարյանի եւ ՊԵԿ նախագահի տեղակալ Ռուստամ Բադասյանի անունները, Նորայր Նորիկյանն ասաց, որ ձեռնպահ կմնա որեւէ մեկի անհատական որակները քննարկելուց, սակայն նրա կարծիքով՝ ով էլ լինի, նրա ուսերին ծանր բեռ է, եւ նա պետք է կարողանա դրսեւորել քաղաքական կամք, քաղաքացիական խիզախություն եւ վճռականություն՝ իրականացնելու համար ՀՀ առջեւ ծառացած խնդիրները. «Նոր նախարարը պետք է լինի առաջնորդվող այն արժեքային համակարգով, որն այսօրվա չափանիշներին համապատասխանում է. լինի վճռական, անկաշառ, «ոչ» ասելու հատկություն ունենա, կարողանա անհրաժեշտության դեպքում բռունցքը սեղանին խփելով հարց լուծել, եւ ընդհանրապես, միտված լինի իսկապես բարեփոխումներ իրականացնելու, ունենա այդ բարեփոխումների տեսլականը, ցույց տա ճանապարհային քարտեզ, մանդատ խնդրի կառավարությունից եւ վերջինս էլ տա իրեն հնարավորությունը՝ ազատ գործելու, փոփոխություններն առաջ տանելու համար, եւ ես հույս ունեմ, որ ամեն դեպքում ճիշտ որոշում կկայացվի»։

Նորայր Նորիկյանը նշեց, որ այս հրաժարականը մեկ անգամ եւս փաստում է, որ  մենք իսկապես գործ ունենք դատաիրավական համակարգի լրջագույն խնդիրների հետ, որոնք ունեն լուծման հրատապ անհրաժեշտություն. «Այդ խնդիրներն են քրեակատարողական հիմնարկները, դատական իշխանության նկատմամբ հանրության վստահության վերականգնումը, ընդհանրապես, դատաիրավական ոլորտի բարեփոխումները»,-ասաց փաստաբանը։

Հեղինակ` Միլենա Խաչիկյան