Փաստ ինֆո

Ես 19տարեկան եմ եղել եւ իմ հազարավոր համակուրսեցիների հետ  1988թ.-ին Ազատության հրապարակում միացում-միացում ենք վանկարկել, իմ հազարավոր ընկերներ Արցախյան հերոսամարտին են մասնակցել և նահատակվել, որ այսօր ինչ-որ կենսագրություն չունեցող, մանրախնդիր երիտասարդ իրեն թույլ տա Արցախը նվաստացնի՞: Այսօր Ոստիկանության շենքի դիմաց ասաց դաշնակցական գործիչ, «Երկիր մեդիա» հեռուստաընկերության լրատվական և հասարակական-քաղաքական հաղորդումների տնօրեն Գեղամ Մանուկյանը:

Հիշեցնենք, որ ֆեյսբուքյան օգտատեր Վ. Հարությունյանը հունիսի 3-ին հաղորդում էր տվել ոստիկանություն, որ  շենքի բակում անհայտ անձինք ձեռքերով հարվածներ են հասցրել իր դեմքին և գլխին՝ պատճառելով վնասվածք: 

Ապա ՀՅԴ անդամ Գեղամ Մանուկյանն իր ֆեյսբուքյան էջում գրել էր, որ Վարդան Հարությունյանին ինքն է ծեծել ու գնացել ոստիկանություն: Նման հայտարարությամբ հանդես են եկել նաեւ այլ դաշնակցական երիտասարդներ՝ կազմակերրպելով յուրօրինակ ֆլեշմոբ: Նրանցից յուրաքանչյուրը ներկայանում է ոստիկանության բաժին և  ասում է, որ ինքն է ծեծել Վ. Հարությունյանին:

«Մի մանրախնդիր երիտասարդ իրեն թույլ է տալիս Արցախը նվաստացնել, Արցախի հոգևոր առաջնորդ Պարգև սրբազանի մասին ամենավերջին թուրքաբարո տերմիննե՞րն օգտագործել: Ադրբեջանցիներն են այդ բառերն օգտագործում, և այդ ամբողջը սոցիալական ցանցերում է: Որևէ մեկը դեմը չի առնում, խրախուսվում են, անունները դարձել են ակտիվիստ: Նման դեպքերից մեկն էլ Հրանտ Մարգարյանի հետ էր կատարվել: Եվ այս ամեն ինչը հանդուրժվում է: Չեղավ մի քաղաքական գնահատական: Դրա համար ես եմ ծեծի ենթարկել, որը ծեծ էլ չէ, ապտակ է ուղղակի: Պետք է սաստվի սա: Եվ գիտեմ, որ հիմա շատ երիտասարդներ ներկայացել և ասել են, որ` մենք ենք հեղինակը: Որևէ ձևով այլևս զսպում չկա: Սա այն ազդակն է, որ մարդիկ անդրադառնան, թե ինչ է կատարվում»,- ասաց նա:

Մանուկյանի պնդմամբ` մարդու պատասխանատվությունն իր լեզվին տիրությունն անելն է:  «Այդ հայհոյանքները երիտասարդն ասում է տարբեր առիթներով, տարիներ շարունակ: Մի օր սրան պետք է հասցներ: Նրա կողմնակիցներին էլ առիթ եմ ունեցել ասելու` ներողություն թող խնդրի: Այդ տղան շարունակում է նույն հայհոյանքները: Կան սահմաններ հայ ժողովրդի մեջ: Այդ տղան սահմանից այն կողմ էլ է անցել»,- նշեց նա:

Նրա խոսքով, այս ամենին քաղաքական գնահատական չտրվեց, սաստող, մեծական խոսք չասվեց  և դրա համար է ինքը ծեծի ենթարկել:

‹‹Ծեծ էլ չէ, ուղղակի ապտակ է, որ պետք է սաստվի սա››,-ասաց Մանուկյանը:

Նա նշեց, որ բազմաթիվ երիտասարդներ ոստիկանություն են ներկայացել և հիմա էլ ներկայանում են, ու նրանցից յուրաքանչյուրն ասում է, որ ինքն է հեղինակը:

Լրագրողի հարցին, դու՞ք եք այն մարդը, որ հայրաբար պետք է ապտակեր, Մանուկյանը պատասխանեց. ‹‹Կարծում եմ Հայաստանի կեսը հայրաբար նրան կապտակեր բառերի համար››:

Աղբյուր` Փաստինֆո