Փաստ ինֆո

«2018թ.-ին տնտեսական աճը նախնական ցուցանիշի՝ 4.5 տոկոսի փոխարեն կազմել է 5.2 տոկոս։ Այն դեպքում, երբ համաշխարհային տնտեսությունն աճել է 3.6 տոկոս, Եվրամիությունում 2.1 տոկոս», - այս մասին ասաց Ֆինանսների նախարար Ատոմ Ջանջուղազյանը՝ ներկայացնելով 2018թ.-ի պետբյուջեի կատարողականի նախնական քննարկման ժամանակ։

Նախորդ տարի գրանցված տնտեսական աճի մեջ գերակշիռ դեր ունի ծառայությունների ոլորտը՝ 4.8 տոկոս։ Մյուս ոլորտների հետ սպասումները դեռ չեն կատարվել։

«Դա մեզ հուշում է, որ մեր հայտարարած նպատակներն իրականացնելու համար պետք է ջանք թափենք, որ փոխվի տնտեսության կառուցվածքը։ Իսկ 2018թ.-ի համար ունենք այն, ինչ ունենք», - ասաց նախարարը։
2018թվականին գնաճը կազմել է 2.5 տոկոս, ինչը ֆինանսերի նախարարը պայմանավորում է ոչ պարենային ապրանքների գների աճով։ Խոսելով միջին ամսական աշխատավարձի ցուցանիշներին՝ Ատոմ Ջանջուղազյանն ընդգծեց, որ պետական հատվածում այն շարունակում է մնալ ավելի ցածր, քան մասնավոր հատվածում է.

«Միջին ամսական աշխատավարձը 172 727 դրամ է։ Գործազրկության մակարդակը նվազել է 1.5 տոկոսային կետով՝ կազմելով 16.3 տոկոս», - հայտնեց Ֆինանսերի նախարարը՝ ավելացնելով, որ արտահանումը նախորդ տարի աճել է 8.4 տոկոսով, իսկ ներմուծումը՝ 15.3 տոկոսով։

Նախքան թվային տվյալներին անդրադանռալը՝ նախարարն առանձնացրեց 2018 թվականը բնութագրող մի քանի առանձնահատկություններ, որոնցից մասնավորապես կարևորեց երկրում իրականացված քաղաքական փոփոխություններն ու 2018թ.-ի հունվարի 1-ից Հարկային օրենսգրքի ուժի մեջ մտնելու հանգամանքը։

Աղբյուր` Փաստինֆո