Փաստ ինֆո

«Սույն դատարանի դատավոր Մխիթար Պապոյանը մամուլով հանցագործության մասին հաղորդում է ներկայացրել՝ սուտ մատնության վերաբերյալ, եւ այն անձը, ով մեր անունը կապում էր դատավոր Դավիթ Գրիգորյանի կողմից վերջերս կայացված դատական ակտը գրելու հետ, հրավիրվել է ԱԱԾ, որտեղ էլ պարզաբանումներ են պահանջել իրենից»,-այս մասին դատարանի դահլիճում հայտարարեց Վերաքննիչ քրեական դատարանի նախագահ Վազգեն Ռշտունին, ով այսօր քննում է Ռոբերտ Քոչարյան անձեռնմխելիության հիմքով բողոքի գործը։

Դատավորը կողմերին խնդրեց ներկայացնել իրենց կարծիքը կատարվածի վերաբերյալ։

Դատախազ Կարեն Բիշարյանն ասաց, որ եթե անձի ԱԱԾ հրավիրված լինելու հանգամանքն էլ հաստատված չհամարեն, ապա միայն հաղորդում ներկայացնելը բավարար է փաստելու համար, որ քրեադատավարական ընթացակարգ է անցել կամ անցնելու է, ուստի քանի դեռ այդ հանգամանքներին իրավակական գնահատական տրված չէ, անձամբ ինքը զերծ կմնա դրա վերաբերյալ դիրքորոշում հայտնել։

Քննիչ Մուշեղյանն էլ միացավ դատախազին՝ նշելով, որ հաղորդում ներկայացնելը ենթադրում է նյութերի նախապատրաստում. «Եվ լինելով քննիչ՝ ես ենթադրում եմ, որ պարզաբանումներ ստանալու անհրաժեշտություն կլինի նաեւ ձեզնից»,-ասաց նա դատավորին։

Պաշտպանների ելույթից հետո դատավորը հայտնեց, որ հեռանում է խորհրդակցական սենյակ, եւ որոշումը կհրապարակի պատրաստ լինելուն պես։

Հիշեցնենք, որ դատավոր Դավիթ Գրիգորյանի որոշման հրապարակումից հետո մամուլում տեղեկություն տարածվեց, թե այդ որոշումը գրվել է ոչ թե Դավիթ Գրիգորյանի, այլ դատավորներ Վազգեն Ռշտունու, Մխիթար Պապոյանի եւ  Արշակ Վարդանյանի կողմից։

Մանրամասները՝ տեսանյութում

Աղբյուր` Փաստինֆո