Փաստ ինֆո

«Փորձում ենք հնարավորություն տալ մարզաբնակ քաղաքացիներին երկրորդային շուկայից բնակարան ձեռք բերելու դեպքում հիպոտեկի համար վճարման տոկոսների չափով հետ ստանալ եկամտահարկը», - այս մասին «Փաստինֆո»-ի հետ զրույցում ասաց «Լուսավոր Հայաստան» խմբակցության պատգամավոր Արկադի Խաչատրյանը։

Նրա փոխանցմամբ՝ խմբակցությունը մշակել է Հարկային օրենսգրքում լրացում եւ փոփոխություն կատարելու մասին օրենքի նախագիծ, որը նախատեսում է մարզերի բնակիչներին հնարավորություն տալ օգտվելու հիպոտեկի պայմանագրի տոկոսների փոխհատուցման արտոնությունից՝ երկրորդային շուկայից բնակարան ձեռք բերելու դեպքում։

Հարկային օրենսգրքի 160-րդ հոդվածով տրված հնարավորությունը փաստացի գործում է բացառապես մայրաքաղաքի մասով՝ պատգամավորի խոսքով ստացվում է, որ մարզերի բնակիչներին չեն ապահովում օրենքի այդ գործունեությամբ, - «Բազմիցս խոսում ենք, որ մարդկանց պետք է խթանենք, որպեսզի աշխատեն, ապրեն ու արարեն իրենց հողում, հայրենի քաղաքում, այլ ոչ թե բոլորը կենտրոնանան Երևանում»։ Արկադի Խաչատրյանի վստահեցմամբ նախագծով փորձում են լուծել ստեղծված անարդար իրավիճակը։ Արդյունքում բարձր աշխատավարձ ստացող մարդն, ով ուզում է հետ ստանալ եկամտահարկը, ստիպված չի լինի Երևանում բնակարան գնել։

Հարցին՝ կքննարկվի արդյոք քաղաքացիների այն դժգոհությունը, որ քաղիրավական պայմանագրով աշխատողները ևս եկամտահարկով հիպոտեկը մարելու հնարավորություն ստանան, ԼՀ խմբակցության պատգամավորն ասաց, որ նման հարցադրումների և մտահոգությունների դեպքում մինչև հանձնաժողովի հաջորդ նիստն ընկած ժամանակահատվածը կքննարկեն։ «Պետք է գնահատել նախագծի ընդունման հետևանքով պետության համար առաջարկվող ծախսերի ծավալը, արդյոք պետությունն ի զորու է նման ծախսեր կատարել։ Պետք է անպայման գնահատել դրա ազդեցությունը»։

Չնայած մարզաբնակներին  բնակարանային պայմաններով ապահովման նախագծի կարևորությանը՝ տնտեսական հանձնաժողովը նախնական քննարկման արդյունքում դրական  եզրակացություն չի տվել։

«Քաղաքական մեծամասնության ներկայացուցիչները հարցեր էին բարձրացնւմ՝ ավելի հստակեցնելու նախագիծը, մենք էլ պատրաստակամություն հայտնեցինք հետաձգել քննարկումը և ընթացքում լսել նաև նրանց առաջարկությունները»։

Արկադի Խաչատրյանն ուռճացված համարեց նաև կառավարության այն հիմնավորումները, թե    նախագիծը  պետության բյուջեի համար լրացուցիչ ծախսեր կարող է առաջացնել։ Կառավարությունը չի բացառել նաև շինծու կամ կեղծ գործարքներ կատարելու հետ կապված ռիսկեր։ Արկադի Խաչատրյանն ընդգծեց, որ իրենց քաղաքական ուժը հակադարձվել է կառավարության այդ փաստարկին.

«Իմաստ ու նպատակ չենք տեսնում, որ մարդը 20 տարով հիպոտեկ վերցնի, հետո 20 տարի շարունակ վճարումներ կատարի, որ պետությունից նույն այդ վճարված տոկոսը հետ ստանա։ Նպատակ չենք տեսնում», - «Փաստինֆո»-ի հետ զրույցում ասաց պատգամավորը՝ ավելացնելով՝ չեն կարծում, որ ռիսկը մեծ է։

Պատգամավորն կարևորեց նաև  համաչափ զարգացումը՝ ասելով, որ անընդմեջ այդ մասին խոսելով հանդերձ՝ դե ֆակտո զրկում ենք մարզաբնակ քաղաքացիներին հարկային օրենսգրքում նախատեսված փոփոխությունից, - «Պետք է մարդկանց հնարավորություն տալ  իրենց մարզում ձեռք բերել բնակարան և օգտվել այդ արտոնությունից»։

Աղբյուր` Փաստինֆո