Փաստ ինֆո

«Սա օրենքի մի նախագիծ է, որից բոլոր կողմերը դժգոհ մնացին. և՛ տեղական արտադրողները, և՛ ներմուծողները, և՛ շինարարները, ինչը նշանակում է, որ բալանսավորված որոշում է», - այսօր լրագրողների հետ զրույցում ասաց Տնտեսական հանձնաժողովի նախագահ Բաբկեն Թունյանը։ Ներկրվող ցեմենտի վրա պետական տուրք սահմանելու նախագիծն այսօր երկրորդ ընթերցմամբ ամբողջությամբ ընդունվեց ԱԺ-ում։ Նախագծի քվեարկությանը զուգահեռ Ազգային ժողովի շենքի մոտ բողոքի ակցիա էին իրականացնում կառուցապատողներն ու մի խումբ շինարարական ընկերություններ։ Վերջիններս պահանջում էին կա՛մ դեմ քվեարկել նախագծին, կա՛մ հանել այն քվեարկությունից և կրկին մանրմասնորեն ուսումնասիրել խնդիրը։ Բողոքողների հետ քվեարկությունից հետո հանդիպել էր  տնտեսական հանձնաժողովի նախագահ Բաբկեն Թունյանը։ Վերջինս  նշում է, որ կառուցապատողների  բողոքը մասնավորապես կապված էր օրենքի ուժի մեջ մտնելու ժամկետի հետ։

 «Պետք է վեց ամիս ժամանակ տրամադրեին, որպեսզի նրանք ադապտացվեին, բայց այդ ընթացքում տեղական արտադրողները կարող էին պարզապես սնանկանալ», - ասաց Բաբկեն Թունյանը՝ այդ հրատապությունը պայմանավորելով  տեղական արտադրողին պաշտպանելու հետ։

Կառուցապատող կազմակերպության ներկայացուցիչ Գևորգ Դանիելյանն ավելի վաղ «Փաստինֆո»-ի հետ զրույցում  ընդգծել էր  այն փաստը, որ այս նախագծով հարկային օերնսգրքում փոխվելու է նաև մեկ այլ կետ, - «Նախագծով ստեղծվում է նախադեպ, որ օրենքի ուժի մեջ մտնելու 6-ամսյա ժամկետը դառնում է 10 օր։ Այսինքն յուրաքանչյուր նախագիծ հնարավորություն ունի պետական տուրք սահմանել 10 օր հետո»։

Բողոքի ակցիայի կազմակերպիչները համակարծիք չէին նաև սահմանված տուրքի չափին՝ պնդելով, որ չի տպետտուրք սահմանել՝ հիմք ընդունելով արտադրողների ներկայացրած թվերը։

Այս մասին տնտեսական հանձնաժողովի նախագահն ասաց, որ ի սկզբանե արտադրողներն առաջարկել էին 30 հազար դրամ, որը կառավարությունում քննարկումների արդյունքում իջեցվել էր 22հազար դրամի, - «հանձնաժողովում իրական ինքնարժեքը հաշվի առնելով՝ հասկացանք, որ 14հազար դրամը նորմալ  չափ է»։

Բաբկեն Թունյանը նաև ավելացրեց, որ կառուցապատողների հետ հանդիպման ժամանակ նրանց են ներկայացրել բոլոր թվերն ու հիմնավորումները, ինչպես նաև վստահեցրել, որ մաքսազերծության հետ կապված որևէ խնդիր չեն ունենա։

Աղբյուր` Փաստինֆո