Փաստ ինֆո

«Թավշյա հեղափոխության օրերին ու դրան հաջորդած ժամանակաշրջանում մենք չենք ունեցել ֆինանսական ցնցումներ, մեզ մոտ ֆինանսական շուկան չի փլուզվել, մենք չենք ունեցել փոխարժեքի տատանումներ և այդ գործում մեծ է Կենտրոնական բանկի դերը», - Ազգային ժողովում ասաց տնտեսական հանձնաժողովի նախագահ Բաբկեն Թունյանը՝ ավելացնելով, որ քաղաքական փոփոխությունների հետևանքով ԿԲ ղեկավարության փոփոխությունից կտուժեր ֆինանսական շուկան։

Պատգամավորը, անդրադառնալով  ԿԲ-ի գործունեության վերաբերյալ ներկայացված տարեկան հաղորդմանը, հակադարձեց այն պատգամավորներին, որոնք պնդում են՝  կենտրոնական բանկը չպետք է գնաճ զսպի, - «ԿԲ-ի հիմնական գործը հենց գնաճ զսպելն է, գների ու ֆինանսական կայունության ապահովումը»։

ԱԺ տնտեսական հանձնաժողովի նախագահը նաև կարևորեց Կենտրոնական բանկի և կառավարության կոորդինացված աշխատանքը, որպեսզի միաժամանակ և՛ գները կայուն լինեն, և՛ ապահովվի տնտեսական աճ։ Նրա խոսքով այդ երկու կառույցների միջև պետք է լինի առողջ բախում ու բանավեճ։

Բաբկեն Թունյանն անհիմն համարեց Կենտրոնական բանկին առանձին ապրանքների գների բարձրացման մեջ մեղադրելը, քանի որ վերջինս պատասխանատու է գների ընդհանուր մակարդակի համար, - «Առանձին ապրանքների՝ կարտոֆիլ, ձուկ, բենզին և այլն պատասխանատու է ՏՄՊՊՀ-ն։ Հարցի հասցեատերերին չպետք է խառնել»։

Աղբյուր` Փաստինֆո