Փաստ ինֆո

Հատուկ քննչական ծառայությունը ստացել է փաստաբան Ալեքսանդր Սիրունյանի` Դատախազության կողմից իրենց ուղարկված հաղորդումը: Այս մասին «Փաստինֆո»-ին հայտնեց ՀՔԾ մամուլի խոսնակ Մարինա Օհանջանյանը:

Վերջինիս խոսքով` Սիրունյանի հաղորդման հիման վրա նյութեր են նախապատրաստվում:

Ավելի վաղ հայտնել ենք, որ փաստաբան Ալեքսանդր Սիրունյանի հաղորդումը Դատախազությունն ուղարկել էր ՀՔԾ` կցելու այնտեղ եղած հաղորդմանը: Ինչ վերաբերում է դատավոր Դավիթ Գրիգորյանի հաղորդմանը, Դատախազության հանրային կապերի բաժնի պետ Արեւիկ Խաչատրյանը «Փաստինֆո»-ին հայտնել էր, որ այն ուղարկվել է Ազգային անվտանգության ծառայություն` ստուգման:

Ի պատասխան «Փաստինֆո»-ի այն հարցին` արդյո՞ք ԱԱԾ-ն ստացել է հաղորդւոմը, եւ իրականացվե՞լ է արդյոք ստուգում, ԱԱԾ մամուլի խոսնակ Սամսոն Գալստյանն ասաց. «Գրավոր հարցում ուղարկեք` կպատասխանենք»:

Հիշեցնենք, որ դատավորը հաղորդում էր ներկայացրել ՀՀ գլխավոր դատախազին՝ պահանջելով քրեական գործ հարուցել կաշառք տալու-ստանալու կամ իր նկատմամբ սուտ մատնություն կատարելու դեպքի առթիվ։ Ենթադրյալ կաշառքի մասին գրառումներով էր հանդես եկել փաստաբան Ալեքսանդր Սիրունյանը։

Աելի ուշ հաղորդում էր ներկայացրել նաեւ Ալեքսանդր Սիրունյանը՝ նշելով, թե Ռոբերտ Քոչարյանի և այլոց գործով դատավոր Դավիթ Գրիգորյանի կողմից կայացված դատական ակտն ապօրինի է և կայացվել է դատավորի կողմից իր լիազորությունների ակնհայտ խախտմամբ։

Հեղինակ` Միլենա Խաչիկյան