Փաստ ինֆո

Ազգային անվտանգության ծառայության դիմումի հիման վրա փաստաբան Ինեսսա Պետրոսյանի նկատմամբ կարգապահական վարույթ չի հարուցվել։ Այս մասին «Փաստինֆո»-ն տեղեկացավ Փաստաբանների պալատի մամուլի խոսնակ Հայկ Հակոբյանից: «Որոշում է կայացվել մերժել փաստաբան Ինեսսա Պետրոսյանի նկատմամբ կարգապահական վարույթ հարուցելը՝ կարգապահական վարույթ հարուցելու հիմքի բացակայության պատճառով»,-փոխանցեց Հակոբյանը:

Նրա խոսքով՝ պալատը հաշվի է առել այն հանգամանքը, որ Դիմողը՝ այս դեպքում ԱԱԾ-ն, եւ քրեական գործով մեղադրյալ Դավիթ Սանասարյանի պաշտպան Ինեսսա Պետրոսյանը քրեական գործով գտնվում են տարբեր՝ մեղադրանքի և պաշտպանության կողմերում, ինչի պայմաններում ունեն գործի վերաբերյալ հակադիր կարծիքներ և մոտեցումներ. «Մրցակցային դատավարության պայմաններում դատավարական հակադիր կողմերի կարծիքների բախումը, ներառյալ որոշակի սուր դրսևորումներով, ipso facto չի կարող հանդիսանալ փաստաբանի էթիկայի խախտում՝ որոշակի ծանրացնող հանգամանքների բացակայության պայմաններում, որպիսիք առերևույթ սույն դեպքում առկա չեն»-մեզ հետ զրույցում ասաց Հայկ Հակոբյանը:
Հիշեցնենք, որ Դիմողը փաստաբան Ինեսսա Պետրոսյանին վիճարկում էր 2019 թվականի ապրիլի 19-ին՝ժամը 16:02-ին, «Ֆեյսբուք»սոցիալական ցանցում Դիմողի կողմից քննվող և Ինեսսա Պետրոսյանի վստահորդին վերաբերող գործի կապակցությամբ այնպիսի գրառման կատարման մեջ,  որը, ըստ Դիմողի, պարունակում է իր հասցեին վիրավորանք և իրականությանը չհամապատասխանող տեղեկություններ. «Սրա վերաբերյալ Պալատը գտել է, որ գործելով հրապարակային ասպարեզում և հանդիսանալով միջնորդ հասարակության և դատական իշխանության միջև՝ հասարակության և պետական մարմինների միջև, ինչպես նաև գործելով ի շահ իր վստահորդի՝ փաստաբանը կարող է իր մասնագիտական կարծիքն ու մտահոգությունները հրապարակայնորեն հայտնել իր վստահորդի գործով պետական մարմինների ենթադրյալ վարքագծի և հնարավոր խախտումների վերաբերյալ»,-փոխանցեց Հայկ Հակոբյանը՝ հիշատակելով «Փաստաբանի վարքագծի»կանոնագրքի ենթակետերը, որոնցից եւս, ըստ Պալատի, բխում է վերոնշյալ եզրահանգումը. «Կանոնագրքի 2.1 ենթակետից պարզ է դառնում, որ «Իր մասնագիտական գործունեությունն իրականացնելիս փաստաբանը պետք է անկախ լինի…» և Կանոնագրքի 4.1 ենթակետից, ըստ որի՝ «… փաստաբանը… պետք է իր վստահորդի շահերը պաշտպանի անկաշկանդ և անվախ՝ հաշվի չառնելով իր անձնական շահերը կամ ցանկացած հետևանքները, որոնք կպատահեն իր կամ ցանկացած այլ անձի հետ:»

Պալատը գտել է նաեւ, որ կարգապահական վարույթի հարուցման հիմք չի կարող լինել միայն ենթադրյալ խախտման մասին դիմողի պնդումը, որը հիմնավորված չէ այնպիսի հանգամանքների վկայակոչմամբ և (կամ) ապացույցներով, որոնք կվկայեն փաստաբանի կողմից կարգապահական խախտման հնարավոր կատարման մասին:
 
Այսպիսով՝ Պալատը եզրահանգել է, որ փաստաբան Ինեսսա Պետրոսյանի ֆեյսբուքյան գրառումը չի պարունակել Դիմողին վիրավորող կամ կեղծ տեղեկատվություն, այլ պարունակել է իր վստահորդի գործով Դիմողի նկատմամբ քննադատություն, որը վերաբերել է, փաստաբանի կարծիքով, բացասական իրավական երևույթների, այլ ոչ թե կոնկրետ անձանց՝ տեղավորվելով իր մասնագիտական և հասարակական կարգավիճակի բնույթով պայմանավորված փաստաբանի խոսքի ազատության թույլատրելի սահմաններում:

Հեղինակ` Միլենա Խաչիկյան